Jesústa yanapaq warmikuna
8
Tsaypitanami chunka ishkay discïpulunkunawan markan markan Jesús purir Tayta Diospa mandakuyninpa alli willakuyninta willakurqan. 2 Paykunawanmi aywayarqan supaypa munayninpita jipinqan warmikuna y qeshyankunapita alliyätsinqan warmikuna. Tsaynöpis aywarqan Magdalena niyanqan María. Paypitami qanchis supaykunata Jesús qarqurqan. 3 Tsaynöpis aywayarqan Herodespa yanapaqnin Chuzapa warmin Juana, Susana y wakin warmikunapis. Paykunami Jesústa y discïpulunkunata imallankunawanpis yanapayarqan.
Mujeres Discípulos
Diospa willakuyninta muruman Jesús tinkutsinqan
4 Maytsay markakunapita atskaq runakuna qorikäyaptinmi Jesús yachatsir nirqan: 5 “Juk runashi trïgu muruq aywanä. Muruta mashtaptinshi näniman wakin chänä. Tsayshi runakuna jaruyänä y pishqukunapis upshaskiyänä. 6 Wakin murunashi shaqaman chänä. Tsaycho jeqamurpis allpa mana kaptinshi tsakinä. 7 Wakin kaq murushi kashakuna rurinman chänä. Jeqamurpis kashakuna ñitiptinshi qarwashtaykällar ushakänä. 8 Wakin murunashi alli allpaman chänä. Tsaykunaqa jeqaskamurshi cada espïgacho juk pachak (100) trïguta wayunä”.
Tsaynö yachaskatsirmi Jesús jinchi nirqan: “¡Rinriyuq kaqkunaqa ninqäkunata wiyakuyätsun!”
Tinkutsiypa imanir Jesús yachatsinqan
9 Tsaynami discïpulunkuna Jesústa tapuyarqan: “Taytay, ¿ima ninantä tsay tinkutsiypa yachatsinqayki?”
10 Jesúsnami nirqan: “Qamkunataqa Tayta Diospa mandakuynin imanö kanqantapis shumaqmi tantiyatsiyäshayki. Wakinkunatami itsanqa imamanpis tinkutsiypa willaykä. Tsaymi rikarpis cuentata qokuyantsu y wiyaykarpis tantiyayantsu”.†
Muruman tinkutsinqanta Jesús tantiyatsinqan
11 “Tinkutsiypa yachatsinqäta kanan tantiyatsiyäshayki. Muruqa Tayta Diospa willakuyninmi.
12 “Wakin runakunaqa chukru näninömi kayan. Tayta Diospa willakuyninta wiyayaptinpis diablu shamurmi wiyayanqallantapis qonqaskatsin. Tsaymi mana criyirnin salvacionta tariyantsu.
13 “Wakin runakunaqa shaqa chakranömi kayan. Tsaymi Tayta Diospa willakuyninta wiyar kushishqa chaskikurpis michïkuyta mana kamäpakuq jachanö kar ñakaykunaman char punta kayanqallanman kutiyan.
14 “Wakin runakunaqa kasha chakranömi kayan. Paykunaqa Tayta Diospa willakuyninta wiyarpis yarpachakuyan waray warantinkuna imanöpis kawayänanpä, imaykayuqpis kayänanpä y kikinkuna munayanqannö kawayänanpä kanqallantami. Tsaynö karmi mana wayuq trïgunö kayan.
15 “Wakin runakunami itsanqa alli allpanö kayan. Tsaymi Tayta Diospa willakuyninta llapan shonqunwan cäsukur Tayta Dios munanqannö kawayan. Alli allpacho muru wiñamur alli wayunqannömi imaypis kawayan”.
