Jesús kawarimunqan
20
Semäna qallaykunan tutamia María Magdalena tsaka tsakalla Jesús pamparaykanqan sepultüraman aywarqan. Chaykurmi sepultüra tsaparaq rumi wititsishqa kaykaqta tarirqan. 2 Tsayta rikaykurmi cörrilla kutirqan Simón Pedruta y Jesús kuyanqan discïpuluta willananpä. Chaykurmi willarqan: “¡Jesúspa ayantami apakuyashqa! ¡Manami musyayätsu maypa apayanqantapis!”3 Tsaynami Jesús kuyanqan discïpulu y Pedro Jesústa pampayanqan kaqman aywayarqan. 4 Cörrilla aywarmi jukaq discïpulun Pedruta llalliskir puntata charqan. 5 Sepultüra punkullapita qawaykurmi säbanasllana qoturaykaqta rikarqan. 6 Qepanta Simón Pedro chaykurnami ruriman yaykuskir säbanasllatana paypis tarirqan. 7 Jesúspa umanta watayanqan tëlatapis shumaq doblashqatami uman kanqanlächo churaraykaqta tarirqan. 8 Tsayrämi puntata chaq discïpulupis ruriman yaykurqan. Paypis tsaykunata rikaykurmi criyirqan. 9 Tsaynö kaykaptinpis manami tantiyayarqanrätsu kawarimunanpä Tayta Diospa palabran ninqanta. 10 Tsaypitanami patsaräyanqan wayiman kutikuyarqan.
María Magdalenata Jesús yuripanqan
11 Maríanami pamparanqan kaqman kutiykur punkucho waqar quëdakurqan. Waqaykanqancho sepultürata qawaykurmi 12 rikarqan ishkay angelkuna yuraq latsapashqa kaykaqta. Jukmi Jesúspa uman kanqan kaqcho jamaraykarqan y jukaqnami chakin kanqan kaqcho jamaraykarqan. 13 Tsay angelkunami Maríata tapuyarqan: “¿Imanirtä waqaykanki?” nir.
Tsaynö tapuyaptinmi nirqan: “Señornïpa ayantami apakuyashqa. Manami musyätsu mayman churayanqantapis”.
14 Tsaynö nir tikraykunqanchömi Jesústa rikarqan. Itsanqa pay kanqanta manami tantiyarqantsu. 15 Jesúsnami tapurqan: “¿Imanirtä waqaykanki? ¿Pitatä ashiykanki?” nir.
Tsaynö tapuptinmi huertacho aruq runa kanqanta yarpar María nirqan: “Taytay, maymanpis Jesúspa ayanta apashqa karqa qorikamunäpä willaykallämay”.
16 Jesúsnami nirqan: “¡María!”
Tsaynö niptinmi María tikraykur nirqan: “¡Raboni!”
Hebreo idiömacho raboni ninanqa yachatsikuq ninanmi.
17 Jesúsnami nirqan: “Ama tsarimaytsu. Taytä kaqman manarämi aywashqärätsu. Kananqa discïpulükunata willay Taytäman kutikunäpäna kanqanta. Noqapa Taytäqa qamkunapapis Taytaykimi y Diosnïqa qamkunapapis Diosnikikunami”.
18 Tsaynö niptinmi María Magdalena juklla aywarqan Jesús yuripanqanta y imata ninqankunatapis discïpulunkunata willananpä.
Discïpulunkunata Jesús yuripanqan
19 Tsay paqasmi discïpulunkuna juk wayicho qorikashqa kaykäyarqan. Israel runakunapa autoridäninkunata mantsarmi punkuta trancapakushqa kaykäyarqan. Tsaycho kaykäyaptinmi Jesús yuriskir nirqan: “Alli kaway qamkunacho kaykullätsun”.
20 Tsaynö nirmi makinta y llapsha pachanta rikatsirqan. Jesústa rikaykurmi discïpulunkuna pasaypa kushikuyarqan. 21 Jesúsnami yapay nirqan: “Alli kaway qamkunacho kaykullätsun. Taytä kachamanqannöllami noqapis qamkunata kachaykä”.
22 Tsaynö nir paykuna kaqman pükarmi nirqan: “Espíritu Santuta chaskiyay. 23 Pitapis jutsankunapita perdonayaptikiqa Tayta Diospis perdonanqami. Mana perdonayaptikimi itsanqa Tayta Dios perdonanqatsu”.b †
Jesúswan Tomás tinkunqan
24 Discïpulunkunaman Jesús chanqan höra Millish niyanqan Tomás tsaycho manami karqantsu. Payqa Jesúspa apostolninmi karqan. 25 Tomáswan tinkurnami discïpulu mayinkuna willayarqan: “¡Señor Jesucristumi yuripäyämashqa!”
Tsaymi Tomás nirqan: “Clävu uchkunqan makinta manarä rikarqa, tsayman dëdüta manarä jatirqa y tuksiyanqan llapsha pachanman makïta manarä jatirqa manami criyishätsu”.
26 Tsaypita juk semänatanami discïpulunkuna yapay juk wayicho qoriraykäyarqan. Tsaychömi Tomáspis kaykarqan. Punkuta trancapakushqa kaykäyaptinmi paykunapa ñöpancho illaqpita Jesús yuriskir winchikur nirqan: “¡Alli kaway qamkunacho kaykullätsun!”
27 Tomástanami nirqan: “Tomás, makïta rikay. Clävu uchkunqanman dëduykita jatiy. Tuksiyämanqan llapsha pachämanpis makikita jatiy. ¿Imanirtä criyinkitsu?”
28 Tsaynö niptinmi Tomás nirqan: “¡Señorllä y Diosnillä!”
29 Jesúsnami nirqan: “¿Rikaykamarräku criyinki? ¡Mana rikaykämarpis criyiqkunaqa kushishqami kayanqa!”
Kay libruta imapä qellqanqanpis