3 Wanutsiyänanpä kanqanta musyaskirmi Jesústa rantikuq Judas pasaypa llakikurqan. Tsaymi mandaq sacerdötikuna y Israel mayor runakuna qorikäyanqanman aywaykur chaskinqan kimsa chunka (30) qellayta kutitsir^† 4 nirqan: “Jutsaynaq runata wanutsiyänaykipä entregarmi jutsata rurashqä”.

Paykunanami niyarqan: “¡Noqakunata imatä qokayäman! ¡Imanöpis kakuy!”

5 Tsaynö niyaptinmi chaskinqan qellayta templuman jitaskir aywakurqan. Nirkurnami jorkakuskirqan.

6 Mandaq sacerdötikunanami tsay qellayta qoriskir niyarqan: “Kay qellay runapa yawarninpa chaninmi. Tsaynö kaykaptinqa ofrendakunaman ama tallushuntsu”.

7 Tsaymi willanakuskir tsay qellaywan manka ruraq runapa chakranta rantiyarqan jäpa runakuna wanuptin tsayman pampayänanpä. 8 Tsaypita patsami kananyaqpis tsay chakrapa jutin Yawar Pampa. 9 Chakrata tsaynö rantirmi profëta Jeremías kaynö qellqanqanta cumpliyarqan:

11 Jesústa chätsiyaptinmi gobernador Pilato tapurqan: “¿Rasunpaypaku Israel runakunapa mandaqnin rey kanki?”

Jesúsnami nirqan: “Rasun kaqtami nishqayki”.

12 Tsaycho mandaq sacerdötikuna y Israel mayor runakuna Jesúspa contran imaykata niyaptinpis Jesús manami imatapis parlakurqantsu. 13 Tsaymi Pilato tapurqan: “¿Manaku imatapis ninki imaykata contrayki niyaptin?”

14 Tsaynö niptinpis Jesús manami imatapis parlakurqantsu. Tsaymi Pilato mantsakashqa ima niytapis kamäpakurqantsu.

15 Cada watami Pascuacho runakuna mañakuyanqan prësuta Pilato kachariq. 16 Tsay watami pïmaypitapis chikishqa Barrabás jutiyuq runa prësu wichqaraykarqan. 17 Tsayman runakuna qorikäyaptinmi Pilato tapurqan: “¿Mayqan prësutatä kachänäta munayanki? ¿Barrabástaku? ¿O Cristo ninqan Jesústaku?”

18 Pilatuqa musyarqanmi Jesústa chikir payman prësu apayanqanta.

19 Pilato tsaycho juzgar jamaraykaptinmi warmin willakatsir nirqan: “Tsay runaqa jutsaynaqmi. Paywan ama jatikaytsu. Payta prësu tsariyanqanpitami kanan paqas pasaypa mana allikunata suëñushqä”.

20 Tsaynö kaptinpis mandaq sacerdötikuna y Israel mayor runakunami itsanqa runakunata willapäyarqan Barrabásta qarquskir Jesústa wanutsinanpä. 21 Tsaymi “¿mayqantatä kacharishä?” nir Pilato yapay tapuptin runakuna niyarqan: “Barrabásta kachariy”.

22 Pilatunami nirqan: “Tsay höraqa Cristo ninqan Jesústa ¿imatatä rurashä?”

Tsaynö niptinmi llapan niyarqan: “¡Crucificay!”

23 Pilatunami tapurqan: “¿Ima jutsatatä rurashqa?”

Tsaynö niptinpis runakuna masrä qayararmi niyarqan: “¡Crucificay!”

24 Runakuna pasaypa qayaräyaptinmi ima ruraytapis Pilato kamäpakurqantsu. Tsaymi yakuta apaskatsimur runakuna rikaykaptin makinta mayllakur^† nirqan: “Kay runata wanutsiyaptiki noqa manami jutsayuqtsu kaykä. Qamkuna imanöpis kakuyay”.

25 Tsaynö niptinmi runakuna niyarqan: “Kay runa wanunqanpita noqakuna y wamräkunami jutsayuq kayäshä”.

26 Tsaynö niyaptinmi Barrabásta Pilato kacharirqan. Jesústanami pasaypa asutaykatsir crucificayänanpä soldädukunaman entregarqan.

27 Tsaypitanami soldädukuna Jesústa apayarqan Pilatupa despächunman. Tsayman llapan tröpa^a soldädukuna juntapaykurmi 28 Jesúspa latsapanta jipiskatsir puka cäpata jatitsiyarqan. 29 Tsaynöllami kashapita awrishqa corönata umanman jatitsiyarqan. Derëcha kaq makinmannami shoqushta aptatsiyarqan. Nirkurmi ñöpanman qonqurikuykur asipar niyarqan: “¡Alabashqa katsun Israel runakunapa mandaqnin rey!”

30 Tsaynöpis toqapurninmi aptaranqan shoqushta qechuskir umacho wiruyarqan. 31 Tsaynö asiparmi jatitsiyanqan cäpata llushtiskatsir kikinpa latsapantana jatitsiyarqan. Nirkurmi crucificaq apayarqan.

