Qoyllur estudiaqkuna Jesústa adorayänanpä chäyanqan
2
Rey Herodes mandanqan witsanmi Judea provincia Belén markacho Jesús yurirqan. Yuriskiptinmi qoyllur estudiaq runakuna rupay yarqamunanläpita Jerusalénman chaykur 2 tapukuyarqan: “¿Maychötä Israel runakunapa mandaqnin rey kananpä yuriq llullu kaykan? Qoyllurnin yarqamuqta rikarmi adoraqnin shayämushqä”.3 Tsayta wiyaykurmi rey Herodes y Jerusaléncho taq runakunapis pasaypa yarpachakuyarqan. 4 Tsaymi mandaq sacerdötikunata y ley yachatsikuqkunata qayaykatsir Herodes tapur nirqan: “Salvamaqnintsik Cristo ¿maycho yurinanpätä kaykan?”
5 Paykunanami niyarqan: “Tayta, Judea provincia Belén markachömi. Tsaycho yurinanpämi Tayta Diospa profëtan qellqarqan:
6 “ ‘Belén marka, Judácho wakin markakunapita mas takshalla kaptikipis
qamchömi Israel runakunapa mandaqnin rey yurinqa.†
Paymi Israel runakunata üsha mitsiqnö rikanqa’ ”.
7 Tsayta wiyaykurmi qoyllur estudiaqkunata pakayllapa Herodes qayatsirqan. Chaykuyaptinmi tsay qoyllurta imaypitana rikayanqantapis tapurqan. 8 Willaskiyaptinmi Herodes nirqan: “Belénman aywar tsay wamrata ashiyämuy. Tariskir willayämanki noqapis adoraq aywanäpä”.
9 Belénman aywayaptinmi tsay rikayanqan qoyllurpis paykunapa puntanta aywarqan. Wamra kaykanqan kaq wayi derëchunman chaykurnami qoyllur ichiskirqan. 10 Tsayta rikarmi pasaypa kushikuyarqan. 11 Wayiman yaykurirnami wamratawan maman Maríata tariyarqan. Tsaymi wamrapa ñöpanman qonqurikuykur adorayarqan. Nirkurnami apayanqan qorita, inciensiuta y mïrrata qarayarqan.
12 Herodes kaqman manana kutiyänanpä suëñuynincho Tayta Dios revelaptinmi juk nänipana markankunaman kutikuyarqan.
Egiptuman Jesústa José qeshpitsinqan
13 Qoyllur estudiaqkuna aywakuskiyaptinnami suëñuynincho Joséta Tayta Diospa angelnin nirqan: “Herodesmi wamrata wanutsinanpä ashitsinqa. Kanan höra sharkur wamrata mamantinta Egiptuman qeshpitsiy. Tsaycho täyanki yapay willanqäyaq”.
14 Tsaymi jinan höra rikchaskamur patsa manarä waraptin wamrata mamantinta apakurkur Egiptuman aywayarqan. 15 Tsaychömi Herodes wanunqanyaq täyarqan. Tsaynöpami Tayta Diospa profëtan kaynö qellqanqanta cumpliyarqan: “Tsurï kaptinmi Egiptupita qayamurqä”.†
Beléncho wamrakunata wanutsiyanqan
16 Qoyllur estudiaqkuna mana kutiyaptinmi rey Herodes pasaypa ajanarqan. Tsaymi soldädunkunata kacharqan Belén markacho y ñöpan estanciakunachöpis ollqu wamrakunata wanutsiyänanpä. Qoyllurta imay rikayanqantapis willayanqanpita cuentata jipiskirmi wamrakunata wanutsiyarqan tsayrä yurishqapita ishkay watayuqyaq. 17 Tsaynö wanutsirmi profëta Jeremías kaynö qellqanqanta cumpliyarqan:
18 “Ramá markacho llakikur waqanqanmi wiyakaykämun.
Tsayqa Raquel waqanqanmi.
Wamrankuna wanushqa kaptinmi shoqayaptinpis mana wiyaypa waqaykan”.†
Egiptupita kutiyämunqan
19 Herodes wanuskiptinnami Egiptucho José kaykaptin Tayta Diospa angelnin suëñuynincho 20 nirqan: “Wamrata mamantinta apakurkur Israelman kutikuyay. Wamrata wanutsiyta munaqkuna wanuyashqanami”.
21 Tsaynö niptinmi wamrata mamantinta apakurkur Israelman kutiyarqan. 22 Kutiykäyanqanchömi José musyarqan Judeacho rey Herodespa trokin tsurin Arquelao mandaq kaykanqanta. Tsayta musyaskirmi Judeaman kutiyta mantsarirqan. Tsaymi suëñuynincho Tayta Dios willaptin Galileamanna aywakuyarqan. 23 Tsaynöpami Nazaret markaman taq aywayarqan.† Tsaycho tarmi Tayta Diospa profëtankuna kaynö niyanqanta cumpliyarqan. Tsay niyanqanmi nin: “Nazareno kanqantami runakuna niyanqa”.