19
Tsaynö niyaptinmi Jesústa Pilato castigatsirqan. 2 Soldädukunanami kashapita corönata awriskir Jesúspa umanman jatitsiyarqan. Tsaynöpis granäti cäpatami aqshutsiyarqan.a 3 Nirkurnami Jesústa laqyarnin niyarqan: “¡Alabashqa katsun Israel runakunapa mandaqnin rey!”4 Tsaypitanami despächunpita yapay yarqaskamur Pilato nirqan: “Tantiyakuyay. Apayämunqayki runapa ima jutsantapis manami tarïtsu. Tsaymi jutsaynaq kanqanta tantiyakuyänaykipä jipiykämü”.
5 Tsaynö nirmi Jesústa jipimurqan kasha corönan jatishta y granäti cäpan jatishqata. Tsaymi Pilato nirqan: “¡Kay runata rikayay!”
6 Jesústa rikaykurmi mandaq sacerdötikunawan templu täpaq wardiakunapis jinchi niyarqan: “¡Crucificay! ¡Crucificay!”
Tsaynö niyaptinmi Pilato nirqan: “Kikikikuna crucificayay. Noqaqa manami ima jutsantapis tarïtsu”.
7 Tsaynö niptinmi niyarqan: “Diospa Tsurin kanqanta niqkuna wanutsishqa kananpämi leynïkunacho nin. ¡Tsaynö kaptinqa tsay runa wanutsishqa katsun!”
8 Tsaynö niyaptinmi Pilato pasaypa mantsarirqan. 9 Tsaymi despächunman kutiykur Jesústa yapay tapurqan: “¿Qam maypitatä kaykanki?”
Tsaynö tapuptin Jesús manami imatapis parlakurqantsu. 10 Tsaymi Pilato nirqan: “¿Manaku imatapis contestamanki? Crucificatsinäpä o kachänäpäpis munayyuq kanqäta ¿manaku musyanki?”
11 Jesúsnami nirqan: “Qampa munaynikiman Tayta Dios mana churamaptinqa imata ruramänaykipäpis munayniki manami kanmantsu. Tsaymi munaynikiman entregamaq runa qampita mas jutsayuq kaykan”.
12 Tsaynö niptinmi Pilato kachayta munarqan. Kachariyta munaptinpis Israel runakunapa autoridäninkuna masrämi qayaräyarqan: “¡Kay runaqa rey tukurmi mandaq Césarpa contran kaykan! ¡Payta kacharqa qampis Césarpa contranmi kaykanki!”
13 Tsaynö niyaptinmi Jesústa waqtaman jipiskatsimur Gábata ninqan punkuman aywaykur Pilato jamarqan. (Hebreo idiömachöqa Gábata ninqanqa “läja rumikunawan rurashqa” ninanmi.) 14 Tsay höraqa karqan pullan junaqnömi. Tsay tardimi Pascua fiestacho jamay junaq qallaykunanpäna karqan.b Tsaychömi Pilato nirqan: “¡Reynikikunata rikayay!”
15 Paykunanami jinchi niyarqan: “¡Wanutsun! ¡Wanutsun! ¡Crucificay!”
Pilatunami nirqan: “¿Mandashuqniki reytaku crucificatsishä?”
Tsaymi mandaq sacerdötikuna niyarqan: “¡Noqakunapa mandayämaqnï reyqa Césarllami! ¡Paypita mas juk reyqa manami kantsu!”
16 Tsaynö niyaptinmi munayanqannö Jesústa crucificayänanpä soldädukunata Pilato mandarqan. Tsaymi Jesústa apakuyarqan.
Jesústa crucificayanqan
17 Cruzta umrurkatsirmi Calavëra niyanqan sitiuman Jesústa apayarqan. Hebreo idiömachöqa Calavëra ninqantami Gólgota niyan. 18 Tsayman chaykatsirmi Jesústa crucificayarqan. Tsaynöllami ishkay runakunatapis Jesúspa ishkan lädunman crucificayarqan.
19 Tsaypitanami juk letrëruta qellqarkur cruzpa puntanman Pilato clävatsirqan. Tsay letrëruchömi nirqan: “Nazaretpita Jesús, Israel runakunapa mandaqnin rey”.
