San Lucas
Jesucristupä qellqanqan
1
Tayta Teófilo, Jesucristo kay patsacho imata ruranqantapis atskaq runakunami qellqayashqa. 2 Qallananpita patsa Jesucristuwan puriqkuna willakuyanqannöllami qellqayashqa. Paywan puriqkuna imata ruranqantapis rikashqa kayaptinmi willakuyänanpä Jesucristo kacharqan. 3 Tsaymi noqapis qallaykunanpita patsa imanö kanqanta shumaq tapupakuykur qampä llapanta qellqaykämü. 4 Tsaynöpami qampis kayta liyir Jesucristupä willayäshunqayki rasunpaypa kanqanta musyanki.
El Comienzo
Bautizaq Juan yurinanpä ángel willakunqan
5 Judeacho Herodes rey kaykanqan witsanmi Zacarías jutiyuq sacerdöti karqan. Payqa Abías sacerdötipita aywaraq karmi tsay casta sacerdötikunawan Tayta Diosta templucho sirviyarqan.
Zacaríaspa warminpa jutinmi Elisabeta karqan. Paypis sacerdöti Aarónpita aywaraqmi karqan.
6 Paykunaqa Tayta Dios munanqannö kawarmi mandamientunkunata y leyninkunata imaypis cumpliyaq. 7 Elisabet qolluq kaptinmi wamrankuna karqantsu. Paykunaqa ishkanpis chachayashqanami kayarqan.
8 Juk kutimi Zacaríasta y paywan aruq sacerdöti mayinkunata turnun charqan templucho Tayta Diosta sirviyänanpä. 9 Costumbrinkuna kanqannö sacerdötikuna suertita jitayaptinmi Zacaríasta töcarqan templuman yaykur inciensiuwan qoshnitsinanpä.† 10 Templucho inciensiuwan qoshnitsinqanyaqnami waqtacho runakuna Tayta Diosman mañakuykäyarqan.
11 Inciensiuwan qoshniykätsiptinmi altarpa derëcha kaq läduncho Zacaríasta Tayta Diospa angelnin yuripaskirqan. 12 Angelta rikaykurmi Zacarías pasaypa mantsakar ni ima ruraytapis kamäpakurqantsu.
13 Angelnami nirqan: “Zacarías, ama mantsakaytsu. Rugakunqaykitami Tayta Dios wiyashushqayki. Warmiki Elisabetmi ollqu wamrata qeshyakunqa. Paypa jutinmi kanqa Juan. 14 Tsuriki yuriptinmi pasaypa kushikunki. Wakinkunapis pasaypami kushikuyanqa.
15 “Tayta Dios munanqannömi tsuriki kawanqa. Payqa manami vïnuta ni ima machätsikuqkunatapis upunqatsu.† Mamanpa pachancho kanqanpita patsami Espíritu Santupa munaynincho kanqa. 16 Pay yachatsiptinmi Israel runakuna jutsankunata kacharir Tayta Dios munanqannö kawayanqa. 17 Tayta Diospa munayninwan profëta Elías willakunqannömi paypis willakunqa.b Willakuptinmi warmikunapis wawankunawan y runakunapis tsurinkunawan kuyanakuyanqa. Mana cäsukuqkunatapis Tayta Dios munanqannö kawayänanpämi willanqa. Tsaynöpami runakunata musyatsinqa Tayta Dios kachamunqan Cristo shamuptin chaskikuyänanpä”.
18 Zacaríasnami angelta tapurqan: “Kay nimanqayki ¿imanötä kanqa? Noqaqa awkinnami kä. Warmïpis chakwannami”.
19 Angelnami nirqan: “Noqaqa Tayta Diospa ñöpancho sirviqnin Gabrielmi kaykä. Paymi kachamashqa kay alli willakuyta qamta willanäpä. 20 Kay willanqäkunaqa llapanmi cumplinqa. Ninqäkunata mana criyimanqaykipitami tsuriki yurinqanyaq shimiki pashtanqatsu”.
21 Tsayyaqnami waqtacho kaykaqkuna shuyarar niyarqan: “¿Imanirrä kay hörayaq Zacarías yarqamuntsu?”
22 Templupita yarqaskamurnami shimin mana pashtaptin shuyaraykaqkunata sëñasllapana parlaparqan. Tsaymi tantiyaskiyarqan templu rurincho imapis yuripanqanta.
