2 nirqan: “Taqay markaman aywayay. Charmi pipis manarä muntakunqan malta ashnu wataraykaqta tariyanki. Tsay ashnuta paskaskir apayämuy. 3 Tsaycho pipis ‘¿imanirtä ashnuta paskaykäyanki?’ niyäshuptikiqa ‘Señor Jesúsmi ministin. Rasllami kutitsiyämushä’ niyanki”.

4 Discïpulunkuna aywarmi tariyarqan wayi punkucho malta ashnu wataraykaqta. Tsay wayiqa näni kuchunchömi karqan. Paskayaptinmi 5 tsaycho kaykaq runakuna tapuyarqan: “¿Imanirtä ashnuta paskaykäyanki?”

6 Tsaynö niyaptinmi Jesús yachatsinqannölla discïpulukuna niyarqan. Tsaynö niyaptin “tsay höraqa apayay ari” niyarqan.

7 Ashnuta chaykatsir punchunkunata karunaparkuyaptinmi Jesús muntakurqan. 8 Muntashqa aywaptinmi atskaq runakuna punchunkunata jakunkunata näniman mashtar Jesústa kushishqa chaskiyarqan. Wakinnami palmakunapa llimllankunata pakiskir näniman mashtayarqan. 9 Tsaymi puntanta y qepanta aywaqkuna kushikur niyarqan: “¡Hosana!^a ¡Tayta Diospa jutincho shamuq runa alabashqa kaykullätsun! 10 ¡Paymi unay castantsik Davidnö mandamaqnintsik rey kananpä shamuykan! ¡Ciëluchöpis alabashqa kaykullätsun!”

11 Jerusalénman yaykurnami templupa patiunman Jesús aywarqan. Tsaycho rikapakuskirmi tardina kaptin chunka ishkay discïpulunkunawan Betania markaman kutiyarqan.

12 Waraynin junaq Betaniapita Jerusalénman Jesús kutiykarmi mallaqaskirqan. 13 Tsaymi hïgus jachata raprayuqtana karupita rikaykur wayuyninta ashiq aywarqan. Ashirpis wayunanpä tiempun manarä kaptinmi raprallanta tarirqan. 14 Tsaymi nirqan: “¡Kananpitaqa manami imaypis wayunkinatsu!”

Tsaynö ninqantami discïpulunkuna wiyayarqan.

15 Jerusalénman chaykurnami templupa patiunman yaykuskir rantikuqkunata y rantipakuqkunatapis Jesús qarqurqan. Tsaynöllami qellay trukatsiqkunapa mësankunatapis^b y paluma rantikuqkunapa cajonninkunatapis wikapar usharqan. 16 Tsaynöllami runakunata micharqan templu patiupa imatapis mana päsatsiyänanpä. 17 Nirkurnami nirqan: “¿Manaku kaynö qellqaraykan: ‘Wayïqa maytsay nación runakuna mañakayämänanpämi kanqa’?^† Tsaynö nikaptinpis qamkunaqa suwakunapa machayninmanmi tikratsiyashqayki”.^†

18 Tsaynö ninqanta wiyarmi mandaq sacerdötikuna y ley yachatsikuqkuna willanakuyarqan imanöpapis Jesústa wanutsiyänanpä. Tsaynö kaptinpis Jesús yachatsinqanta runakuna kushishqa chaskiyaptinmi paykunata mantsar prësu tsariyarqantsu. 19 Tsakaykaptinnami Jerusalénpita yarqur Jesús aywakurqan.

20 Waraynin tuta Jerusalénman discïpulunkunawan Jesús kutirmi hïgus jacha pasaypa tsakishqana kaykaqta rikayarqan. 21 Jesús ninqanta yarpaskirmi Pedro nirqan: “Rabí, ‘manami wayunkinatsu’ ninqayki hïgus jachata rikay. Pasaypa tsakishqanami kaykan”.

22 Jesúsnami nirqan: “Tayta Diosman yärakuyay. 23 Rasunpaypami nï: Pipis llapan shonqunwan Tayta Diosman yärakur y ninqannö kananpä kanqanta criyirqa taqay jirkata ‘kaypita lamarman ayway’ niptinpis aywanqami.^† 24 Tayta Diosta mañakurqa chaskiyänaykipä kanqanta criyiyanki. Tsaynö criyirqa mañakuyanqaykita chaskiyankimi.

25 “Tsaynöpis Tayta Diosta mañakuyanqayki höra ajanätsishuqnikita manarä perdonashqa karqa juklla perdonayay. Tsaynö perdonayaptikiqa qamkunatapis ciëlucho kaykaq Taytayki perdonayäshunkimi.^† 26 [Runa mayikita mana perdonayaptikiqa qamkunatapis jutsa rurayanqaykita manami perdonayäshunkitsu]”.

27 Tsaypitanami discïpulunkunawan Jerusalénman Jesús charqan. Templupa patiuncho Jesús puriykaptinmi mandaq sacerdötikuna, ley yachatsikuqkuna y Israel mayor runakunapis 28 tapuyarqan: “Qamqa ¿pipa munayninwantä rantikuqkunata qarqushqayki? ¿Pitä tsaynö qarqunaykipä nishushqayki?”

29 Jesúsnami nirqan: “Qamkunatapis mä tapuyäshayki. Tapunqäta niyämaptikiqa noqapis willayäshaykimi pipa munayninwan qarqunqäta. 30 ¿Pitä Juanta kachamushqa bautizananpä? ¿Tayta Diosku o runakunallaku? Mä niyämay”.

31 Tsaynö tapuptinmi kikinkunapura niyarqan: “Tayta Dios kachamunqanta nishqaqa: ‘¿Imanirtä criyiyashqaykitsu?’ nimäshunmi. 32 Tsaynöpis manami nishwantsu runakuna kachayämunqanta”.

Juan profëta kanqanta llapan runakuna yarpäyaptinmi runakunapita mantsapakur tsaynö niyarqan.

33 Tsaymi Jesústa niyarqan: “Manami musyayätsu pï kachamunqantapis”.

Jesúsnami nirqan: “Noqapis manami willayäshaykitsu pipa munayninwan rantikuqkunata qarqunqäta”.