3 Tsaynö niptinmi ley yachatsikuqkuna yarpachakur niyarqan: “¡Tsaynö nirqa Dios tukuykanmi!”

4 Tsaynö yarpaykäyanqanta musyarmi Jesús nirqan: “¿Imanirtä llutanta yarpaykäyanki? 5 ¿Mayqantä mas aja? ¿Runapa jutsankunata perdonayku? ¿O qeshyaykaqta alliyätsiyku? 6 Runapa Tsurinqa kay patsacho runakunata perdonananpä munayyuqmi kaykan. Tsaytami kanan musyayanki”.

Tsaypitanami puriyta mana puëdiq runata nirqan: “¡Shäriy! Kirmaykita apakurkur wayikipa aywakuy”.

7 Tsaynö niptinmi jinan höra alliyashqana shäriskir wayinpa aywakurqan. 8 Tsayta rikarmi runakuna almirashqa Tayta Diosta alabar niyarqan: “¡Kay runataqa Tayta Diosmi munaynin qarashqa kaykunata rurananpä!”

9 Tsaypita aywarmi Mateo jutiyuq runa impuestuta cobrar jamaraykaqta Jesús rikarqan. Paytami nirqan: “Qatimay”. Tsaynö niptinmi Jesúswan Mateo aywakurqan.

10 Tsaypitanami wayincho mikuyänanpä Jesústa Mateo qayatsirqan. Tsaychömi impuestu cobraq runakuna y jutsasapa runakuna Jesúswan y discïpulunkunawan juntu mikuyarqan. 11 Tsayta rikaykurmi fariseukuna Jesúspa discïpulunkunata tapuyarqan: “¿Imanirtä impuestu cobraqkunawan y jutsasapa runakunawanpis Señornikikuna mikuykan?”^†

12 Tsaynö niyanqanta wiyaykurmi Jesús nirqan: “Sänu kaqkunaqa manami mëdicuta ministiyantsu, sinöqa qeshyaykaqkunallami. 13 Tayta Diospa palabrancho imata ninqantapis yachakuyay. Tsaychömi nin: ‘Sacrificiuta rupatsiyanqaykipitapis mas munä kuyapäkuq kayänaykitami’.^† Noqaqa manami jutsaynaq runakunamantsu shamushqä, tsaypa trokinqa jutsasapa runakunamanmi [jutsankunata kachariyänanpä]”.

14 Juk kutichömi Juanpa discïpulunkuna Jesústa tapuyarqan: “Noqakunapis y fariseukunapis atska kutimi ayunayä. Qampa discïpuluykikunaqa ¿imanirtä ayunayantsu?”

15 Jesúsnami nirqan: “Majatsakaq chölu kaykaptinqa majatsakay fiestaman qayatsinqan kaqkuna ¿llakikuyanmantsurä? Majatsakaq chöluta wanutsiyaptinmi itsanqa ayunayanqa”.

16 “Manami pipis makwa latsapata mushuq ratashwan shillpantsu. Mushuq ratashqa qentirmi makwa latsapata mas rachikätsin. 17 Tsaynöpis manami pipis tsayrä rurashqa vïnuta makwa uylluman wiñantsu. Wiñaptinqa vïnu poqurmi pakitsinqa. Tsaynö kaptinqa vïnupis y uyllupis ushakanqami. Tsaymi tsayrä rurashqa vïnutaqa sänu uylluman wiñantsik. Tsaynö rurashqaqa vïnupis manami jichanqatsu ni uyllupis manami ushakanqatsu”.^a

18 Tsaynö parlaykaptinmi sinagögacho mandaq runa chaykur Jesúspa ñöpanman qonqurikuykur nirqan: “Taytay, warmi tsurïmi wanushqa. Aywaykulläshun. Makikita jananman churaptikiqa kawarimunqami”.

19 Tsaynö rugakuptinmi discïpulunkunawan Jesús aywayarqan. 20 Aywaykäyaptinmi chunka ishkay watana yawar apaywan qeshyaykaq warmi qepallanpa witiykur Jesúspa latsapanpa kuchunta yataykurqan. 21 Tsaynö rurarqan “Jesúspa latsapanta yataykullarpis alliyäshämi” nirmi. 22 Yataykuptinmi tikraykur rikaykurnin Jesús nirqan: “Hïja, ama llakikuytsu. Yärakamanqaykipitami alliyashqayki”.

Tsay ninqan hörami warmi alliyaskirqan.

23 Tsaypitanami autoridäpa wayinman Jesús chaykur müsicukuna tukaykaqta y runakunapis pasaypa waqaykäyaqta tarirqan. 24 Paykunatami Jesús nirqan: “Waqtapa yarquyay. Wamraqa manami wanushqatsu; punuykanllami”.

Tsaynö niptinmi asipäyarqan. 25 Yarquskiyaptinnami wamra sutaraykanqanman Jesús yaykuskir makinpita joqarkamuptin wamra kawariskamur shärimurqan. 26 Tsaynö kawaritsimunqantami tsay markacho y wakin markakunachöpis musyayarqan.

27 Tsaypita Jesús aywakuptinmi ishkay qaprakuna paypa qepanpa aywar niyarqan: “¡Davidpa Tsurin Jesús, kuyapaykayällämay!”

28 Wayiman Jesús yaykuptinpis tsay qaprakuna qepantami yaykuyarqan. Tsaymi Jesús tapurqan: “¿Qamkuna criyiyankiku ñawikikunata alliyätsinäpä kanqanta?”

Niptinmi niyarqan: “Awmi taytay, criyiyämi”.

29 Tsaynö niyaptinmi paykunapa ñawinkunata yataykur Jesús nirqan: “Yärakayämanqaykipitami ñawikikuna rikanqa”.

30 Tsaynö niptinmi paykunapa ñawinkuna alliyaskirqan. Tsaymi Jesús nirqan: “Alliyätsinqäta pitapis ama willayankitsu”.

31 Tsaynö nikaptinpis yarquskillarmi Jesús alliyätsinqanta pïmaytapis willayarqan.

32 Tsay alliyätsinqan qaprakuna yarquskiyaptinnami Jesús kaqman mana parlaq runata apayarqan. Tsay runacho supay kaptinmi parlarqantsu. 33 Supayta Jesús qarquskiptinmi tsay runa parlar qallaykurqan. Tsayta rikaykurmi runakuna kushikur niyarqan: “¡Manami maychöpis kaynö alliyätsikuqtaqa rikashqantsiktsu!”

34 Tsaynö kaptinpis fariseukunami niyarqan: “Kay runaqa supaykunapa mandaqninpa munayninwanmi supaykunata qarqun”.^†

35 Llapan markakunapa y jallqakunapa Jesús purirmi Tayta Diospa mandakuyninpa alli willakuyninta sinagögakunacho yachatsirqan y tukuyläya qeshyawan qeshyaqkunata alliyätsirqan.^† 36 Tsaymi tsaytsika runakuna Jesús kaqman qorikäyarqan. Mitsiqniynaq y oqrakashqa üshakunanö kaykaqta rikarmi Jesús kuyaparqan.^† 37 Tsaymi discïpulunkunata nirqan: “Cosëcha qoriypä kanqannömi atskaq runakunapis Tayta Diospa willakuyninta chaskikuyänanpä kaykäyan. Tsaynö kaptinpis wallkaqllami willakuqkuna kayan. 38 Willakuqkunata kachamunanpä Tayta Diosta mañakuyay”.^†