20 Jerusalénpa cercallancho crucificashqa kaptinmi tsay letrëruta Israel runakuna atskaq liyiyarqan. Tsay letrëruqa hebreo, latín y griego idiömakunachömi qellqararqan. 21 Tsaymi mandaq sacerdötikuna Pilatuta niyarqan: “ ‘Israel runakunapa mandaqnin rey’ nirqa ama qellqaytsu. Tsaypa trokinqa ‘Israel runakunapa mandaqnin rey kanqantami kay runaqa nirqan’ nir qellqay”.
22 Pilatunami nirqan: “Qellqanqäqa qellqashqanami kaykan”.
23 Crucificaskirnami Jesúspa latsapankunata chuskuq soldädukuna rakipänakuyarqan. Rurin kaq latsapan costüraynaq kaptinmi 24 niyarqan: “Kaytaqa ama rachishuntsu. Tsaypa trokinqa mayqantsikpis apakunantsikpä suertita jitashun”.
Tsaynö rurarmi Tayta Diospa palabran kaynö ninqanta cumpliyarqan: “Latsapätapis rakipänakuyashqami. Mayqanpis apakunanpämi suertita jitayashqa”.† Tsay ninqannöllami soldädukuna rurayarqan.
25 Crucificaraykanqan kaqchömi kaykäyarqan Jesúspa maman, mamanpa ñañan, Cleofaspa warmin María y María Magdalenapis. 26 Mamanta y kuyanqan discïpulun ñöpancho kaykaqta rikaykurmi Jesús nirqan: “Mamay, paynami wawayki kanqa”.
27 Nirkurmi kuyanqan discïpuluntana nirqan: “Kananpitaqa mamaykitanö rikaykullanki”.
Tsaynö ninqanpitami wayinman pushaykur mamantanö rikarqan.
Jesús wanunqan
28 Llapanpis cumplishqana kanqanta musyarmi Tayta Diospa palabranta cumplinanpä Jesús nirqan: “¡Yakullaw!”†
29 Tsaychömi wichi junta pochquq vïnu kaykarqan. Tsaymi hisöpu jachaman esponjata watarkur tsay pochquq vïnuman tullpurkur Jesúspa shiminman töpatsiyarqan. 30 Tsay vïnuta yawarkurmi Jesús nirqan: “Llapanpis cumplishqanami”.
Tsaynö niskirmi wanuskirqan.
Jesústa tuksinqan
31 Pascuacho jamay junaq qallaykunanpäna kaptinmic Israel runakunapa autoridäninkuna munayarqantsu pipis crucificaraykar quëdananta. (Pascuacho jamay junaqqa pasaypa sagrädumi karqan.) Tsaymi Pilatuta rugakuyarqan cruzcho clävaraykaqkunapa chankankunata pakiskir cruzpita jipiyänanpä.d 32 Rugakuyanqanta awniptinmi soldädukuna aywaykur Jesúswan crucificaraykaq runakunapa chankankunata pakiyarqan. 33 Jesús wanushqana kaykaqta rikaykurmi paypa chankankunataqa pakiyarqannatsu. 34 Tsaypa trokinqa juk soldädumi lanzawan llapsha pachanpa tuksirqan. Tuksiskiptinmi yawarwan yaku jinan höra yarqaskamurqan.
35 Llapan tsaykunatami rikarqä. Tsaymi imanö kanqantapis qellqä salvamaqnintsik Cristo kanqanta qamkunapis criyiyänaykipä. Llapan qellqanqäkunaqa rasun kaqmi. 36 Tayta Diospa palabranmi nin: “Manami ni juk tullullantapis pakinqatsu”.†
Llapan tsaykunami päsarqan Tayta Diospa palabran cumplinanpä. 37 Tsaynöllami Tayta Diospa palabran nin: “Tuksiyanqantami rikayanqa”.†
Jesústa pampayanqan
38 Tsaypitanami Arimatea markapita José jutiyuq runa Pilatuta rugakur nirqan: “Jesúspa ayanta pampanäpä kachapaykallämay”.
Josépis Jesúspa discïpulunmi karqan. Itsanqa Israel autoridäkunapita mantsapakurmi musyatsikurqantsu. Mañakunqanta Pilato awniptinmi Jesúspa ayanta pampaq apakurqan. 39 Tsaymanmi Nicodemupis aywarqan kimsa arröbanö mïrra y áloe takushqatae apakurkur. Ñöpatami Nicodemo tsakayllapa Jesúswan parlaq aywarqan.† 40 Israel runakunapa costumbrin kanqanmannömi Joséwan Nicodemo tsay apayanqankunata säbanasman wiñarkur Jesúspa ayanta pituyarqan.