Jesúspa chakinman perfümita María wiñanqan
12
Pascua fiestapä soqta junaq pishiykaptinmi Betania markaman Jesús aywarqan. Tsaychömi wanunqanpita kawarimuq Lázaro tarqan. 2 Jesús chaykuptin kushikurmi merendata kusinakuyarqan. Wakin runakunawan mësaman Jesús jamaykuptinmi Lázarupis mikunanpä jamarqan. Paykunatami Marta qararqan.3 Tsaycho mikuykäyaptinmi nardupita rurashqa chaniyuq perfümita mediu litrutanö María apamurqan. Tsay perfümitami Jesúspa chakinman wiñapaskir aqtsanwan tsakitsirqan.a † Tsay perfümimi wayi junta mushkurqan. 4 Tsaymi Jesústa rantikunanpä kaq discïpulun Judas Iscariote nirqan: 5 “¿Imapätä tsay perfümita perditsishqa? Tsaypa trokinqa juk wata aruypa chaninchömib rantikushwan karqan. Tsay qellaywanmi muchuqkunata yanapashwan karqan”.
6 Tsaynö nirqan manami muchuqkunata yanapayta munartsu, sinöqa suwa karmi. Qoriyanqan qellayta tsarararmi wallka wallkalla suwakuq.
7 Jesúsnami nirqan: “Tsay perfümitami tsararashqa pampayämänan junaqpä. Tsaynö kaykaptinqa ama imatapis niytsu. 8 Muchuqkunaqa qamkunawanmi imaypis kaykäyanqa.† Noqami itsanqa qamkunawan kashänatsu”.
Lázaruta wanutsiyta munayanqan
9 Betania markacho Jesús kaykanqanta musyaskirmi atskaq runakuna tsayman aywayarqan. Manami Jesús rikaqllatsu aywayarqan, sinöqa kawarimuq Lázaruta rikayänanpämi aywayarqan. 10 Tsaymi mandaq sacerdötikuna Lázarutapis wanutsiyta munayarqan. 11 Mandaq sacerdötikunata cäsuyänanpa trokinmi Lázaruta kawatsimunqanpita atskaq runakuna Jesúsmanna criyiyarqan.
Jerusalénman Jesús yaykunqan
12 Waraynin junaqnami fiestaman aywaq atskaq runakuna musyayarqan Jerusalénman Jesús yaykuykanqanta. 13 Tsaymi palmakunapa llimllankunata apakurkur Jesústa chaskiyänanpä aywayarqan. Jesústa rikaykurmi jinchi niyarqan: “¡Hosana!c ¡Tayta Diospa jutincho shamuq runa alabashqa kaykullätsun! ¡Qammi Israel runakunapa mandaqnin rey kanki!”†
14 Jerusalénmanmi malta ashnun muntashqa Jesús yaykurqan. Tsaynö yaykunanpämi Tayta Diospa palabranchöpis kaynö qellqaraykan:
15 “Sión runakuna, ama mantsariyaytsu.
Rikayay mandashuqniki rey malta ashnun muntashqa shamuykaqta”.†
16 Tsay höra imanir Jerusalénman ashnun muntashqa yaykunqanta discïpulunkuna manami tantiyayarqantsu. Wanunqanpita kawaskamuptinrämi Jesús ruranqankuna Tayta Diospa palabrancho ninqannö kanqanta tantiyayarqan.
17 Lázaruta Jesús kawatsimunqanta rikaq runakuna maytsaycho willakuyaptinmi 18 Jesústa chaskiq atskaq aywayarqan. 19 Tsayta rikarmi fariseukuna niyarqan: “Kananqa ¿imatatä rurashun? ¡Llapan runakunami payta qatiraykäyan!”
Mana Israel runakuna Jesústa ashiyanqan
20 Pascuacho Tayta Diosta adorayänanpämi mana Israel runakunapis Jerusaléncho kaykäyarqan. 21 Paykunapita wakin runakunami Felipiman aywaykur rugakuyarqan: “Taytay, Jesústa reqiykatsiyällämay”.
Felipiqa Galileacho Betsaida markapitami karqan.
22 Felipinami Andrésta willarqan. Nirkurnami ishkan aywar Jesústa willayarqan reqiyta munayanqanta. 23 Jesúsnami nirqan: “Runapa Tsurin glorificashqa kananpä kaq höra chämushqanami.d 24 Rasunpaypami nï: Trïguta murur mana pampashqaqa manami jeqamuntsu. Pampashqami itsanqa jeqamur alli wayun.† 25 Kawayninta salvayta munaqkunaqa kawayninta oqrayanqami. Kawayninta kay patsacho oqraqkunami itsanqa kawayninta salvar mana ushakaq kawayta tariyanqa.e † 26 Pipis sirvimayta munaq kaqqa qatirämätsun. Qatirämarqa noqa kanqä kaqchömi kanqa. Sirvimaq kaqtaqa Taytäpis kuyanqami.