23 Templucho turnunta cumpliskirnami wayinpana Zacarías kutikurqan. 24 Tsaypitanami warmin Elisabet qeshyaq rikakur pitsqa killantin wayinpita mana yarquypa täkurqan. Tsaymi nirqan: 25 “Tayta Diosmi kuyapämashqa wamrayuq kanäpä. Kananpitaqa mananami qolluq kanqäta parlayanqanatsu”.
Jesús yurinanpä ángel willakunqan
26 Elisabet qeshyaq rikakunqanpita soqta killatanami ángel Gabrielta Tayta Dios kachamurqan Galileacho Nazaret markaman. 27 Tsaychömi virgen María tarqan. Payqa unay rey Davidpa castan Joséwan majatsakänanpä awnishqanami karqan. 28 Ángel chaykurnami nirqan: “¡Kushikuy, María! ¡Tayta Diosmi akrashushqayki! Payqa qamwanmi kaykan. [Wakin warmikunapitapis masmi qamtaqa Tayta Dios kuyashunki]”.
29 Ángel niptinnami María mantsakar shonqullancho nirqan: “¿Imanirtä tsaynö niman?”
30 Angelnami nirqan: “María, ama mantsakaytsu. Tayta Diosmi kuyashurniki akrashushqayki. 31 Kananpitami qeshyaq rikakunki. Wamrayki yuriptinmi jutinta churapanki Jesústa. 32 Munayyuq kaptinmi Tayta Diospa Tsurin kanqanta niyanqa. Unay castan Davidnö rey kananpämi Tayta Dios churanqa. 33 Paymi Jacobpita aywaraqkunata imayyaqpis mandanqa. Paypa mandakuyninqa imaypis manami ushakanqatsu”.
34 Maríanami tapurqan: “Runawan manarä takukaykarqa ¿imanöpatä qeshyaq rikaküman?”
35 Angelnami nirqan: “Espíritu Santu qamman shamuptinmi Tayta Diospa munayninwan qeshyaq rikakunki. Tsaymi santu wawayki yuriptin Diospa Tsurin niyanqa.
36 “Castayki Elisabetpis chakwan kaykarmi ‘qolluq warmi’ nikäyaptinpis soqta killana qeshyaq kaykan. 37 Tayta Diospäqa manami imapis ajatsu”.
38 Maríanami nirqan: “Noqaqa Tayta Diospa sirviqninmi kaykä. Qam nimanqaykinö kaykullätsun”.
Tsaypitanami ángel aywakurqan.
Elisabetta María watukanqan
39 Ángel ninqanpita juk ishkay junaqkunanami Judea provinciapa jallqancho kaykaq juk markaman empëñu aywarqan María. 40 Chaykurnami Zacaríaspa wayinman yaykuskir Elisabetta winchikurqan. 41 Winchikuykuptinmi Elisabetpa pachancho wamra kuyurqan. Elisabetnami Espíritu Santupa munayninwan 42 jinchi nirqan: “¡Llapan warmikunapitapis masmi qamta Tayta Dios bendicionninta qoshushqayki! ¡Qeshyaq kaykanqayki wawaykitapis bendicionnintami qoshqa! 43 ¿Pitä noqaqa kä Señornïpa maman watukaykamänanpä? 44 Winchikamanqaykita wiyaskirmi pachächo wawä kushikur kuyushqa. 45 ¡Tayta Dios nishunqaykita cumplinanpä kanqanta criyinqaykipitami kushishqa kaykanki!”
Tayta Diosta María alabanqan
46 Maríanami nirqan:
“Llapan shonqüwanmi Tayta Diosta alabä.
47 Kushikurmi salvamaqnï Tayta Diosta alabä.
48 Mana cuentashqa sirviqnin kaykaptïpis rikamashqami.
Kananpitaqa imaypis runakuna niyämanqa Tayta Dios bendicionninta noqaman churamunqantami.
49 Munayyuq Tayta Dios allimi rikamashqa.
Payqa santumi.
50 Paypita mantsapakuqkunatami imaypis kuyapan.
51 Pipis mana ruranqankunatami munayninwan ruran.
Yachaq tukuqkunapa yarpayninkunatapis manakaqmanmi churan.
52 Mandaqkunatami mandaq kayninpita qarqun.
Qollmi shonqukunatanami mandaq kayänanpä churan.
