Fariseukunanö mana kanantsikpä Jesús ninqan
12
Fariseukuna contran kayaptinpis Jesús yachatsinqanta wiyayta munarmi runakuna waranqanpa qorikaykur tanqanakurrä kaykäyarqan. Tsaymi discïpulunkunata yachatsir Jesús nirqan: “Paqtä fariseukunapa levadüranta chaskiyankiman. Tsay levadüraqa allish tukuq kayanqanmi kaykan. 2 Pakayllapa rurayanqanpis rikakanqami. Pipis mana rikaykaptin rurayanqanpis llapanmi musyakanqa. 3 Tsakaycho pakayllapa parlayanqaykipis atsikyaychömi wiyakanqa. Punkuta wichqakurkur shapshapyayllapa parlayanqaykitapis wayi jananman yarkurkurmi jinchi willakuyanqa.Pitapis mana mantsayänanpä Jesús yachatsinqan
4 “Kuyay amïgükuna, qamkunatami nï: Ama mantsariyankitsu pipis wanutsiyäshunaykipä jurapäyäshuptiki. Wanutsiyäshurnikipis mastaqa manami imatapis rurayäshunkinatsu. 5 Tsaypa trokinqa Tayta Diospita mantsapakuyay. Paymi itsanqa munayyuq kaykan wanuskatsiyäshurniki infiernuman qaykuyäshunaykipä. Tsaymi paypita mantsapakuyänayki.
6 “¿Manaku pitsqa pishqukunata ishkay centimullacho rantikuyan? Tsaynö kaptinpis pishqukunata Tayta Diosmi imaypis rikan. 7 Aqtsaykikunapis paypäqa yupashqami kaykan. Qamkunaqa atska pishqukunapitapis masmi väliyanki. Tsaynö kaykaptinqa ama mantsariyaytsu.
Jesúspa favornin parlaqkuna imanö kayänanpä ninqan
8 “Noqami nï: Pipis runakunapa ñöpancho favornï parlaptinqa Runapa Tsurinpis Tayta Diospa angelninkunapa ñöpanchömi paykunapa favornin parlanqa. 9 Pipis runakunapa ñöpancho ñëgamaptinqa noqapis Tayta Diospa angelninkunapa ñöpanchömi ñëgashä.
10 “Pipis Runapa Tsurinpa contran parlayaptinqa Tayta Dios perdonanqami. Espíritu Santupa contran parlayaptinmi itsanqa Tayta Dios imaypis perdonanqatsu.a †
11 “Sinagögakunaman, juezkunaman y autoridäkunaman apayäshuptiki llakikur ama niyankitsu: ‘¿Imatarä nishä? ¿Imanörä parlashä?’ 12 Parlayanqayki hörami Espíritu Santu tantiyatsiyäshunki imata parlayänaykipäpis”.