32 Crucificaq apaykäyanqanchömi Cirene nacionpita Simónwan tinkuyarqan. Paytami Jesús apaykanqan cruzta umrutsiyarqan.

33 Tsaypitanami Jesústa chätsiyarqan Gólgota niyanqanman. Gólgota ninanqa Calavëra Sitiu ninanmi. 34 Tsaycho ayaq jachawan takushqa vïnuta uputsiyta munayaptinpis yawarkur manami upuyta munarqantsu.^b

35 Jesústa crucificaskirnami latsapanta mayqanpis apakunanpä suertita jitayarqan. [Tsaynö rurayänanpämi Tayta Diospa profëtan qellqanqancho nin: “Kikinpurami latsapäta rakipänakuyarqan. Latsapäta apakuyänanpämi suertita jitayarqan”.^†]

36 Nirkurnami täpar quëdayarqan. 37 Imapita wanutsiyanqantapis runakuna musyayänanpämi juk letrëruta cruzpa puntanman clävayarqan. Tsay letrëruchömi nirqan: “Kay runami Israel runakunapa mandaqnin rey Jesús”.

38 Jesús crucificaraykanqan lädunmanmi ishkay ladronkunatapis crucificayarqan, juknin kaqta derëchanman y jukaqtana itsuqninman. 39 Jesús crucificaraykaqta rikarmi tsaypa päsaq runakuna asipäyarqan. Umankunata awiparmi^† 40 niyarqan: “Templutapis juchuskatsir kimsa junaqllata shäritsinaykipä nikarqa^† mä salvakuy, ari. Diospa Tsurin karqa mä cruzpita yarpamuy”.

41 Tsaynöllami mandaq sacerdötikuna, ley yachatsikuqkuna, [fariseukuna] y Israel mayor runakunapis Jesústa asipar niyarqan: 42 “Wakinta salvarpis kikinqa manami salvakuyta kamäpakuntsu. Israel runakunapa mandaqnin rey karqa mä cruzpita yarpamutsun. Yarpamuptinqa criyishunmi. 43 Payqa ‘Tayta Diospa Tsurinmi kä’ nirmi Diosman yärakushqa. Rasunpaypa Tsurin kaptinqa Tayta Dios kuyapar cruzpita jipitsun”.^†

44 Tsaynöllami läduncho crucificaraykaq ladronkunapis burlakuyarqan.

45 Pullan junaqpita hasta las tresyaqmi patsa tsakaskirqan. 46 Tsay hörami Jesús jinchi qayarar nirqan: “Elí, Elí, ¿lama sabactani?”

Tsay ninanqa “Tayta Dios, Tayta Dios, ¿imanirtä kachariykamashqayki?” ninanmi.^†

47 Tsaynö ninqanta wiyarmi tsaycho kaykaq wakin runakuna niyarqan: “Profëta Elíastami qayaykan”.

48 Tsaynö niyaptinmi juk runa ras aywar pochquq vïnuman esponjata ushmaskatsir shoqushpa puntanman watarqan. Tsayta Jesústa shoqutsiyta munaptinmi^† 49 runakuna niyarqan: “Ama shoqutsiytsu. Mä rikashun cruzpita jipinanpä Elías shamunäkush”.

50 Tsaypitanami yapay jinchi qayaraskir Jesús wanuskirqan. 51 Tsay hörami templu rurincho tsaparaq cortïna^† janapita urayaq rachiskirqan. Patsa pasaypa kuyuptinmi qaqakunapis partikäyarqan. 52 Sepultürakunapis kichakaptinmi Tayta Dios munanqannö kawaq runakunapis kawayämurqan. 53 Jesús kawariskamuptinnami pamparäyanqanpita yarqamur sagrädu Jerusalén markaman yaykuyarqan. Atskaq runakunami tsay kawarimuq runakunata rikayarqan.

54 Jesústa täpaq capitán y soldädunkunami patsa kuyuqta mayar y llapan päsanqankunata rikar pasaypa mantsakar niyarqan: “¡Rasunpaypami kay runaqa Diospa Tsurin kashqa!”

55 Tsaychömi atskaq warmikuna karullapita rikaraykäyarqan. Tsay warmikunaqa Galileapita patsami Jesústa yanapar aywayarqan. 56 Paykunawanmi kaykarqan María Magdalena, Santiagupa y Josépa maman María y Zebedeupa warminpis.^†

57 Patsa tsakaykaptinnami Arimateapita juk imaykayuq runa José jutiyuq Pilato kaqman charqan. Paypis Jesúspa discïpulunmi karqan. 58 Chaykurmi Pilatuta rugakur nirqan: “Jesúspa ayanta pampanäpä kachapaykallämay”.

Tsaynö rugaptinmi soldädukunata Pilato nirqan Jesúspa ayanta kachapäyänanpä. 59 Kachapaskiyaptinmi lïnupita rurashqa limpiu säbanaswan piturkur 60 qaqacho tsayrä uchkushqa sepultüraman pamparqan. Tsaypitanami jatunkaray rumiwan sepultürapa punkunta tsapaykur aywakurqan. 61 Tsaychömi María Magdalena y jukaq Maríapis jamaraykäyarqan.

62 Jesús wanunqanpita waraynin jamay junaqnami mandaq sacerdötikuna y fariseukuna Pilato kaqman aywaykur 63 niyarqan: “Taytay, tsay llulla runami nirqan: ‘Wanunqäpita kimsa junaqtami kawarimushä’.^† 64 Tsaynö nishqa kaykaptinqa sepultürata kimsa junaqyaq soldäduykikunawan täpaykatsillay. Manatsayqa discïpulunkuna Jesúspa ayanta [tsakaypa] suwaskirmi runakunata criyitsiyanqa wanunqanpita kawarimunqanta. Tsaynö llullakurqa tsay runa engañanqanpita peormi runakunata engañayanqa”.

65 Pilatunami nirqan: “Soldädukuna sepultürata täpayänanpä pushayay”.

66 Tsaynö niptinmi aywar sepultüra tsaparaq rumita sellayarqan pipis kichaptin musyayänanpä. Nirkurnami soldädukunata täpayänanpä churayarqan.