53 Muchuycho kaqkunatami imaykatapis kamaripan.
Imaykayuqkunatanami muchuqyätsin.
54 Sirviqnin Israel runakunata kuyaparmi imaypis mana qonqaypa yanapan.
55 Imayyaqpis tsaynö yanapamänantsikpämi unay castantsik Abrahamta y paypita aywaraqkunata awnirqan”.†
56 Elisabet kaqcho kimsa killanö kaskirnami wayinpa María kutikurqan.
Bautizaq Juan yurinqan
57 Elisabetpa killan tinkuskiptinnami ollqu wamrata qeshyakurqan. 58 Tsayta musyaskirmi vecïnunkuna y castankuna Elisabetman aywar pasaypa kushikur niyarqan: “¡Tayta Diosmi kuyapäshurniki yanapashushqayki wawayuq kanayki!”
59 Puwaq junaqyuq wamra kaykaptinnami Zacaríaspa wayinman aywayarqan wamrata señalayänanpä.† Tsaychömi taytan Zacaríaspa jutinta churayta munayarqan. 60 Tsaymi maman nirqan: “¡Manami tsayqa jutin kanmantsu! ¡Jutinqa Juanmi kanqa!”
61 Tsaynö niptinmi niyarqan: “Castaykikunachöqa manami tsay jutiyuq pipis kantsu. ¿Imanirtä Juan jutin kananta munaykanki?”
62 Tsaynami Zacaríasta sëñasllapa tapuyarqan: “Tsurikipa jutinta ¿imatatä churanki?”
63 Tapuyaptinmi takshalla tablata mañaskir qellqarqan: “Juanmi jutin kanqa”. Tsayta liyirmi espantashqa llapanpis rikakuyarqan. 64 Tsay hörami Zacaríasqa shimin pashtaskiptin Tayta Diosta alabar qallaykurqan.
65 Tsaykunata rikaykurmi llapan vecïnunkuna mantsakäyarqan. Tsaykuna päsanqantami entëru Judea jallqakunacho pïmaypis parlayarqan. 66 Tsay wamrata Tayta Dios yanapanqanta parlayaptinmi wiyaqkuna yarpachakur niyarqan: “Tsay wamra jatunyar ¡ima munayyuqrä kanqa!” nir.
Tayta Diosta Zacarías alabanqan
67 Espíritu Santupa munayninwanmi Zacarías nirqan:
68 “Israel runakunata kuyaq Tayta Dios alabashqa kaykullätsun.
Payqa salvamänantsikpämi shamushqa.
69 Sirviqnin David castanpitami juk munayyuq salvakuq yurinanpä kaykan.
70 Tsaynö yurinanpämi unay santu profëtakunawan willakatsimurqan.
71 Contrantsikkunapa y chikimaqnintsikkunapa munayninpita salvamänantsikpämi musyatsimashqantsik.
72 “Unay castantsikkunata kuyaparmi sagrädu pactuta cumplinqa.
73 Jurarmi unay castantsik Abrahamta awnirqan
74 chikimaqnintsikkunapita jipimänantsikpä kanqanta
y mana mantsariypa payllatana sirvinantsikpä kanqanta.
75 Tsaynö kaykaptinqa jutsata mana ruraypa pay munanqannö qoyay qoyay kawashun”.
76 Tsurintanami Zacarías nirqan:
“Kuyay tsurillä, salvamaqnintsik shamuptin chaskikuyänanpämi nänita pitsaqnö runakunata willanki.
Tsaymi munayyuq Tayta Diospa profëtan kanqaykita niyanqa.
77 Tayta Dios kuyanqan runakunata perdonar salvananpä kanqantami willanki.
78 Tayta Diosnintsik kuyapämarnintsikmi ciëlupita juk salvadorta kachamunqa.
Tsayqa patsa waraqnömi kushikuypä kanqa.
79 Aktsinö karmi tsakaychönö kawaqkunata y wanuyta mantsaqkunata salvanqa.
Paymi tantiyatsimäshun alli kawanantsikpä”.
80 Zacaríaspa tsurin Juanqa wiñayllantami Tayta Dios munanqannö kawarqan. Israel mayinkunata Tayta Diospa palabranta willakur qallanqanyaqmi tsunyaqkunallacho tarqan.