Pitapis mana willapaypa muchuqkunata yanapanantsikpä Jesús yachatsinqan
6
“Paqtä runakuna rikayäshunallaykipä allikunata rurayankiman.† Tsaynö rurayaptikiqa ciëlucho kaykaq Taytayki manami ima premiutapis qoyäshunkitsu.2 “Muchuqkunata yanapar orgullösu runakunanöqa ama alabakuyankitsu. Paykunaqa cornëtata tukaqnörämi sinagögakunacho y cällikunachöpis yanapanqanta willakuyan. Rasunpaypami nï: Paykunapaqa runakuna alabayanqallanmi premiunkuna kanqa. 3 Pitapis yanaparqa ama willakuyankitsu. 4 Mana willakuyllapa yanapayaptikiqa Taytaykimi [llapanpa ñöpancho] premiuta qoyäshunki.
Tayta Diosta mañakunantsikpä Jesús yachatsinqan
5 “Tayta Diosta mañakur ama orgullösu runakunanöqa mañakuyankitsu.† Paykunaqa runakuna rikayänallanpämi sinagögakunacho y esquïnakunachöpis ichiykur Tayta Diosta mañakuyan. Rasunpaypami nï: Paykunapaqa runakuna alabayanqallanmi premiunkuna kanqa. 6 Tayta Diosta mañakurqa wayikiman yaykuskir punkuykita wichqakurkur mañakuyanki. Pakayllapa mañakuyanqaykita rikarmi Taytaykiqa [llapanpa ñöpancho] premiuta qoyäshunki.
7 “Mana Israel runakunaqa tsay palabrallawanmi kutin kutin mañakuyan. Tsaynö mañakuyan Tayta Dios wiyananpä kanqanta yarparmi. Qamkunaqa ama tsaynö mañakuyankitsu. 8 Manarä mañakuyaptikimi Taytaykiqa imata munayanqaykitapis mayna musyaykan. 9 Qamkunaqa Tayta Diosta mañakur niyanki:
“ ‘Ciëlucho kaykaq Papä, qampa jutiki respitashqa kaykullätsun.
10 Kay patsacho mandaq kanaykipä shamuykullay.
Ciëlucho cäsukuyäshunqaykinö kay patsachöpis cäsukuykuyälläshuy.
11 Cada junaqpä mikuylläkuna ama pishiykutsuntsu.†
12 Chikimaqnïkunata perdonayanqänö noqakunatapis perdonaykayällämay.
13 Jutsa rurayman mana ishkiyänäpä ama kachaykayällämaytsu.
Tsaypa trokinqa mana allikunapita tsapaykayällämay.
[Qampa munaynikichömi imaykapis kaykan.
Llapanpä munayyuqmi kaykanki.
Imayyaqpis alabashqa kaykullay. Amén.]’ ”
14 “Runa mayikita perdonayaptikiqa qamkunatapis ciëlucho kaykaq Taytayki perdonayäshunkimi. 15 Tsaynö kaptinpis runa mayikita mana perdonayaptikimi itsanqa qamkunatapis perdonayäshunkitsu.†
Ayünupita Jesús yachatsinqan
16 “Ayunarqa ama orgullösu runakunanö kayankitsu. Paykunaqa runakuna rikayänallanpämi llakinashqa puriyan. Rasunpaypami nï: Paykunapaqa runakuna alabayanqallanmi premiunkuna kanqa. 17 Qamkuna ayunarqa shumaq mayllakuyanki y naqtsakuyanki. 18 Tsaynö rurayaptiki runakuna manami musyayanqatsu ayunaykäyanqaykita. Runakuna mana rikayäshuptikipis llapantapis rikaq Taytaykimi rikaykäyäshunki. Paymi [llapanpa ñöpancho] premiuta qoyäshunki.
Ciëluman riquëzata churakunantsikpä Jesús yachatsinqan
19 “Kay patsacho riquëzata ama qoriyaytsu. Kay patsacho riquëzataqa puyumi ushan, runami apakun y ismurmi ushakan.† 20 Tsaypa trokinqa gloriaman riquëzata churayay.a Gloriachöqa manami puyupis ushanqatsu, runapis apakunqatsu ni ismunqatsu. 21 Maymanmi riquëzaykita churayanki tsayllamanmi shonquykipis yarparaykanqa.
Ñawintsik aktsinö kanqan
22 “Ñawikikunami shonquykipä aktsinö. Tsaymi ñawikikuna alli kaptinqa shonquykipis aktsicho kaykan. 23 Ñawikikuna mana alli kaptinmi itsanqa paqascho kayanki. Shonquykicho aktsi mana kaptinqa pasaypa tsakäpakushqami kaykäyanki.b
Imaykayuq kayllapä mana yarpachakunantsikpä Jesús yachatsinqan
24 “Manami pï runapis ishkay patrontaqa sirvinmantsu. Ishkay patronyuq karqa jukaqta chikirmi jukaqta kuyanqa. Jukaqta cäsur jukaqtaqa manami cäsunqatsu. Tsaynöpis imaykayuq kayllapä yarpachakurqa Tayta Diosta sirviyta manami kamäpakuyankitsu.
Tayta Diosman yärakunantsikpä Jesús yachatsinqan
25 “Tsaynö kaykaptinqa ama yarpachakuyaytsu: ‘¿Imanörä kawashä? ¿Imatarä mikushä? ¿Imatarä upushä? ¿Imatarä jatikushä?’ nir. Manami mikuyllapä ni latsapallapä yarpachakunapätsu kaykantsik. 26 Pishqukuna imanö kawayanqantapis tantiyakuyay. Paykunaqa manami murukuyantsu ni cosechayantsu ni churakuyantsu. Tsaynö kayaptinpis ciëlucho kaykaq Taytaykimi mikuyta kamaripan. Tayta Diospäqa pishqukunapitapis masmi väliyanki.
27 “Mayjina yarpachakurpis ¿pirä tamäñunpita mastaqa jatunyanman? 28 Tsaynö kaykaptinqa ¿imanirtä yarpachakuyanki alli latsapayuq kayänaykipä? Waytakuna imanö wiñayanqantapis tantiyakuyay. Waytakunaqa manami arukuyantsu ni putskakuyantsu. 29 Noqami nï: Waytakuna kuyayllapä kayanqannöqa manami rey Salomónpa latsapankunapis kuyayllapä karqantsu.† 30 Yärakuyniynaq janan shonqu runakuna, waray warantin rupatsishqa kananpä kaptinpis qewakunata kuyayllapä wiñaykätsirqa ¿manatsurä qamkunatapis ministiyanqaykita Tayta Dios kamaripäyäshunkiman?
31 “Tsaynö kaykaptinqa yarpachakur ama niyaytsu: ‘¿Imatarä mikushä? ¿Imatarä upushä? ¿Imatarä jatikushä?’ 32 Tsaynöqa llakikuyan Tayta Diosman mana yärakuqkunallami. Ciëlucho kaykaq Taytayki imata munayanqaykitapis musyaykanmi. 33 Imaykapitapis mas puntataqa Tayta Diospa mandakuynincho kawayänaykipä y pay munanqannö kawayänaykipä yarpachakuyay. Tsaynö kawayaptikiqa imata munayanqaykitapis kamaripäyäshunkimi. 34 Cada junaq imallapis yarpachakuyänaykipä kaykaptinqa waray junaqpä ama yarpachakuyaytsu.†