Wanunqanpita Jesús kawarimunqan
16
Jamay junaq päsaskiptinnami María Magdalena, Santiagupa maman María y Salomépis mushkuq jachakunata rantiyarqan Jesúspa ayanman wiñapäyänanpä.
Marcos 16.1-20
2 Tsaymi domingu tuta rupay yarqaykämuptin Jesús pamparanqanman aywayarqan. 3 Nänita aywaykarmi niyarqan: “¿Pirä sepultüra tsaparaq rumita kichapämäshun?”
4 Chaykurnami tariyarqan sepultüra tsaparaq jatunkaray rumi wititsishqa kaykaqta. 5 Sepultüra rurinman yaykuskirnami rikayarqan juk chölu yuraq latsapashqa derëcha kaqlächo jamaraykaqta. Payta rikaykurmi pasaypa mantsakäyarqan. 6 Tsaymi tsay chölu nirqan: “Ama mantsakäyaytsu. Musyämi crucificaypa wanutsiyanqan Jesústa rikaq shayämunqaykita. Payqa manami kaychönatsu. ¡Kawarimushqanami! Maski rikayay mayman churayanqantapis.
7 “Kanan aywar Pedruta y wakin discïpulukunata willayay Galileaman puntaykanqanta. Ñöpata ninqannöllami tsaycho paykunawan tinkunqa”.†
8 Tsaynö niptinmi warmikuna mantsakaywan tsuktsukyarrä empëñu aywayarqan. Mantsakashqa karmi rikayanqankunata pitapis willayarqantsu.
María Magdalenata Jesús yuripanqan
9 [Domingu tuta Jesús kawaskamurmi María Magdalenata puntata yuriparqan. Paypitami qanchis supaykunata ñöpata qarqushqa karqan. 10 Yuripaskiptinmi Jesúswan puriqkunata willananpä María Magdalena aywarqan. Chaykurmi tarirqan llakikurnin waqaykäyaqta. 11 “Jesústa kawaykaqtami rikashqä” nir willaptinpis manami criyiyarqantsu.
Ishkay discïpulunkunata Jesús yuripanqan
12 Tsaypitanami markapita aywaykäyaptin ishkay discïpulunkunata Jesús yuriparqan. Payqa manami ñöpata kanqannönatsu karqan. 13 Tsaypita kutiykurnami discïpulu mayinkunata Jesús yuripanqanta willayarqan. Willayaptinpis manami criyiyarqantsu.
Willakuyänanpä discïpulunkunata Jesús kachanqan
14 Tsaypitanami chunka juk discïpulunkuna mikuykäyaptin Jesús yuripaykur nirqan: “Yärakuyniynaq chukru shonqu runakuna, kawarimunqäta willayäshuptikipis ¿imanirtä criyiyashqaykitsu?”
15 Mastami nirqan: “Maytsaypapis aywarnin llapan runakunata alli willakuynïta willakuyanki.† 16 Mayqanpis criyir bautizakuq kaqkunaqa salvakuyanqami. Mana criyiqkunami itsanqa infiernuman qaykushqa kayanqa. 17 Criyiqkunaqa milagrukunatapis rurayanqami. Jutïchömi supaykunatapis qarquyanqa y juk idiömakunatapis parlayanqami. 18 Culebra kaniptinpis, venënuta qarayaptinpis manami wanuyanqatsu. Tsaynöllami qeshyaykaqkunata yataykur Tayta Diosta mañakuyaptinpis alliyäyanqa”.
Ciëluman Jesús kutinqan
19 Discïpulunkunata parlapayta ushaskiptinmi Señor Jesústa gloriaman Tayta Dios apakurqan.† Tsaychömi Tayta Diospa derëchanman jamakurqan. 20 Tsaypitanami discïpulunkuna maytsaychöpis willakuyarqan. Kikin Señornintsikmi yanaparqan milagrukunata rurayänanpä. Tsayta rikarmi runakuna tantiyayarqan tsay willakuyanqan rasunpaypa kanqanta. Amén.]a
Marcos 16.21-21