Templuta juchutsiyänanpä kanqanta Jesús willanqan
13
Templupa patiunpita yarquykaptinmi juk discïpulun Jesústa nirqan: “¡Rabí, rikay! ¡Kuyayllapä jatusaq rumikunawanmi templuta y ñöpancho kaq wayikunatapis shäritsiyashqa!”
Marcos 13.1-27
2 Jesúsnami nirqan: “Kay llapan rikayanqaykita chipyaqmi juchutsiyanqa. Manami ni juk rumillapis pirqaraykar quëdanqatsu”.
Manarä kutimuptin imanö kananpä Jesús ninqan
3 Templu tsimpan Olivos jirkancho kikillankuna jamaykäyanqanchömi Pedro, Santiago, Juan y Andrés Jesústa tapuyarqan: 4 “Taytay, willaykayämay. ¿Imaytä ninqaykinö kanqa? Tsaynö kananpä ¿ima señaltä kanqa?”
5 Jesúsnami nirqan: “Paqtä pipis engañayäshunkiman. 6 Atskaqmi jutïcho shamur niyanqa ‘noqami Cristo kaykä’ nir. Tsaynö nirmi atskaq runakunata engañayanqa. 7 Guërra kaptinpis y guërra kananpä kanqanta musyarpis ama mantsariyaytsu. Puntataqa tsaykunarämi kanqa. Tsaynö kaptinpis kay patsaqa manarämi ushakanqarätsu. 8 Juk nacionmi juk nacionwan guërrata rurayanqa y juk marka runakunami juk marka runakunawan wanutsinakuyanqa. Tsaynöllami maytsaychöpis terremötu kanqa. Muchuypis pasaypami kanqa. Tsay ñakaykunaqa qallaykunanllarämi kanqa.
9 “Alcäbu kayanki. Chikiyäshurnikimi prësu tsariykur autoridäkunaman apayäshunki. Sinagögakunachöpis asutatsiyäshunkimi. Noqa raykuqmi gobernadorkunamanpis y reykunamanpis prësu apayäshunki. Tsaynöpami willakuynïta paykunatapis willayanki. 10 Manarä kay patsa ushakaptinmi maytsay nacionchöpis noqapä willakuyanqa.
11 “Autoridäkunaman apayäshuptiki llakikur ama niyankitsu ‘¿imatarä nishä?’ Tsay hörami imata parlayänaykipäpis Espíritu Santu tantiyatsiyäshunki. Manami kikikikuna yarpäyanqaykitatsu parlayanki, sinöqa Espíritu Santu tantiyatsiyäshunqaykitami.† 12 Noqa raykuqmi wawqintapis, tsurintapis y taytantapis wanutsiyänanpä autoridäkunaman entregayanqa. 13 Noqa raykuqmi pïmaypis chikiyäshunki. Tsaynö chikiyäshuptikipis wanuyanqaykiyaq yärakurqa salvashqami kayanki.†
Ñakaykuna kananpä kanqanta Jesús tantiyatsinqan
14 “[Profëta Daniel qellqanqannöllami] Tayta Dios mana munanqanta templucho rikayanki.† (Kay qellqanqäta liyiqkunaqa shumaq tantiyakuyätsun.)a Tsaynö kaykaqta rikar Judea markakunacho taqkuna jirkakunapa qeshpir aywakuyätsun. 15 Wayi janancho kaykaqkunab imankunatapis mana jipiypa aywakuyätsun. 16 Chakracho kaykaqkunapis ni punchun jipiqpis ama kutiyätsuntsu.† 17 ¡Ay imanörä ñakayanqa qeshyaq warmikuna y llullu wamrayuq warmikuna! 18 Tayta Diosta mañakuyay qeshpiyanqayki junaq tamya killacho mana kananpä.
19 “Tsay witsanqa runakuna pasaypami ñakayanqa. Tayta Dios kay patsata kamanqanpita patsa manami imaypis tsaynöqa ñakayashqatsu. Tsaynöpis yapayqa mananami imaypis tsaynö ñakayanqanatsu.† 20 Akranqan runakunata kuyaparmi Tayta Dios tsay ñakay junaqkunata päsatsinqa. Mana päsatsiptinqa llapanpis wanurmi ushakäyanqa.
21 “ ‘Tayta Dios kachamunqan Cristo kaychömi kaykan’ niyäshuptikipis ama criyiyankitsu. ‘Washachömi kaykan’ niyäshuptikipis ama cäsuyankitsu. 22 Tsay witsanmi Cristo tukuqkuna y llulla profëtakunapis yuriyämunqa. Runakunata criyitsiyänan raykuqmi mantsakaypä milagrukunatapis rurayanqa. Tsaynö rurarmi Tayta Dios akranqan runakunatapis engañayta munayanqa. 23 Paykunata mana criyiyänaykipä shumaq tantiyakuyay. Manarä tsaynö kaptinmi musyayänaykipä willaykä”.
Jesús kay patsaman kutimunanpä kanqan
24 “Pasaypa ñakaykuna päsaskiptinnami rupaypis tsakaskinqa, killapis atsikyanqanatsu, 25 qoyllurkunapis shushuyämunqa y ciëlupis tsuktsukyanqa.† 26 Tsaypitanami runakuna rikayanqa Runapa Tsurin pukutay janancho chipipiykar pasaypa munayyuq shamuykaqta.† 27 Tsaypitanami angelninkunata kachamunqa akranqan kaqkunata maytsaypitapis qoriyämunanpä.
28 “Hïgus jachata rikar tantiyayay. Raprankuna sheqllimuptinmi usya tiempu qallananpäna kanqanta musyayanki.
Marcos 13.28-37
29 Tsaynöllami ninqänö päsanqanta rikar musyayanki Runapa Tsurin kutimunanpäna kanqanta. 30 Rasunpaypami nï: Kanan tiempu runakuna manarä ushakaptinmi llapan ninqäkuna cumplinqa. 31 Ciëlu y kay patsa ushakaptinpis noqa ninqäkunaqa manami ushakanqatsu.
32 “Runapa Tsurin imay junaq imay höra kutimunanpä kanqanta manami ciëlucho kaykaq angelkunapis ni Diospa Tsurinpis ni pï runapis musyayantsu.† Tsaytaqa Taytallämi musyan. 33 ¡Maya mayalla kaykäyay! [Tayta Diosta mañakuyay.] Manami musyayankitsu imay kutimunanpä kanqanta”.
34 “Shumaq tantiyakuyay. Juk runashi wayinta rikayänanpä wätayninkunata kachapaykur karupa aywakunä. Punku kichapaqnintanashi yätsinä maya mayalla kaykänanpä.† 35 Tsaymi kamarikushqallana kayänayki. Wayiyuqc imay kutimunanpä kanqantapis manami musyayankitsu. Patsa tsakanqan höra, pullan paqas höra, wallpa waqay höra o patsa wäraytsurä chämunqa. 36 Mana yarpashqata chämurtä punukashqa kaykaqta tariyäshunkiman. 37 Manami qamkunallatatsu nï, sinöqa llapan runakunatami. Tsaynö willaykaptïqa maya mayalla kaykäyay”.