4 Tsaymi paykuna chaykur Jesústa rugakur niyarqan: “Taytay, capitanpa wätaynintashi alliyaykatsinki. Capitanqa alli runa karmi 5 marka mayintsikkunatapis alli rikan. Paymi sinagögatapis shäritsishqa”.

6 Tsaynö rugakuyaptinmi paykunawan Jesús aywarqan. Wayiman chaykaptinnami amïgunkunata capitán kacharqan Jesústa niyänanpä: “Taytay, amanashi afanakunkinatsu. Mana Israel runa kaptinshi wayinmanpis yaykunkimantsu. 7 Tsayshi kikinqa shamushqatsu. Wätaynin alliyänanpä kayllapitashi niykunki. 8 Paypis mandaqninpa munayninchöshi kaykan. Tsaynöshi paypa munaynincho soldädunkunapis kaykäyan. Tsayshi mayqantapis ‘ayway’ niptin aywayan, ‘shamuy’ niptin shayämun y wätayninta ‘kayta ruray’ niptinpis ruran”.

9 Tsayta wiyaykurmi Jesús kushikur paywan aywaykaq runakunata nirqan: “Noqami nï: Paynö yärakamaq runataqa Israel runakunachöpis manami tarishqätsu”.

10 Capitán kachanqan runakuna kutiykurnami wätay alliyashqana kaykaqta tariyarqan.

11 Tsaypitanami discïpulunkunawan Jesús aywayarqan Naín markaman. Paykunawanmi atska runakunapis aywayarqan. 12 Markaman chaykarnami Jesús tinkurqan atska runakuna ayata apaykaqwan. Tsay ayaqa viüdapa japayllan ollqu wawanmi karqan. 13 Viüda waqaykaqta rikarmi kuyapar Jesús nirqan: “Ama waqaytsu”.

14 Tsaynö nir kirmata yataykuptinmi aya apaqkuna ichiskiyarqan. Jesúsnami nirqan: “¡Chölu, shäriy!”

15 Tsaynö niskiptinmi kawaskamur parlar qallaykurqan. Viüdatanami wawan kawarimushqatana entregarqan. 16 Tsayta rikaykurmi llapan runakuna kushikurnin Tayta Diosta alabar niyarqan: “¡Munayyuq profëtami noqantsikman chämushqa! ¡Tayta Diosmi kuyanqan runakunaman shamushqa!”

17 Tsaymi entëru Judeacho y ñöpan markakunacho Jesús ruranqankunata musyayarqan.

18 Jesús ruranqankunata musyaykurmi Bautizaq Juanta discïpulunkuna willayarqan. Tsaymi ishkay discïpulunkunata qayaskir 19 Señor Jesústa tapuyämunanpä kachar nirqan: “¿Qamkush kaykanki Tayta Dios kachamunqan Cristo o juktaräkush shuyakuyäshä?”

20 Jesúsman chaykurnami niyarqan: “Taytay, Bautizaq Juanmi musyayta munaykan. ¿Qamkush kaykanki shamunanpä kaq Cristo o juktaräkush shuyakuyäshä?”

21 Tapuq chäyanqan hörami Jesús alliyaykätsirqan atskaq qeshyaykaqkunata, ñakaqkunata, supay ñakatsinqankunata y atskaq qaprakunatapis.

22 Tsaymi Jesús nirqan: “Kutiykur rikayanqaykikunata y wiyayanqaykikunata Juanta willayay. Qaprakunapis rikayannami. Puriyta mana puëdiqkunapis puriyannami. Leprawan qeshyaqkunapis alliyäyashqanami. Mana wiyaqkunapis wiyayannami. Wanushqakunapis kawariyämushqanami. Muchuqkunapis Tayta Diospa alli willakuyninta wiyaykäyannami. 23 Yarpäyanqannö mana ruraptïpis mana ajayaypa noqaman yärakamuq runaqa kushishqami kawanqa”.

24 Juanpa discïpulunkuna kutiskiyaptinnami runakunata Jesús nirqan: “¿Ima rikaqtä tsunyaqman aywayarqayki? ¿Shoqushta wayra kuyutsiqta rikaqku? 25 Manatsayqa ¿ima rikaqtä aywayarqayki? ¿Alli latsapashqa runata rikaqku? Musyayanqaykinöpis alli latsapashqa runakunaqa reypa wayinchömi kaykäyan. 26 Tsaynö kaptinqa ¿ima rikaqtä aywayarqayki? ¿Profëta rikaqku? ¡Awmi! Noqami nï: Paynöqa manami mayqan profëtapis kashqatsu. 27 Juanta kachamunanpämi kaynö qellqaraykan: ‘Nänita pitsaqnö runakuna kamarikuyänanpämi willakuqnïta puntaykita kachashä’.^†

28 “Noqami nï: Llapan profëtakunapitapis Bautizaq Juanqa mas tantiyakuqmi. Tsaynö kaptinpis Tayta Diospa mandakuyninman tsayrä yaykuqkunami Juanpitapis mas tantiyayan”.

