San Mateo
Jesucristupä qellqanqan
Jesúspa unay castankuna pï kayanqanpis
1
Abrahampita y rey Davidpita aywaraq Jesucristupa unay castankunami kayarqan:2 Abrahampa tsurinmi karqan Isaac.
Isaacpa tsurinmi karqan Jacob.
Jacobpa tsurinmi karqan Judáwan wawqinkunapis.
3 Judápa tsurinkunami kayarqan Fareswan Zara.
Paykunapa mamanmi karqan Tamar.
Farespa tsurinmi karqan Esrom.
Esrompa tsurinmi karqan Aram.
4 Arampa tsurinmi karqan Aminadab.
Aminadabpa tsurinmi karqan Naasón.
Naasónpa tsurinmi karqan Salmón.
5 Salmónpa tsurinmi karqan Booz.
Boozpa mamanmi karqan Rahab.
Boozpa tsurinmi karqan Obed.
Obedpa mamanmi karqan Rut.
Obedpa tsurinmi karqan Isaía.
6 Isaípa tsurinmi karqan rey David.†
Rey Davidpa tsurinmi karqan Salomón.
Salomónpa mamanmi karqan Uríaspa viüdan.
7 Salomónpa tsurinmi karqan Roboam.
Roboampa tsurinmi karqan Abías.
Abíaspa tsurinmi karqan Asa.
8 Asapa tsurinmi karqan Josafat.
Josafatpa tsurinmi karqan Joram.
Jorampa tsurinmi karqan Uzías.
9 Uzíaspa tsurinmi karqan Jotam.
Jotampa tsurinmi karqan Acaz.
Acazpa tsurinmi karqan Ezequías.
10 Ezequíaspa tsurinmi karqan Manasés.
Manaséspa tsurinmi karqan Amón.
Amónpa tsurinmi karqan Josías.
11 Josíaspa tsurinmi karqan Jeconíaswan wawqinkunapis.
Jeconías kawanqan witsanmi Israel runakunata tsariskir Babilonia soldädukuna nacionninman prësu apakuyarqan.†
12 Tsaychönami Jeconíaspa tsurin Salatiel yurirqan.
Salatielpa tsurinmi karqan Zorobabel.
13 Zorobabelpa tsurinmi karqan Abiud.
Abiudpa tsurinmi karqan Eliaquim.
Eliaquimpa tsurinmi karqan Azor.
14 Azorpa tsurinmi karqan Sadoc.
Sadocpa tsurinmi karqan Aquim.
Aquimpa tsurinmi karqan Eliud.
15 Eliudpa tsurinmi karqan Eleazar.
Eleazarpa tsurinmi karqan Matán.
Matánpa tsurinmi karqan Jacob.
16 Jacobpa tsurinmi karqan Maríapa runan José.
Maríapa wawanmi karqan Jesús. Paymi Tayta Dios kachamunqan Cristo.
17 Abraham kawanqan witsanpita David yurinqanyaqmi chunka chusku generación karqan. Tsaynöllami David kawanqan witsanpita Israel runakunata Babiloniaman apayanqan witsanyaq chunka chusku generación karqan. Tsaynöllami Babiloniaman apayanqan witsanpita Jesucristo yurinqanyaqpis chunka chusku generación karqan.
Jesús yurinqan
18 Kaychömi qellqaraykan Jesucristo manarä yuriptin ima päsanqanpis. Joséwan majatsakänanpämi María parlashqana karqan.† Joséwan manarä tarmi Espíritu Santupa munayninwan qeshyaq rikakurqan. 19 Joséqa alli runa karmi Maríata penqakuyman churayta mana munar pakayllapa jaqiyta yarparqan.
20 Tsaynö yarpachakuykaptinmi Tayta Diospa angelnin Joséta suëñuynincho nirqan: “Rey Davidpa castan José, Maríawan majatsakayta ama penqakuytsu. Payqa Espíritu Santupa munayninwanmi qeshyaq kaykan. 21 Ollqu wamratami qeshyakunqa. Payman yärakuqkunata jutsankunapita salvananpä kaptinmi tsay wamrapa jutinta churapanki Jesúsb jutin kananpä”.†
22 Llapanpis tsaynö päsarqan profëtanwan Tayta Dios kaynö ninqan cumplinanpämi:
23 “Juk virgen jipash qeshyaq rikakurmi ollqu wamrata qeshyakunqa.
Tsay wamrapa jutintami churapanqa Emanuel jutin kananpä”.†
(Emanuel ninanqa Tayta Dios noqantsikwan kaykan ninanmi.)