Bautizaq Juanta Herodes wanutsinqan
14
Tsay witsanmi Galileapa mandaqnin Herodes musyarqan Jesúspä pïmaypis parlayanqanta. 2 Tsaymi yanapaqninkunata Herodes nirqan: “Tsay runaqa Bautizaq Juanmi kawarimushqa kanqa. Tsaymi milagrukunata rurananpä munayyuq kaykan”.3 Ñöpatami Juanta Herodes prësu tsariskatsir cadënawan watarkur carcelman wichqatsishqa karqan. Tsaynö rurarqan Herodías jutiyuq warmi mañakuptinmi. Herodíasqa Herodespa wawqin Felipipa warminmi karqan. 4 Herodes warmintanö Herodíasta katsiptinmi Juan nirqan: “Wawqikipa warminwan kakur jutsatami ruraykanki”.†
5 Tsaynö niptinmi Herodesqa Juanta wanutsiyta munarqan. Tsaynö kaptinpis profëta kanqanta llapan runakuna niyaptinmi mantsarirqan.
6 Tsaypitanami Herodespa santuncho Herodíaspa jipash wawan llapan inkitanqankunapa ñöpancho shumaq tushurqan. Tsayta rikarmi Herodes pasaypa kushikur 7 Tayta Diospa jutincho jurar tsay jipashta promitir nirqan: “Imatapis mañakamanqaykitami qarashayki”.
8 Tsaynö niptinmi maman yätsinqannölla Herodesta jipash nirqan: “Bautizaq Juanpa umanta juk plätucho qaramay”.
9 Tsayta mañaptinmi rey Herodes pasaypa llakikurqan. Tsaynö kaptinpis inkitanqankunapa ñöpancho jurashqa karmi mañakunqanta qarayänanpä wardiakunata nirqan. 10 Wardiakunanami Juanpa umanta carcelcho roquskir 11 juk plätucho apamur jipashta entregayarqan. Y jipashnami mamanta entregarqan.
12 Tsaynö rurayanqanta musyaskirnami Juanpa discïpulunkuna ayanta qoriskir pampayarqan. Tsaypitanami Jesúsman aywaykur Juanta wanutsiyanqanta willayarqan.
Pitsqa waranqa runakuna mikuyänanpä milagruta Jesús ruranqan
13 Tsayta musyaskirnami büquiman yarkurkur tsunyaqman Jesús kikillan aywarqan. Aywanqanta musyaykurnami Jesústa tariyanqanyaq runakuna markakunapita chakillapa aywayarqan. 14 Büquipita yarpuskirnami atskaq runakuna shuyaykäyaqta Jesús tarirqan. Kuyaparninmi qeshyaykaqkunata alliyätsirqan.
15 Tardiyaptinnami discïpulunkuna Jesúsman witiykur niyarqan: “Tsunyaqchömi kaykantsik. Patsapis tardiyaykannami. Runakunata niy markakunapa aywar mikuyninkuna rantiyänanpä”.
16 Jesúsnami nirqan: “Manami mikuy ashiq aywayanmantsu. Qamkuna mikuyninkuna qarayay”.
17 Discïpulunkunanami niyarqan: “Pitsqa tantawan ishkay pescädulläkunami kapayäman”.
18 Jesúsnami nirqan: “Tsayllatapis apayämuy”.
19 Nirkurmi runakunata Jesús nirqan pampaman jamakuyänanpä. Pitsqa tantatawan ishkay pescäduta aptarkurmi ciëluman ñukirkur Tayta Diosta Jesús agradëcikurqan. Tantata pakirirnami discïpulunkunata makyarqan runakunata qarayänanpä. 20 Pacha junta mikuskiyaptinnami katuyanqankunata chunka ishkay canasta juntata qoriyarqan. 21 Tsaycho mikuqkunaqa pitsqa waranqanömi (5,000) kayarqan. Warmikunata y wamrakunataqa manami yupayarqantsu.
Yaku jananpa Jesús aywanqan
22 Tsaypitanami discïpulunkunata Jesús nirqan büquiman yarkurkur wak tsimpaman puntayänanpä. Aywakuyaptinnami tsaycho kaykaq runakunata despachaskir 23 Tayta Diosta mañakunanpä jirkaman kikillan witsarqan. Tsaychömi patsa tsakanqanyaq mañakurqan. 24 Tsayyaqmi discïpulunkunaqa qocha chawpintana büquiwan aywaykäyarqan. Pasaypa wayraptin y yaku pulchaqyaptinmi alläpa ñakayarqan.
25 Patsa waraykaptinnami discïpulunkuna kaqman yaku jananpa Jesús aywaykarqan. 26 Tsayta rikaykurmi discïpulunkuna pasaypa mantsakar niyarqan: “¡Achachay! ¡Almachä shamuykan!”
27 Tsaymi Jesús nirqan: “¡Kallpata tsariyay! ¡Noqami kaykä! ¡Ama mantsayämaytsu!”
28 Tsaynami Pedro nirqan: “Taytay, rasunpaypa qam karqa noqapis yaku jananpa shamunäpä kamakaykatsillay”.
29 Jesúsnami nirqan: “Shamuy”.
Tsaymi büquipita yarquskir yaku jananpa Jesús kaqman aywar qallaykurqan. 30 Alläpa wayraptinnami mantsakaywan jundikarnin qayarar nirqan: “¡Taytay, salvaykallämay!”
31 Tsaymi jinan höra makinpita tsarirkur Jesús nirqan: “Yärakuyniynaq janan shonqu runa, ¿imanirtä yärakamankitsu?”
32 Büquiman yarkuskiyaptinnami wayrapis wiyaskirqan. 33 Tsayta rikaykurmi büquicho kaykaqkuna qonqurikuykur niyarqan: “¡Taytay, rasunpaypami Tayta Diospa Tsurin kaykanki!”
Genesaretcho qeshyaykaqkunata Jesús alliyätsinqan
34 Qochata tsimpaskirnami Genesaret pampaman chäyarqan. 35 Tsaycho runakuna Jesústa reqiskirmi maytsaypa willakatsiyarqan. Tsaymi llapan qeshyaykaqkunata alliyätsinanpä apapäyarqan. 36 Chaykatsirmi Jesústa rugakuyarqan latsapanpa kuchullantapis qeshyaqkuna yataykuyänanpä. Tsaychömi llapanpis yataq kaqkunaqa alliyäyarqan.