Muchuq viüda ofrendata churanqan
21
Tsaypitanami Jesús rikaskirqan templucho ofrenda wiñakuyänan babulman imaykayuq runakuna ofrendata wiñaykäyaqta. 2 Tsaynöllami rikarqan juk muchuq viüdapis ishkay centävullata wiñaykaqta. 3 Tsaymi Jesús nirqan: “Rasunpaypami nï: Kay muchuq viüdaqa llapanpitapis mas atskatami wiñashqa. 4 Wakinkunaqa sobraq kaqllantami wiñayashqa. Kay viüdami itsanqa tsaylla rantipakunanpä kaykaptinpis llapanta wiñashqa”.
Ofrenda de una Viuda
Templuta juchutsiyänanpä kanqanta Jesús willanqan
5 Templu pirqaraq rumikuna kuyayllapä kanqanta y templu shumaq adornashqa kanqanta parlayaptinmi Jesús nirqan: 6 “Kay llapan rikayanqaykita chipyaqmi juchutsiyanqa. Manami ni juk rumillapis pirqaraykar quëdanqatsu”.
Manarä kutimuptin imanö kananpä Jesús ninqan
7 Jesústanami tapuyarqan: “Rabí, ¿imaytä ninqaykinö kanqa? Tsaynö kananpä ¿ima señaltä kanqa?”
8 Jesúsnami nirqan: “Paqtä pipis engañayäshunkiman. Atskaqmi jutïcho shamur niyanqa: ‘Noqami Cristo kä’ nir y ‘kay patsa ushakanqanami’ nir. Tsaynö niyäshuptikipis ama criyiyankitsu. 9 Guërra kanqanta y wanutsinakuy kanqanta musyarpis ama mantsariyaytsu. Puntataqa tsaykunarämi kanqa. Tsaynö kaptinpis kay patsaqa manarämi ushakanqarätsu”.
10 Mastami Jesús nirqan: “Juk nacionmi juk nacionwan guërrata rurayanqa y juk marka runakunami juk marka runakunawan wanutsinakuyanqa. 11 Patsapis pasaypami kuyunqa. Mallaqaypis y pestipis maytsaychömi kanqa. Ciëluchöpis mantsariypä señalkunami rikakämunqa.
12 “Tsaykuna manarä kaptinmi qatikachar prësu tsariyäshunki. Sinagögakunaman apaykurmi juzgar carcelmanpis wichqatsiyäshunki. Noqa raykuqmi reykunamanpis y gobernadorkunamanpis prësu apayäshunki. 13 Tsaynöpami willakuynïta paykunatapis willayanki. 14 Tsaycho imata parlayänaykipäpis ama yarpachakuyaytsu. 15 Noqami imata parlayänaykipäpis tantiyatsiyäshayki. Tsaymi chikiyäshuqnikikuna ima niytapis kamäpakuyanqatsu.
16 “Qamkunapa contraykikunami shäriyanqa mamayki, taytayki, wawqikikuna, castaykikuna y amïguykikunapis. Wakinnikikunataqa wanutsiyäshunkimi. 17 Noqa raykuqmi pïmaypis chikiyäshunki. 18 Tsaynö kaptinpis Tayta Dios manami kachariyäshunkitsu. Manami ni juk aqtsaykikunallapis oqrakanqatsu. 19 Imanö ñakarpis noqaman yärakamurmi salvashqa kayanki.
20 “Soldädukuna Jerusalénta jiruruparaykaqta rikarmi ushakänanpäna kanqanta musyayanki. 21 Tsaynö kaykaqta rikar Judea markakunacho taqkuna jirkakunapa qeshpir aywakuyätsun. Jerusaléncho taqkunapis qeshpir aywakuyätsun. Chakrakunacho kaykaqkunapis markaman ama kutiyätsuntsu. 22 Tsay junaqkuna pasaypa castïgu kaptinmi Tayta Diospa palabrancho ninqankuna llapan cumplinqa.
23 “¡Ay imanörä ñakayanqa qeshyaq warmikuna y llullu wamrayuq warmikuna! Maytsaychöpis Israel runakunata Tayta Dios castigaptinmi pasaypa ñakayanqa. 24 Wakintami espädawan wanutsiyanqa y wakintanami maytsay nacionkunapa prësu apayanqa. Tayta Diosta mana cäsukuq runakunami Jerusalénta munaynincho tsararäyanqa hasta Tayta Dios ninqan tiempu chämunqanyaq.
Jesucristo kay patsaman kutimunanpä kanqan
25 “Rupaypis, killapis y qoyllurkunapis mantsaypämi rikakuyanqa. Kay patsacho lamar bunyaypa bunyar pulchaqyaptinmi runakuna mantsariywan ni ima ruraytapis kamäpakuyanqatsu. 26 Ciëlupis tsuktsukyaptinmi kay patsata imapis päsananpä kanqanta yarpar runakuna pasaypa mantsariywan pitiyanqarä. 27 Tsaypitanami runakuna rikayanqa Runapa Tsurin pukutay janancho chipipiykar pasaypa munayyuq shamuykaqta.† 28 Tsay ninqänö llapanpis qallaptinmi valorta tsarirnin kushikuyanki. Tsaykunata rikarmi musyayanki ñakaykunapita Tayta Dios salvayäshunaykipä kanqanta”.
29 Tsaynöllami tinkutsiypa yachatsir Jesús nirqan: “Hïgus jachata y wakin jachatapis rikar tantiyayay. 30 Raprankuna sheqllimuqta rikarmi usya tiempu qallananpäna kanqanta musyayanki. 31 Tsaynöllami ninqänö päsanqanta rikar musyayanki Tayta Diospa mandakuynin cercachöna kanqanta. 32 Rasunpaypami nï: Kanan tiempu runakuna manarä ushakaptinmi llapan ninqäkuna cumplinqa. 33 Ciëlu y kay patsa ushakaptinpis noqa ninqäkunaqa manami ushakanqatsu.
34 “Paqtä tsay junaq illaqpita shamur tariyäshunkiman jutsata ruraykaqta, machashqata y imaykayuqpis kayänaykipä yarpachakur chukru shonqu kaykaqta. 35 Imayka trampanömi kay patsacho llapan runakunatapis tsay junaq illaqpita tsarinqa. 36 Tsaynö kananpä kaykaptinqa Tayta Diosman imaypis mañakur kamarikushqa kaykäyay. Tsaynöpami shamunanpä kaq ñakaykunapita qeshpir Runapa Tsurinpa ñöpancho kushishqa kayanki”.