Wanunanpä kanqanta Jesús willakunqan
27 “Pasaypa llakikuymi tsarimashqa. Tsaynö llakikurpis manami Taytäta mañakümantsu wanuypita salvamänanpä. Wanunäpämi kay patsaman shamushqä”.
28 Tsaynö nirmi Tayta Diosta mañakurqan: “Taytallä, munayyuq kanqaykita tantiyakuyänanpä qam munanqaykinö kaykullätsun”.
Tsaymi ciëlupita Tayta Dios nimurqan: “Munayyuq kanqäta musyatsinqänömi yapaypis musyatsishä”.
29 Tsayta wiyarmi tsaycho wakin runakuna niyarqan: “¡Illaqukuymi qayarämun!”
Wakinnami niyarqan: “¡Angelmi parlamushqa!”
30 Jesúsnami nirqan: “Parlamuqta wiyayanqayki manami noqapätsu, sinöqa Tayta Dios kachamanqanta tantiyayänaykipämi. 31 Runakuna juzgashqa kayänanpä kaq höra chaykämunnami.† Tsaynöllami kay patsapa mandaqninf qarqushqa kananpäpis höran chaykämunna.† 32 Kay patsapita joqariyämaptinmig † maytsay nación runakunata noqaman yärakayämänanpä qorikushä”.
33 Tsaynö nirmi Jesús tantiyatsirqan imanöpa wanunanpä kanqanta.
34 Runakunanami niyarqan: “Tayta Diospa palabranchömi nin salvamaqnintsik Cristo imayyaqpis kawananpä kanqanta.† Tsaynö nikaptinqa ¿imanirtä ninki Runapa Tsurin wanunanpä kanqanta? Tsaynö kaptinqa ¿pitä tsay Runapa Tsurin?”
35 Jesúsnami nirqan: “Wallka junaqllanami qamkunawan aktsi kanqa. Manarä tsakäpakur aktsi kanqanyaq puriyay. Tsakaypa purirqa maypa aywayanqaykitapis manami tantiyayankitsu.h † 36 Tsaynö kaykaptinqa aktsi qamkunawan kaykanqanyaq aktsiman criyiyay. Tsaynöpami qamkunapis aktsinö kayanki”.
Tsaynö niskir pakayllapa aywakuptinmi rikayarqannatsu.
Runakuna Jesúsman mana criyiyanqan
37 Atska milagrukunata ruranqanta rikarpis runakuna Jesúsman manami criyiyarqantsu. 38 Tsaynö mana criyiyänanpä kanqantami profëta Isaías nirqan:
“Tayta Dios, willakuyanqäta ¿pirä criyishqa?
Salvakuq kanqaykita musyatsiptikipis ¿pirä tantiyashqa?”†
39 Tsay ninqannöllami Jesúsmanpis criyiyarqantsu. Mastami Tayta Dios ninqanta Isaías nirqan:
40 “Tsay runakunapa ñawinkunatami qaprayätsishqa.i
Paykunapa shonqunkunatami chukruyätsishqa.
Tsaynöpami mana rikar y mana tantiyar cäsukuyanqatsu.
Tsaynö kayaptinmi noqapis alliyätsishätsu”.j †
41 Isaías Jesucristupä tsaynö qellqarqan gloriacho munayyuq kaykaqta rikarmi.†
42 Jesúsman wakin runakuna mana criyiyaptinpis atskaqmi payman criyiyarqan. Wakin Israel autoridäkunapis payman criyiyarqanmi. Tsaynö criyiykarpis sinagögapita fariseukuna qarquyänanta mantsarirmi willakuyarqantsu. 43 Tayta Diospita alli rikashqa kayänanpa trokinmi paykunaqa runakunallapita alli rikashqa kayta munayarqan.
Jesúsman criyiqkuna Tayta Diosmanpis criyiyanqan
44 Tsaypitanami jinchi Jesús nirqan: “Noqaman criyimuq kaqqa kachamaqnïmanpis criyiyanmi. 45 Tsaynöpis noqata reqimaq kaqqa kachamaqnïtapis reqiyanmi. 46 Noqami aktsi kä.k † Kay patsaman shamushqä noqaman criyimuqkuna tsakäpakushqanö mana kawayänanpämi.
47 “Manami runakunata condenaqtsu kay patsaman shamushqä, sinöqa runakunata salvanäpämi. Tsaynö kaykaptinqa ninqäkunata musyaykar mana cäsukuqkunata manami noqatsu condenashä, 48 sinöqa willakuynïkunami juiciu finalcho condenanqa. 49 Noqaqa manami kikïpa yarpaylläpitatsu willakuykä, tsaypa trokinqa kachamaqnï Taytä nimanqankunallatami. 50 Pay nimanqankunata cäsukuqkunaqa mana ushakaq kawaytami tariyanqa. Tsaymi Taytä nimanqannölla llapantapis willakuykä”.