Tayta Diosta ciëlucho alabayanqan
4
Tsaypitanami ciëlucho punku kicharaykämuqta rikarqä. Ñöpata wiyanqänöllami cornëta waqamuqtanörä yapaypis wiyarqä: “Kayman witsämuy. Kananmi rikatsishayki ima päsananpä kaqtapis” nimaqta.2 Tsay hörami Espíritu Santu ciëlucho trönuta rikatsimarqan. Tsay trönuchömi juk jamaraykarqan. 3 Jamaraykaqqa jaspe ruminö y cornalina ruminörämi chipipiykarqan. Jamakunan trönu jananpami esmeralda ruminörä chipipiykaq tseqyaw ichiraykarqan.†
4 Tsay trönuchömi jiruruypa karqan ishkay chunka chusku (24) trönukuna. Tsay trönukunamanmi yuraq latsapashqa y qori corönan jatishqa mayor runakuna jamakuyarqan. 5 Chawpincho kaykaq trönupitami atsikyaypa atsikyar illaqukuy yarqamurqan. Illaqukuypis bunruruypa bunrururmi wiyakämurqan.† Trönupa ñöpanchömi qanchis candelabrukuna tsariykäyarqan.† Tsaykunami kayarqan Tayta Diospa qanchis espïritunkuna.† 6 Trönu ñöpanpanami kuyayllapä cristal vidriu niraq lamar rikakarqan.
Tsay trönu entëru kuchunpami chusku kawaykaqkuna† kayarqan. Paykunapami entëru cuerpuncho ñawinkuna karqan. 7 Punta kaqmi leonnö karqan. Ishkay kaqnami törunö karqan. Kimsa kaqnami runanö karqan. Chusku kaqnami pajaykaq ankanö karqan.† 8 Tsay chuskun kawaykaqkunaqa soqta älayuqmi kayarqan. Tsaynöpis entëru cuerpunchömi ñawinkuna karqan.†
Tsay kawaykaqkunami paqaspa junaqpapis niyarqan:
“¡Santu, santu, santu!
¡Llapanpä munayyuq Tayta Dios santumi kaykan!†
¡Payqa unaypita kawaq, kananpis kaykaq y shamunanpä kaqmi kaykan!”
9 Trönuncho jamaraykaq imayyaqpis kawaq Tayta Diosta tsaynö adorar agradëcikurnin alabayaptinmi 10 tsay ishkay chunka chusku (24) mayor runakunapis imayyaqpis kawaq Tayta Diospa ñöpanman lätakaykur adorayarqan. Corönankunata jipiskirmi Tayta Diospa trönunpa ñöpanman churaykur niyarqan:
11 “Señor Tayta Diosllä, qamllami llapanpä munayyuq kanki.
Llapan imatapis qammi kamashqayki.
Kawayta qaranqaykipitami llapanpis kawayan.
Tsaymi llapanpis respitayäshurniki alabayäshunki”.