Imapäpis ayrajashqa mana kanantsikpä Jesús yachatsinqan
13 Runakunapa chawpinpitami juk runa Jesústa nimurqan: “Rabí, wawqïta niykuy noqapä kaq herenciata rakipämänanpä”.
14 Jesúsnami nirqan: “Amïgu, noqaqa manami jueznikitsu ni albasyaykitsu kä tsaynö mañakamänaykipäqa”.
15 Nirkurnami runakunata nirqan: “Paqtä imapäpis ayrajashqa kayankiman. Alli kawayqa manami imaykayuqpis kayrätsu”.
16 Tsaynö niskirnami tinkutsikuypa yachatsikur nirqan: “Juk imaykayuq runashi murukunqanpita atskata cosechanä. 17 Tsayshi yarpachakur ninä: ‘Kananqa ¿maymantä kaytsika mikuynïta churashä? Wayï manami aypannatsu churanäpä’. 18 Tsaynö yarpachakurshi ninä: ‘Churakuna wayïta paskaskirmi mas jatuntana sharkatsishä. Tsaymanmi llapan qorinqä mikuynïkunata y imaykäkunatapis churashä. 19 Atska watapä tsaynö churakuykurqa mana yarpachakuypami mikur upyar kushishqa kawakushä’. 20 Tsaynö yarpachakur kaykaptinshi Tayta Dios ninä: ‘¡Llutan yarpayyuq runa! ¡Kanan paqasmi wanunki! Llapan churanqaykikuna ¿pipärä kanqa?’ ”
21 Jesús parlar ushaskirmi nirqan: “Tsaynömi kikillanpä imaykata qoriq runata päsan. Imaykayuq karpis Tayta Diospäqa muchuqpitapis masmi llakipaypä kaykan”.
Tayta Diosman yärakunantsikpä Jesús yachatsinqan
22 Tsaypitanami discïpulunkunata Jesús nirqan: “Ama yarpachakuyaytsu: ‘¿Imanörä kawashä? ¿Imatarä mikushä? ¿Imatarä jatikushä?’ nir. 23 Manami mikuyllapä ni latsapallapä yarpachakunapätsu kaykantsik. 24 Pishqukuna imanö kawayanqantapis tantiyakuyay. Paykunaqa manami murukuyantsu ni cosechayantsu ni churakuyantsu. Tsaynö kayaptinpis Tayta Diosmi mikuyta kamaripan. Tayta Diospäqa pishqukunapitapis masmi väliyanki.
25 “Mayjina yarpachakurpis ¿pirä tamäñunpita mastaqa jatunyanman? 26 Tsayllatapis mana kamäpakuykarqa ¿imapätä kay vïdacho kaqkunapä yarpachakuyanki?
27 “Waytakuna imanö wiñayanqantapis tantiyakuyay. Waytakunaqa manami arukuyantsu ni putskakuyantsu. Noqami nï: Waytakuna kuyayllapä kayanqannöqa manami rey Salomónpa latsapankunapis kuyayllapä karqantsu.† 28 Yärakuyniynaq janan shonqu runakuna, waray warantin rupatsishqa kananpä kaptinpis qewakunata kuyayllapä wiñaykätsirqa ¿manatsurä qamkunatapis ministiyanqaykita Tayta Dios kamaripäyäshunkiman?
29 “Tsaynö kaykaptinqa yarpachakur ama niyaytsu: ‘¿Imatarä mikushä? ¿Imatarä upushä?’ 30 Kay patsachöqa llapan runakunapis tsaynömi llakikuyan. Qamkunapa Taytaykikunaqa imata munayanqaykitapis musyaykanmi. 31 Ashwanpis Tayta Diospa mandakuynincho kawayänaykipä yarpachakuyay. Tsaynö kawayaptikiqa imata munayanqaykitapis kamaripäyäshunkimi.
Enseñando Sobre Oración y Fe
Muchuqkunata yanapanapä Jesús yachatsinqan
32 “Qatirämaqnïkuna, wallka üshanölla karpis ama llakikuyaytsu. Qamkunatami Taytayki akrayäshushqayki paypa mandakuynincho kawayänaykipä.
33 “Imaykaykikunatapis rantikuskir muchuqkunata yanapayay. Tsaynö rurarqa riquëzaykita gloriamanmi churakuykäyanki. Tsaytaqa manami suwapis apanqatsu ni puyupis ushanqatsu. 34 Maymanmi riquëzaykita churayanki tsayllamanmi shonquykipis yarparaykanqa.
Kamarikushqa kanantsikpä Jesús yachatsinqan
35 “Tseqllaykikunata alli wachakakurkur aktsikikuna tsaritsishqa listu kaykäyay. 36 Majatsakay fiestapita patronnin kutimunanta shuyaraq wätaynö kayay. Tsay wätaykunaqa patronnin chaykur takakuptin jinan hörami punkuta kichapuyanqa. 37 Patronnin chämur shuyaykaqta tarinqanpitami wätayninkuna pasaypa kushikuyanqa. Rasunpaypami nï: Kikin patronmi wätayninkunata mësaman jamaykatsir mandilta jatikurkur paykunata sirvinqa. 38 Pullan paqas o tsaka tsaka patronnin kutimur shuyaykaqta tariptinmi wätayninkuna pasaypa kushikuyanqa.