La Parábola del Sembrador y la Semilla
Willakuyninta aktsiman Jesús tinkutsinqan
16 “Manami pipis aktsita tsarirkatsir manka rurinman ni catri jawanman churantsu, tsaypa trokinqa wayiman yaykuqkuna rikayänanpä rikananmanmi churan.† 17 Tsaynömi yachatsinqäkuna kanan pakaraykaqnö karpis musyakanqa. Kanan mana tantiyakarpis waraykunaqa tantiyakanqami.† 18 Tsaynö kaykaptinqa shumaq wiyayämay. Yachatsinqäta cäsukuqkunaqa masmi tantiyayanqa. Mana cäsukuqkunami itsanqa ichik tantiyayanqallantapis qonqaskiyanqa”.†
Parábola de la Lámpara
Jesúspa maman y wawqinkuna pï kayanqanpis
19 Tsaypitanami Jesúspa mamanwan wawqinkuna chäyarqan Jesús kaykanqan wayiman. Atska runakuna kayaptinmi yaykuyta kamäpakuyarqantsu. 20 Tsaymi Jesústa juk runa willar nirqan: “Mamaykiwan wawqikikunami waqtacho shuyaykäyäshunki”.
21 Jesúsnami nirqan: “Pipis Tayta Diospa willakuyninta wiyar cäsukuq kaqmi mamä wawqï kayan”.
Wayrawan qocha pulchaqyaqta Jesús wiyätsinqan
22 Juk junaqmi discïpulunkunawan büquiman yarkurkur Jesús nirqan: “Wak tsimpaman tsimpashun”.
Niptinmi büquiwan aywayarqan. 23 Qochata tsimpaykaptinmi Jesús punukaskirqan. Tsayyaqmi pasaypa wayrawan yaku pulchaqyar büquita jundikätsinanpäna kaykarqan. 24 Tsaynami Jesústa rikchatsir niyarqan: “¡Rabí, rabí! ¡Jundikaykantsiknachä!”
Jesús rikchaskirnami wayratawan yakuta ollqutuparqan. Ollqutupaskiptinmi wayrawan yakupis wiyakaskirqan. 25 Discïpulunkunatanami nirqan: “¿Imanirtä yärakuynikikuna kantsu?”
Tsaymi kikinkunapura mantsakashqa ninakuyarqan: “Yakupis wayrapis tsaynö cäsunanpäqa ¡pinatä kay runaqa!”
Jesús Calma la Tormenta
Supaykuna löcuyätsiyanqan runata Jesús alliyätsinqan
26 Tsaypitanami Gerasaa niyanqan partiman chäyarqan. Tsayqa kaykan Galileapa wak tsimpanchömi. 27 Büquipita Jesús yarpuriptinnami supaykuna löcuyätsiyanqan runa shamurqan. Tsay runaqa unaypita patsami qallapächulla puriq. Wayicho tänanpa trokinmi panteonllacho tarqan. 28 Jesústa rikaykurmi pasaypa qayarar ñöpanman lätakaykur jinchi nirqan: “¡Munayyuq Diospa Tsurin Jesús! ¡Imatatä noqawan munanki! ¡Ama ñakatsillämaytsu!”
29 (Tsaynö supay nirqan runapita yarqunanpä Jesús nishqa kaptinmi. Tsay runataqa atska kutimi munanqanta supay ruratsirqan. Tsaymi makinta chakinta cadënawan watayaptinpis rachiskir tsunyaq jirkakunapa aywakuq.)
30 Tsaypitanami Jesús tapurqan: “¿Imatä jutiki?” nir.
Paynami nirqan: “Legión”.b
(Tsaynö nirqan atska supaykuna payman yaykushqa kayaptinmi.)
31 Tsay supaykunami Jesústa kutin kutin rugakuyarqan yanaykaq tsakayman mana qarpunanpä. 32 Washalänin jirkanchömi atska kuchikunata mitsiykäyarqan. Tsaymi supaykuna Jesústa rugakuyarqan kuchikunaman yaykuyänanpä. Rugakuyanqanta Jesús awniptinmi 33 supaykuna runapita yarquskir tsay kuchikunaman yaykuyarqan. Tsaymi kuchikuna löcuyar tunapa cörrir qochaman jeqarpuyarqan. Tsaychömi shenqaypa wanuyarqan.
34 Tsayta rikaykurmi kuchi mitsiqkuna cörrilla aywar markacho taq y cercancho taq runakunata willayarqan. 35 Willakuyaptinnami ima päsanqantapis rikayänanpä runakuna shayämurqan. Jesús kaqman chaykurnami supay löcuyätsinqan runata tariyarqan latsapan jatishqa y juiciunchöna Jesúspa ñöpancho jamaraykaqta. Tsayta rikaykurmi pasaypa mantsakäyarqan.
