Makin wanushqa runata jamay junaqcho Jesús alliyätsinqan
3
Juk kutichömi sinagögaman Jesús yapay yaykurqan. Tsaychömi makin wanushqa runapis kaykarqan.
Marcos 3.1-19
2 Tsaymi Jesústa rikaraykäyarqan jamay junaqcho alliyätsiptinqa tsay achäquilla contran shäriyänanpä.
3 Jesúsnami makin wanushqa runata nirqan: “Runakunapa chawpinman ichiy”.
4 Tsaypitanami runakunata tapurqan: “Jamay junaqcho ¿allitaku o mana allitaku rurashun? Runa mayintsikta ¿salvashunku o ‘wanukutsunpis’ nishunku?”
Tsaynö niptin manami imatapis niyarqantsu. 5 Tsaymi paykunata Jesús ajashqa rikararqan. Mana kuyapäkuq kayanqanta musyarmi pasaypa llakikur makin wanushqa runata nirqan: “¡Makikita joqariy!”
Joqarkuptinmi makin alliyaskirqan. 6 Tsaymi fariseukuna yarquskir Herodespa janan shäriq runakunawan Jesústa wanutsiyänanpä willanakuyarqan.
Atskaq runakuna qocha kuchunman qorikäyanqan
7 Tsaypitanami qocha kuchunman discïpulunkunawan Jesús aywarqan. Qepantanami atskaq runakuna Galileapita y Judeapita aywayarqan. 8 Tsaynöpis Jesús ruranqankunata musyarmi Jerusalénpita, Idumeapita, Jordán mayu wak tsimpanpita, Tiro markapita y Sidón markapitapis atskaq runakuna aywayarqan. 9 Tsaymi discïpulunkunata Jesús nirqan: “Runakuna juntäyämuptin yarkunäpä büquita kamarishqallatana kaykätsiyay”.
10 Atskaqta alliyätsishqa kaptinmi llapan qeshyaykaqkuna imaykanöpapis Jesústa yatayta munayarqan.†
11 Jesústa rikaykurmi supaykuna löcuyätsinqan runakunapis ñöpanman lätakaykur jinchi niyarqan: “¡Qamqa Diospa Tsurinmi kanki!”
12 Tsaynö niyaptinmi paykunata Jesús ollqutuparqan pï kanqantapis mana willakuyänanpä.
Chunka ishkay apostolninkunata Jesús akranqan
13 Tsaypita jirkaman Jesús witsarkurmi wakin discïpulunkunata jutinpa qayarqan. 14 Tsay qayanqan discïpulunkunami chunka ishkay apostolninkuna kayarqan. Paykunatami qayarqan paywan puriyänanpä, Tayta Diospa willakuyninta willakuyänanpä, 15 [qeshyaykaqkunata alliyätsiyänanpä] y runakunapita supaykunata qarquyänanpä. 16 Paykunami kayarqan Simón (paypa jutintami trukatsirqan Pedro kananpä) 17 y Zebedeupa tsurinkuna Santiago y Juan. Santiaguta y Juantami kuyay jutinta churaparqan Boanerges nir. Boanerges ninqanqa “maqakuypa tsurinkuna” ninanmi. 18 Wakin kaqkunami kayarqan Andrés, Felipe, Bartolomé, Mateo, Tomás, Alfeupa tsurin Santiago, Tadeo, Zelote ninqan Simón 19 y Jesústa rantikuq Judas Iscariote.
Jesúspa contran parlayanqan
20 Tsaypita juk wayiman Jesús yaykuptinmi tsaymanpis atskaq runakuna qorikäyarqan. Tsaymi discïpulunkunawan mikuyänallanpäpis tiempun karqantsu.
Marcos 3.20-35
22 Tsay junaqkunami ley yachatsikuqkuna Jerusalénpita chaykur niyarqan: “Kay runaqa supaykunapa mandaqnin Beelzebúpaa munayninwanmi supaykunata qarqun”.†
23 Tsaynö niyaptinmi tsay runakunata qayaykatsir tinkutsiypa Jesús nirqan: “¿Imanöpatä Satanás kikinta qarqukunman? 24 Juk nacioncho runakuna kikinkunapura chikinakurqa ¿manatsurä wanutsinakur ushakäyanman? 25 Juk wayicho taqkunapis chikinakurqa ¿manatsurä wakpa kaypa aywakur ushakäyanman? 26 Satanáspis kikinpa contran shärirqa ushakanqami. 27 Kallpasapa runata manarä pankarqa manami pipis wayinman yaykur imantapis apakunmantsu. Pankaskirmi itsanqa imantapis apakunman.b
28 “Rasunpaypami nï: Runakuna jutsata rurayanqanta y Diospa contran parlayanqantapis Tayta Dios perdonanqami. 29 Espíritu Santupa contran parlayanqantami itsanqa imaypis perdonanqatsu”.c †
30 Jesús tsaynö nirqan supay yanapaykanqanta niyaptinmi.
Jesúspa maman y wawqinkuna pï kayanqanpis
31 Tsaypitanami Jesúspa mamanwan wawqinkuna wayi punkuman chaykur waqtallapita Jesústa qayatsiyarqan. 32 Tsaymi Jesúswan jamaraykaqkuna willayarqan: “Mamaykiwan wawqikikunami waqtacho shuyaykäyäshunki”.
33 Jesúsnami nirqan: “Mamä y wawqïkuna ¿pï kayanqantapis musyayankiku?”