2 kaykanqan wayiman atskaq qorikäyarqan. Wayi rurincho pasaypa kichki kaptinmi punkuchöpis runakuna junta kayarqan. Tayta Diospa willakuyninta Jesús yachaykätsiptinmi 3 puriyta mana puëdiq runata wantushqa chuskuq runakuna chätsiyarqan. 4 Atskaq runakuna kichkiräyaptinmi punkupa yaykatsiyta kamäpakuyarqantsu. Tsaymi wayi jananman yarkaskatsir qataraykanqanta kichaskir kirmantinta Jesúspa ñöpanman yarpatsiyarqan. 5 Tsay runakuna payman yärakuyanqanta musyarmi qeshyaykaq runata Jesús nirqan: “Hïju, llapan jutsaykipita perdonashqanami kaykanki”.

6 Tsaynö niptinmi ley yachatsikuqkuna yarpachakur niyarqan: 7 “¿Imanirtä kay runa tsaynö parlan? ¡Tsaynö nirqa Dios tukuykanmi! Tayta Diosllami jutsa ruraqkunataqa perdonan”.

8 Tsaynö yarpaykäyanqanta musyarmi Jesús nirqan: “¿Imanirtä tsaynö yarpaykäyanki? 9 ¿Mayqantä mas aja? ¿Runapa jutsankunata perdonayku? ¿O qeshyaykaqta alliyätsiyku? 10 Runapa Tsurinqa kay patsacho runakunata perdonananpä munayyuqmi kaykan. Tsaytami kanan musyayanki”.

Tsaypitanami puriyta mana puëdiq runata nirqan: 11 “¡Shäriy! Kirmaykita apakurkur wayikipa aywakuy”.

12 Tsaynö niptinmi jinan höra shäriskir kirmanta apakurkur alliyashqana aywakurqan. Tsayta rikarmi runakuna almirashqa Tayta Diosta alabar niyarqan: “¡Kay runa alliyätsinqantanöqa manami imaypis rikashqantsiktsu!”

13 Tsaypitanami Jesús kutirqan Galilea qocha kuchunman. Pay kaykanqan kaqman atskaq runakuna qorikäyaptinmi yachatsirqan.

14 Tsaypita aywakurmi Alfeupa tsurin Levíta^a impuestuta cobrar jamaraykaqta Jesús rikarqan. Paytami nirqan: “Qatirämay”.

Tsaynö niptinmi Jesúswan Leví aywakurqan.

15 Tsaypitanami wayincho mikuyänanpä Jesústa Leví qayatsirqan. Tsaychömi impuestu cobraq runakuna y jutsasapa runakuna Jesúswan y discïpulunkunawan juntu mikuyarqan. (Jesústami atskaq impuestu cobraq runakuna y jutsasapa runakunapis qatiräyarqan.) 16 Tsayta rikaykurmi ley yachatsikuq fariseukuna Jesúspa discïpulunkunata niyarqan: “¿Imanirtä impuestu cobraqkunawan y jutsasapa runakunawanpis Jesús mikuykan?”

17 Tsaynö niyanqanta wiyaykurmi Jesús nirqan: “Sänu kaqkunaqa manami mëdicuta ministiyantsu, sinöqa qeshyaykaqkunallami. Noqaqa manami jutsaynaq runakunamantsu shamushqä, tsaypa trokinqa jutsasapa runakunamanmi”.

18 Juk kutichömi Juanpa discïpulunkuna y fariseukunapis ayunaykäyarqan. Tsaymi runakuna Jesústa tapuyarqan: “Juanpa discïpulunkuna y fariseukunapa discïpulunkunaqa imaypis ayunayanmi. Qampa discïpuluykikunaqa ¿imanirtä ayunayantsu?”

19 Jesúsnami nirqan: “Majatsakaq chölu kaykaptinqa majatsakay fiestaman qayatsinqan kaqkuna ¿ayunayanmantsurä? 20 Majatsakaq chöluta wanutsiyaptinmi itsanqa ayunayanqa”.

21 “Manami pipis makwa latsapata mushuq ratashwan shillpantsu. Mushuq ratashqa qentirmi makwa latsapata mas rachitsin. 22 Tsaynöpis manami pipis tsayrä rurashqa vïnuta makwa uylluman wiñantsu. Wiñaptinqa vïnu poqurmi pakitsinqa. Tsaynö kaptinqa vïnupis y uyllupis ushakanqami. Tsaymi tsayrä rurashqa vïnutaqa sänu uylluman wiñantsik”.^b

23 Jamay junaqchömi trïgu poquraykaq chakrakunapa discïpulunkunawan Jesús päsaykäyarqan. Tsaypa päsarmi discïpulunkuna trïguta pallaskir uchuyarqan.^† 24 Tsaymi fariseukuna niyarqan: “Rikay. ¿Imanirtä jamay junaq kaykaptin leynintsikta mana cäsur discïpuluykikuna trïguta pallaykäyan?”

25 Jesúsnami nirqan: “¿Manaku imaypis liyiyashqayki yanapaqninkunawan mallaqar David imata ruranqantapis? 26 Mas mandaq sacerdöti Abiatar kaykanqan witsanshi Tayta Diospa wayinman yaykur Diospä churayanqan tantata David mikunä. Tsaynöllashi paywan aywaq runakunatapis qaranä.^† Tsay tantaqa manami David ni paywan kaykaq runakuna mikuyänanpätsu karqan, tsaypa trokinqa sacerdötikunalla mikuyänanpämi”.^†

27 Tsaypitanami Jesús nirqan: “Manami jamay junaq raykuqtsu runata Tayta Dios kamarqan, sinöqa runakuna raykuqmi jamay junaqta kamarqan. 28 Tsaymi Runapa Tsurinqa jamay junaqpäpis munayyuq”.