Qanchis discïpulunkunata Jesús yuripanqan
21
Tsaypitanami Tiberiasa qocha kuchuncho discïpulunkunata Jesús yapay yuriparqan. 2 Tsaychömi kaykäyarqan Simón Pedro, Millish ninqan Tomás y Natanael. Natanaelqa Galileacho kaykaq Caná markapitami karqan. Tsaynöllami Zebedeupa ishkan tsurinkuna y mas ishkay discïpulukunapis kaykäyarqan. 3 Paykunatami Simón Pedro nirqan: “Pescädu tsariqmi aywaykä”.Tsaynö niptinmi niyarqan: “Aku noqakunawanpis aywashun”.
Tsaynö nirmi büquiman yarkurkur llapan aywayarqan. Tsay paqas warat pescaykarpis manami ni jukllayllatapis tsariyarqantsu.† 4 Patsa waraykaptinnami qocha kuchuncho juk runa kaykaqta rikayarqan. Itsanqa Jesús kanqanta manami musyayarqantsu. 5 Paymi qayakur nirqan: “Amïgukuna, ¿pescäduta tsariyashqaykiku?”
Paykunanami niyarqan: “Tayta, manami ni jukllayllatapis tsariyärätsu”.
6 Tsaynö niyaptinmi nirqan: “Büquipa derëcha kaq lädunman mällaykita mashtayay. Tsaychöqa pescäduta tsariyämunkimi”.
Ninqannö mällata mashtarnami sutaytapis mana puëdiyanqanyaq tsaytsika pescäduta tsariyarqan.† 7 Tsaymi Jesús kuyanqan kaq discïpulunqa Pedruta nirqan: “¡Payqa Señornintsikmi!”
Tsaynö niptinmi Simón Pedruqa latsapanta tseqllanman wachakakurkur juklla Jesús kaqman nädaypa aywarqan. 8 Wakin kaq discïpulukunanami mällancho tsaytsika pescäduta büquiwan qarachashqa aywayarqan. Qocha kuchunman chäyänanpäqa juk pachak (100) metrunöllami pishirqan. 9 Kuchunman chaykurnami tariyarqan tantata y shansha janancho pescädu kankashqa kaykaqta.
10 Tsaymi Jesús nirqan: “Tsariyämunqayki pescäduta juk ishkayta apayämuy”.
11 Tsaynö niptinmi Simón Pedro büquiman yarkuskir mällata qarachämurqan pescädukunata apayänanpä. Tsay mällachömi karqan juk pachak pitsqa chunka kimsa (153) jatusaq pescädukuna. Tsaytsika pescäduwanpis mälla manami rachirqantsu. 12 Tsaymi Jesús nirqan: “Mikuq shayämuy”.
Señor Jesús kanqanta musyarmi mayqan discïpulunpis pï kanqantapis tapuyarqantsu. 13 Paykuna kaqman witiykurnami tantatawan pescäduta Jesús qararqan.
14 Tsaycho yuripanqanwanqa kawarimunqanpita kimsa kutinami discïpulunkunata Jesús yuriparqan.
Simón Pedruwan Jesús parlanqan
15 Mikuyta ushaskirnami Simón Pedruta Jesús tapurqan: “Jonáspa tsurin Pedro, wakin kaq discïpulükunapita ¿masku kuyamanki?”
Pedrunami nirqan: “Taytay, qam musyankimi kuyanqäta”.
Jesúsnami nirqan: “Ashkashnïkunata shumaq rikanki”.
16 Jesús yapay tapurmi nirqan: “Jonáspa tsurin Simón, ¿kuyamankiku?”
Pedrunami nirqan: “Taytay, qam musyankimi kuyanqäta”.
Niptinmi nirqan: “Üshäkunata shumaq mitsinki”.
17 Tsaypita yapaymi Jesús tapurqan: “Jonáspa tsurin Simón, ¿rasunpaypaku kuyamanki?”
Tsaynölla kimsa kuti tapuptinmi Pedro llakishqa nirqan: “Taytay, qamqa llapantami musyanki. Kuyanqätapis musyankimi”.
Niptinmi Jesús nirqan: “Üshäkunata shumaq rikanki. 18 Rasunpaypami nï: Chölullarä karqa latsapaykikunata jatikurkurmi munanqaykipa aywarqayki. Awkinyarnami itsanqa rikraykita kichaptiki jukna jatitsishunki.b Tsaynöpis aywayta mana munanqaykipami apayäshunki”.
19 Tsaynö nirmi Pedruta Jesús tantiyatsirqan Tayta Dios munanqannö kawar imanö wanunanpä kanqanta. Nirkurnami Pedruta nirqan: “Qatirämay”.
Libru ushanan
20 Tsaypitanami tikraykur Jesús kuyanqan kaq discïpuluta Pedro rikarqan. Tsay discïpulumi Pascua cënaycho Jesúspa ñöpancho tapurqan mayqan discïpulun contran shärinanpä kanqantapis.† 21 Payta rikaykurmi Jesústa Pedro tapurqan: “Taytay, paytaqa ¿imatä päsanqa?”
22 Tsaynö tapuptinmi Jesús nirqan: “Noqa munaptïqa kutimunqäyaqpis kawanqami. ¿Imanirtä paypä tapumanki? Qamqa qatirämay”.
23 Jesús tsaynö ninqanta musyaykurmi maytsaychöpis wawqikuna panikuna yarpäyarqan tsay discïpulun imaypis mana wanunanpä kanqanta. Tsaynö yarpäyaptinpis Jesús manami mana wanunanpä kanqantatsu nirqan, sinöqa nirqan: “Noqa munaptïqa kutimunqäyaqpis kawanqami. ¿Imanirtä paypä tapumanki?”