39 “Tantiyakuyay. Imay höra suwa shamunanpä kanqanta musyarqa mana punuypami wayinta pipis täpanman. 40 Tsaynölla qamkunapis kamarikushqalla kaykäyay. Mana musyayanqayki hörami illaqpita Runapa Tsurin shamunqa”.†
Wätayman Jesús tinkutsinqan
41 Tsaynö niptinnami Pedro tapurqan: “Taytay, tsaynö yachatsikunqaykiqa ¿noqakunallapäku o llapan runakunapäwanku?”
42 Jesúsnami nirqan: “Mas yärakunqan y yachaq wätaynintami wayinman patronnin churan wakin wätaykunatapis hörancho qarananpä. 43 Patronnin kutimur yätsinqannö llapantapis ruraykaqta tariptinmi tsay wätay pasaypa kushikunqa. 44 Rasunpaypami nï: Tsay wätayninpa munayninmanmi llapan imaykantapis patronnin churanqa. 45 Mana yärakuypä wätay karmi itsanqa ‘patronnï manarämi kutimunqarätsu’ nir wätay mayinkunata warmitapis ollqutapis maqan y upyaq mayinkunawan mikur upyar jitaräkun. 46 Tsaynö kaykaptinmi mana yarpanqan höra illaqpita patronnin kutimur wakin mana cäsukuqkunatawan tsay wätayninta mana kuyapaypa castiganqa.
47 “Patronnin ninqanta musyaykar mana wiyakuypa llutanta ruraq wätaytaqa pasaypami castiganqa. 48 Mana musyayninpa llutanta ruraq wätaytami itsanqa alläpa castiganqatsu. Tsaynöllami Tayta Diospis mas yärakunqan kaqkunata cuentata mas mañanqa.
Chikishqa kayänanpä kanqanta Jesús ninqan
49 “Noqaqa shamushqä kay patsacho ninata tsaritsinäpämi. ¡Tsay nina maynapis tsariykanmanna!b 50 Tsaynö kaptinpis pasaypa ñakatsiyämarrämi wanutsiyämanqa. Tsaytami pasaypa llakikur shuyaraykä.
51 “¿Kay patsacho runakuna añaw kawayänanpä shamunqätaku yarpaykäyanki? Manami tsaypätsu shamushqä, tsaypa trokinqa kikinkunapura chikinakuyänanpämi. 52 Kananpita juk wayicho pitsqaq tarqa ishkay kaqpa contranmi kimsa kayanqa. Ishkay kaqnami kimsa kaqpa contran kayanqa. 53 Tsurinpa contranmi taytan, taytanpa contranmi tsurin, wawanpa contranmi maman, mamanpa contranmi wawan, llumtsuyninpa contranmi suegran y suegranpa contrannami llumtsuynin”.
Jesús ruranqankunata mana tantiyayanqan
54 Tsaycho qorikashqa kaykaq tsaytsika runakunatami Jesús nirqan: “Rupay jeqanan kaqpa pukutay yurimuptinqa: ‘Tamyanqanami’ niyanki y niyanqaykinöllami tamyan. 55 Sur kaqläpita wayra shamuptinqa ‘achanqanami’ niyanki y niyanqaykinöllami achan. 56 ¡Allish tukuqkuna! Tsaykunata tantiyaykarqa ¿imanirtä ruranqäkunata rikaykar Tayta Dios kachamanqanta tantiyayankitsu?
Juezman manarä char arreglanantsikpä Jesús ninqan
57 “¿Imanirtä tantiyayankitsu shumaq kawayänaykipä kanqanta?