29 (Juan willakunqanta wiyaykurmi impuestu cobraqkunapis Tayta Diosta cäsukur Juan bautizananpä aywayarqan. 30 Fariseukunawan ley yachatsikuqkunami itsanqa Diosta mana cäsukur bautizakuyarqantsu.)

31 Mastami Jesús nirqan: “Kanan tiempu runakunata ¿imamanrä tinkutsïman? ¿Imanötä kayan? 32 Paykunaqa pläzacho pukllaq wamrakunanöllami kaykäyan. Tsay wamrakunami jinchi niyan: ‘Pinkulluta tukayaptïpis manami tushuyankitsu. Llakinaypa cantayaptïpis manami waqayankitsu’. Tsay wamrakunanöllami kanan tiempu runakunapis kayan. 33 Bautizaq Juan tantata mana mikuptin y vïnuta mana upuptinmi nikäyanki: ‘¡Payqa supaypa munayninchömi kaykan!’ 34 Runapa Tsurin mikuptin y upuptinmi nikäyanki: ‘¡Kay runaqa mikullar upullarmi purin! ¡Impuestu cobraqkunawan y jutsasapakunawanmi purinpis!’ 35 Tsaynö niyaptikipis discïpulükuna Tayta Dios munanqannö kawayaptinmi Juanta y noqata Tayta Dios kachayämanqan musyakan”.

36 Tsaypitanami juk fariseo runa Jesústa pusharqan wayincho mikuyänanpä. Chaykurnami mësaman Jesús jamaykurqan. 37 Fariseupa wayincho Jesús mikuykanqanta musyaykurmi prostitüta warmi alabastro rumipita rurashqa pömucho perfümin aptashqa charqan. 38 Jesúspa qepanman qonqurikuykur waqaptinmi chakinman weqin juturqan. Tsay jutunqantanami aqtsanwan pitsaskir Jesúspa chakinta mutsaykur apanqan perfümita wiñaparqan.^a

39 Tsayta rikaykurmi Jesústa pushaq fariseo shonqullancho nirqan: “Kay runa Diospa profëtan karqa kay yataqnin warmi jutsasapa kanqanta musyanmanmi”.

40 Tsaynami Jesús nirqan: “Simón, jukta willashayki”.

Paynami nirqan: “Mä willamay, rabí”.

41 Jesúsnami nirqan: “Ishkaq runakunashi juk runapa jaqan kayänä. Jukninshi pitsqa pachak (500) junaq arur gänanqannö jaqan kanä. Jukaqnashi pitsqa chunka (50) junaq arur gänanqannö jaqan kanä. 42 Imanöpapis pägayta mana kamäpakuyaptinshi ishkantapis cobranänatsu. Kanan mä nimay. ¿Mayqan kaqtä tsay qellayyuq runata mas kuyanqa?”

43 Simónnami nirqan: “Mas atska jaqan kaqmi”.

Niptinnami Jesús nirqan: “Allimi tantiyashqayki”.

44 Tsaynö niskirnami warmita rikaskir Simónta nirqan: “Kay warmi ruranqanta ¿rikashqaykiku? Wayikiman yaykamuptï manami yakuta qaramashqaykitsu chakïta awinäpä. Kay warmimi itsanqa weqinwan chakïta oquskatsir aqtsanwan tsakitsishqa. 45 Qamqa manami winchikamar mutsamashqaykitsu. Paymi itsanqa wayikiman yaykamunqanpita patsa mana kachaypa chakïta mutsashqa. 46 Umämanpis manami aceitita wiñapämashqaykitsu. Paymi itsanqa chakïman perfümita wiñapämashqa. 47 Tsaymi nï: Kay warmiqa atska jutsankunata perdonaptïmi pasaypa kuyamar tsaynö rurashqa. Wakinkunami itsanqa jutsaynaq kayanqanta yarpar janan shonqulla kuyayäman”.

48 Warmitanami nirqan: “Llapan jutsaykitami perdonä”.

49 Tsaynami mësacho jamaraykaq runakuna kikinkunapura ninakuyarqan: “¡Pitä payqa jutsa ruraqkunata perdonananpä!”

50 Jesúsnami warmita nirqan: “Noqaman yärakamunqaykipitami salvakushqayki. Kananqa kushishqana aywakuy”.