36 Jesús alliyätsinqanta rikaqkunanami tsayman chaqkunata willayarqan imanöpa kachakanqantapis. 37 Tsaymi tsay particho taq runakuna pasaypa mantsariywan Jesústa rugayarqan tsaypita aywakunanpä. Tsaynö rugayaptinmi büquiman yarkuskir discïpulunkunawan Jesús aywakurqan.
38 Manarä aywakuyaptinmi alliyätsinqan runa Jesústa rugarqan paywan aywakunanpä. Tsaymi Jesús nirqan: 39 “Wayikipa kutir Tayta Dios kachakätsishunqaykita willakuy”.
Tsaynami kutikur Jesús alliyätsinqanta pïmaytapis willarqan.
Sanación de lo Demoniaco
Jairupa tsurinta kawatsinqan y warmita alliyätsinqan
40 Qocha wak tsimpanman Jesús kutiptinmi shuyaraykaq atskaq runakuna kushishqa chaskiyarqan. 41 Tsaymanmi sinagögacho mandaq Jairo jutiyuq runa charqan. Paymi Jesúspa ñöpanman qonqurikuykur rugakurqan wamranta alliyätsiq wayinman aywananpä. 42 Tsay wamranqa chunka ishkay watayuqnö jukllaylla warmi tsurinmi karqan. Paymi pasaypa antsa qeshyar wanuykarqanna.
Jairupa wayinman Jesús aywaptinmi atskaq runakuna kichkiyparä qatiyarqan. 43 Tsay runakunawanmi chunka ishkay watana yawar apaywan qeshyaykaq warmipis aywarqan. [Jampikunanpämi imaykantapis rantikur usharqan.] Manami ni pï jampiptinpis alliyarqantsu. 44 Jesúspa qepallanpa tsay warmi witiykur latsapanpa kuchunta yataykuptinmi jinan höra yawar apaynin alliyaskirqan. 45 Jesúsnami nirqan: “¿Pitä yatamashqa?”
Niptinmi llapanpis niyarqan: “Manami yatayashqätsu”.
Tsaymi Pedro nirqan: “Taytay, kayläya kichkimi aywaykantsik. [¿Imanöpatä musyayäman mayqan yatashunqaykitapis?]”
46 Tsaynö niptinpis yapaymi Jesús nirqan: “Pï karpis yatamashqami. Munaynï yarquqtami mayashqä”.
47 Yatanqanta tantiyaptinmi tsay warmi mantsariywan tsuktsukyar Jesúspa ñöpanman qonqurikuykurqan. Nirkurmi llapan runakunapa ñöpancho willarqan imanir yatanqanta y jinan höra alliyanqanta. 48 Jesúsnami nirqan: “Hïja, yärakamanqaykipitami alliyashqayki. Kananqa kushishqana aywakuy”.
49 Jesús tsaynö parlaykaptinmi Jairupa wayinpita willakuq chaykur nirqan: “Taytay, tsurikiqa wanushqanami. Amana Jesústa pushaynatsu”.
50 Tsaynö niqta wiyaykurmi Jesús nirqan: “Ama llakikuytsu. Tayta Diosman yärakuy. Tsurikiqa kawarimunqami”.
51 Wayiman chaykurmi Pedruta, Juanta, Santiaguta y Jairutapis warmintinta Jesús yaykatsirqan. Wakinkuna yaykuyänantaqa manami munarqantsu. 52 Wamra wanushqa kaptinmi waqtacho runakuna pasaypa waqayarqan. Tsaymi Jesús nirqan: “Ama waqayaytsu. Manami wanushqatsu; punuykanllami”.
53 Tsaynö niptinmi wamra wanushqa kanqanta musyar Jesústa asipäyarqan. 54 Tsaynami makinpita Jesús tsarirkur wamrata nirqan: “Wamra, shäriy”.
55 Tsaynö niptinmi jinan höra kawaskamur sharkurqan. Jesúsnami nirqan: “Kay wamrata pachan qarayay”.
56 Wamran kawarimunqanta rikaykurmi taytanwan maman pasaypa kushikuyarqan. Itsanqa kawaritsimunqanta pitapis mana willakuyänanpämi Jesús yätsirqan.
La hija de Jairo es devuelta a la vida