Pitapis mana juzganantsikpä Jesús yachatsinqan
7
“Tayta Dios mana juzgayäshunaykipä runa mayikikunata ama juzgayaytsu. 2 Runa mayikita juzgayaptikiqa Tayta Diosmi qamkunatapis juzgayäshunki. Runa mayikita imanöpis yanapayanqaykiman tupumi qamkunatapis Tayta Dios yanapayäshunki. 3 Ñawikikunacho jatunkaray qeru jatiraykaptinqa ¿imanirtä runa mayikikunapa ñawincho ichiklla kallapa jatiraykaqta rikapäyanki? 4 Ñawikikunacho jatunkaray qeru jatiraykaptinqa ¿imanöparä niyankiman: ‘Ñawikipita kallapata jipipäshayki’? 5 ¡Allish tukuq runakuna! Puntataqa ñawikikunacho kaykaq qerutarä jipiyay. Tsayrämi shumaq rikayanki runa mayikipa ñawinpita kallapata jipiyänaykipä.a6 “Sagrädu kaqtaqa allqukunata ama jitapäyaytsu. Perlasnikitaqa kuchikunata ama jitapäyaytsu. Jitapäyaptikiqa kuchikuna jarutakuyanqami y allqukuna usharpis ushayäshunkimi.b
Mana ajayaypa Tayta Diosta mañakunantsikpä Jesús yachatsinqan
7 “Mañakuyaptikiqa Tayta Dios qarayäshunkimi. Ashirqa tariyankimi. Punkuta takakuyaptikiqa kichapäyäshunkimi. 8 Mañakuq kaqqa chaskinmi. Ashiq kaqqa tarinmi.† Punkuta takakuq kaqtaqa kichapanmi.
9 “Mayqaykitapis wamraykikuna tantata mañakuyäshuptiki ¿rumitatsurä aptaparkuyankiman? 10 Pescäduta mañakuyäshuptiki ¿culebratatsurä qaraykuyankiman? 11 Qamkuna mana alli ruraq kaykarpis wamraykikunata alli kaqllata qaraykäyaptikiqa ¿manatsurä ciëlucho kaykaq Taytaykipis mañakuq kaqtaqa alli kaqkunata kamaripanqa?†
Runa mayintsikta alli rikanapä Jesús yachatsinqan
12 “Imanömi runa mayiki alli rikayäshunaykita munayanki, tsaynölla qamkunapis runa mayikita alli rikayanki.† Tsaynö kawanantsikpämi Moisés qellqanqancho y profëtakuna qellqayanqanchöpis nin.
Kichki punkuman Jesús tinkutsinqan
13 “Kichki punkupa yaykuyay. Anchu punkupa yaykuqkunaqa jatun nänipami infiernuman aywayan. Atskaqmi tsay punkupa yaykuyan. 14 Tsaynö kaptinpis kichki punkupa yaykuqkunami itsanqa llanu nänipa gloriaman aywayan. Wallkaqllami tsay punkupa yaykuyan.
Llutan yachatsikuqkuna pï kayanqanpis
15 “Profëta tukuqkunata paqtä chaskipäyankiman. Paykunaqa üshanö shamurpis wanutsikuq löbunömi kaykäyan. 16 Jachata wayuyninpita reqinqantsiknömi runakunatapis imanö kawayanqanta rikar reqintsik. Manami kashakunapitatsu üvata pallantsik ni cardonkunapitatsu hïgusta qorintsik. 17 Alli jachaqa allitami wayun. Tsaynö kaptinpis mana alli jachami itsanqa mana allita wayun. 18 Tsaynöllami alli wayuq jachaqa mana allitaqa wayuntsu. Mana alli wayuq jachapis manami allitaqa wayuntsu. 19 Tsay jachataqa mutuskirmi ninaman qaykuntsik.† 20 Jachata wayuyninpita reqinqantsiknömi runakunatapis imanö kawayanqanta rikar reqintsik.†
Tayta Diosta cäsukuqkunalla paypa ñöpanman chäyänanpä Jesús ninqan
21 “Manami ‘Señor, Señor’ niyämanqanllapitatsu ciëlucho kaykaq Taytäpa mandakuyninman yaykuyanqa. Tsaymanqa yaykuyanqa pay munanqannö kawaqkunallami. 22 Juiciu finalchömi atskaq niyämanqa: ‘Tayta, Tayta, qampa willakuynikitami willakurqä. Tsaynöpis qampa jutikichömi supaykunatapis qarqurqä. Tsaynöllami qampa jutikicho milagrukunatapis rurarqä’. 23 Tsaynö niyämaptinmi nishä: ‘Qamkunata manami reqïtsu. ¡Jutsasapa runakuna, ñöpäpita witikuyay!’†
Cäsukuq runa y mana cäsukuq runa imanö kayanqanpis
24 “Ninqäkunata cäsukuq runaqa qaqa janancho wayita shäritsiq runanömi kaykan. 25 Tsay wayiqa pasaypa tamyaptinpis, mayu jakar jaytaptinpis y alläpa wayraptinpis manami juchunqatsu.
26 “Ninqäkunata mana cäsukuq runami itsanqa aqusha janancho wayita shäritsiq runanö kaykan. 27 Tsay wayiqa pasaypa tamyaptin, mayu jakar jaytaptin y alläpa wayraptinmi juchunqa. Tsaynöllami mana cäsukuq runa pasaypa kuyapaypä kanqa”.