4 Unay castan rey David Beléncho yurishqa kaptinmi Josépis Galileacho kaykaq Nazaretpita Judeacho kaykaq Belénman censakuq aywarqan. 5 Warmin kananpä parlashqana karmi Maríatapis pusharqan. Maríaqa tsay junaqkuna qeshyakunanpänami kaykarqan. 6 Beléncho kaykäyaptinnami killan tinkuskiptin nanay tsariskirqan. 7 Tsaychönami mayor wawanta qeshyakurqan. Qorpakuna patsakuyänan cuartucho posäda mana kaptinmi inchanawan piturkur uywakunapa mikukuyänallanman punuykatsirqan.^a

8 Tsay paqasmi Belén marka washaqnincho üsha mitsiqkuna üshankunata täpaykäyarqan. 9 Tsayman ángel yuripaskiptinmi Tayta Diospa chipipiynin atsikyapaykurqan. Tsayta rikaykurmi üsha mitsiqkuna pasaypa mantsakäyarqan. 10 Angelnami nirqan: “Ama mantsakäyaytsu. Llapan runakuna kushikuyänanpämi alli willakuyta apamushqä. 11 Kananmi rey Davidpa markancho juk salvador yurishqa. ¡Payqa Señornintsik Cristumi! 12 Kay willanqä rasun kanqanta musyayänaykipä kanan aywarmi uywakuna mikukuyänancho llullu wamrata inchashqa punuykaqta tariyanki”.

13 Ángel tsaynö parlaykaptinmi atska angelkunana yuriskir Tayta Diosta alabar niyarqan:

15 Angelkuna ciëluman kutiskiyaptinnami mitsikuqkuna jukninpis jukninpis ninakuyarqan: “Tayta Dios willamanqantsikta rikaq Belénman juklla aywashun”.

16 Tsaynö nir empëñu aywarmi llullu wamrata uywakuna mikukunallancho punuraykaqta tariyarqan. Josépis Maríapis tsaychömi kaykäyarqan. 17 Rikaykurmi willakuyarqan llullupä ángel willakunqankunata. 18 Willakuyaptinmi llapan wiyaqkuna kushikuyarqan. 19 Maríanami shonqullancho tsay llapan päsanqankunata yarpararqan. 20 Ángel willanqannölla llapantapis tariykurmi üsha täpaqkuna rikayanqanpita y wiyayanqanpita Tayta Diosta alabarnin kutikuyarqan.

21 Wamra puwaq junaqyuq kaykaptinmi palluncho señalatsiyarqan. María manarä qeshyaq kaptin ángel ninqannöllami llullupa jutinta churapäyarqan Jesús kananpä.

22 Moisés qellqanqan leykunacho ninqannöllami María qeshyakunqanpita purificakunan junaq chämuptin^† Tayta Diospa munayninman churayänanpä Joséwan María Jerusalén templuman llulluta apayarqan. 23 Tsaynö apayänanpämi Tayta Diospa leynin qellqaranqancho nin: “Mayor ollqu tsurikiqa Tayta Diospami kanqa”.^†

24 Tsaynöllami Diospa leynin qellqaranqancho nin: “Ishkay kullkushkunata o ishkay pushapa palumakunatami apamunqa”.^† Tsay ninqantapis cumpliyänanpämi templuman aywayarqan.

25 Tsay witsanmi Jerusaléncho Simeón jutiyuq runa karqan. Payqa alli ruraq karmi Tayta Diosman yärakur kawarqan. Tsaynöpis Israel runakuna ñakayanqanpita Cristo jipinanpä kanqantami shuyararqan. Payqa Espíritu Santupa munayninchömi kawaq. 26 Paytami Espíritu Santu musyatsirqan Tayta Dios kachamunqan Cristuta rikaykurrä wanunanpä kanqanta. 27 Tsaynö tantiyatsiptinmi templuman Simeón aywarqan. Tsaymannami Maríawan José Tayta Diospa leynincho ninqanta cumpliyänanpä Jesústa chätsiyarqan. 28 Simeónnami llulluta marqarkur Tayta Diosta alabar nirqan:

33 Simeón ninqankunata wiyarmi Joséwan María kushikuyarqan. 34 Simeónnami Tayta Diosta mañakurqan bendicionninta paykunaman churananpä. Jesúspa maman Maríatanami nirqan: “Kay llullutami Tayta Dios churamushqa wakin Israel mayintsikkunata salvananpä y wakinta juzgananpä. Paytaqa atskaq runakunami chikiyanqa. 35 Tsaynöpami runakuna allita o mana allita yarpäyanqanpis musyakanqa. Tsaykuna päsaptinmi qampa shonquyki espädawan tuksishqanörä nananqa”.

36 Templupa patiunchömi Tayta Diospa profëtan Ana jutiyuq chakwanpis kaykarqan. Paypa taytanqa Aser trïbupita Fanuelmi karqan. Payqa qanchis watallami runanwan tarqan. 37 Puwaq chunka chusku (84) watami viüdalla kakurqan. Templupa patiunpita mana yarquypami paqaspapis junaqpapis ayunar Tayta Diosman mañakuq. 38 Simeón mañakur ushaskiptinmi Anapis Jesúsman witiykur Tayta Diosta agradëcikurqan. Nirkurnami Tayta Dios kachamunqan Cristuta shuyaraykaqkunata nirqan: “Kay llullumi shuyanqantsik salvador kaykan”.

39 Tayta Diospa leynincho ninqannö cumpliskirmi Joséwan María Galilea Nazaret markanman kutikuyarqan. 40 Tayta Dios yanapaptinmi Jesúsqa wiñayllanta alli yarpayyuq y kallpayuq rikakurqan.

41 Cada watami Jesúspa taytanwan maman Pascua fiestakuq Jerusalénman aywayaq. 42 Chunka ishkay watayuq Jesús kaykaptinmi Israel runakunapa costumbrin kanqanmannö Pascua fiestaman Jesústapis pushayarqan. 43 Fiesta ushaynami Joséwan María markankunapa kutikuyarqan. Jerusaléncho Jesús quëdanqantaqa manami cuentata qokuyarqantsu. 44 Paykunaqa wakin runakunawan Jesús aywaykanqanta yarparmi juk junaq qoyat aywayarqan. Jesústa watukaskirnami castankunacho y reqinakuyanqancho ashiyarqan. 45 Mana tarirnami Jerusalénman ashiq kutiyarqan.

46 Kimsa junaqtarämi templucho kaykaqta Jesústa tariyarqan. Tsaychömi ley yachatsikuqkunawan tapunakur jamaraykänä. 47 Jesús alli yachaq kar tapuyanqanta contestaptinmi wiyaqninkunapis espantashqa rikakuyarqan. 48 Tsaycho tariykurmi taytanwan maman pasaypa espantashqa rikakuyarqan. Mamannami nirqan: “Hïju, ¿imanirtä kaycho quëdakushqayki? Pasaypa llakishqami puriyashqä”.

49 Jesúsnami nirqan: “¿Imanirtä ashiyämashqayki? ¿Manaku musyayanki Taytäpa wayincho kanäpä kanqanta?”

50 Tsaynö niptin paykuna manami tantiyayarqantsu imanir tsaynö nikanqantapis.

51 Tsaypitanami paykunawan Nazaretman Jesús kutikur mandanqankunata rurarqan. Mamanqa llapan ima päsanqankunatapis shonqullanchömi yarpararqan. 52 Jesúsqa wiñayllantami mas yachaq karqan. Tsaymi Tayta Dios y runakuna kuyayarqan.