“Noqa rikaykämi llapan rurayanqaykikunata. Tayta Dios munanqannö kawayanqaykita runakuna yarpäyaptinpis qamkunaqa wanushqanömi kaykäyanki.

2 “Shonquykikuna manarä chukruyanqanyaq Tayta Dios munanqannö kawayänaykipä shumaq yarpachakuyay. Allita rurayanqaykita yarpäyaptikipis Tayta Diospäqa manami allitsu. 3 Yachakuyanqaykita y wiyayanqaykita mana qonqaypa cäsukuyay. Jutsa rurayta kacharir munanqänöna kawayay. Tsaynö mana kawayaptikiqa illaqpita suwa shamunqannömi qamkunata castiganäpä shamushä.^†

4 “Wallkaqllami Tayta Dios munanqannö kawaykäyanki. Tsaynö kawayanqaykipitami yuraq latsapaykikuna jatishqa ñöpächo kawayanki. 5 Imanö ñakarpis mana ajayaypa yärakamuqkunaqa yuraq latsapan jatishqami kayanqa. Paykunapa jutinkunata Libru de la Vïdapita^† manami börrashätsu. Taytäpa y angelkunapa ñöpanchömi favornin parlashä.^†

6 “Espíritu Santumi iglesiakunata tsaynö nin. Rinriyuq kaqkunaqa ninqäkunata wiyakuyätsun.

7 “Filadelfia markacho iglesiapa angelninpä kay ninqäta qellqay: Noqaqa santumi kä. Ninqäkunata cumplïmi. Davidpa llävintami tsararaykä. Tsaymi punkuta kichaptï ni pipis wichqanqatsu. Wichqaptï manami ni pipis kichanqatsu.^†

8 “Noqa rikaykämi llapan rurayanqaykikunata. Munayniynaq kaykarpis mana ñëgamaypami ninqäkunata cumpliyashqayki. Tsaymi gloria punkuta kichapashqä. Tsay punkupa yaykuyaptiki manami pipis michäyäshunkitsu.

9 “Markaykicho wakin runakuna ‘Tayta Dios kuyanqan Israel runami kayä’ nikarpis llullakuykäyanmi. Paykunaqa Satanás munanqantami ruraykäyan. Tayta Dios kuyanqan runakuna kayanqanta niyaptinpis qamkunatami noqa kuyä. Tsayta musyayänanpämi^† ñöpaykiman qonqurikuyänanpä mandashä.^†

10 “Ninqäta cumplirmi imanö ñakarpis mana ajayaypa yärakaykäyämunki. Tsaynö kayanqaykipitami maytsaycho taq runakuna pasaypa ñakayänanpä kaq tiempu^† chämuptinpis qamkunawan kaykäshä.

11 “Noqaqa shamunäpänami kaykä. Tsaynö kaykaptinqa yachatsinqäkunata mana qonqaypa cäsukuyay. Tsaynöpami corönaykita pipis qechuyäshunkitsu. 12 Imanö ñakarpis mana ajayaypa yärakamuqkunataqa Diosnïpa templuncho columna kayänanpämi churashä. Tsaymi mana yarquypa tsaycho imayyaqpis kayanqa. Paykunamanmi Tayta Diosnïpa jutinta y markanpa jutinta qellqashä. Tsay markaqa ciëlupita shamuq mushuq Jerusalénmi.^† Tsaynöllami kikïpa mushuq jutïtapis paykunaman qellqashä.^†

13 “Espíritu Santumi iglesiakunata tsaynö nin. Rinriyuq kaqkunaqa ninqäkunata wiyakuyätsun.

14 “Laodicea markacho iglesiapa angelninpä kay ninqäta qellqay: Noqami Tayta Dios awninqankunata cumplï. Imaypis rasun kaqllatami nï. Noqawanmi Tayta Dios llapantapis kamarqan.^†

15 “Noqa rikaykämi llapan rurayanqaykikunata. Musyämi ni alaq ni achaq mana kayanqaykita.^a Tsaypa trokinqa alaq karpis o achaq karpis jukllaylla kayankiman. 16 Alaqpis o achaqpis kayänaykipa trokin yanqa qoñuqlla kayanqaykipitami shimïpita aqturishayki.

17 “Imaykayuq kayanqaykiman yärakurmi ‘Imapis manami pishïyämantsu’ nikäyanki. Tsaynö nirpis manami cuentata qokuyankitsu kuyapaypä muchuq, qapra y qallapächu kaykäyanqaykita. 18 Rasunpaypa imaykayuq kayta munarqa ninawan tsullutsishqa qori püruta noqapita rantiyay. Qallapächu kayta mana munarqa yuraq latsapata noqapita rantiyay. Qapra kayta mana munarqa noqapita jampita rantiyay. Tsaynöpami imaykayuq, alli latsapashqa y alli rikaq kayanki.

19 “Kuyanqä kaqtaqa llutanta ruraptin corrigïmi.^† Tsaynö kaykaptinqa jutsa ruraykunata kacharir llapan shonquykikunawan sirviyämay. 20 ¡Tantiyakuyay! Punkuykipitami qayakaykämü. Mayqaykipis qayakamunqäta wiyar kichapämaptikiqa yaykamuptï juntumi mikushun. 21 Imanö ñakarpis mana ajayaypa yärakamuqkunataqa noqawan mandaq kayänanpämi churashä.^† Satanásta vincinqäpitami^† noqatapis Taytä churamashqa paywan imayyaqpis mandaq kanäpä.

22 “Espíritu Santumi iglesiakunata tsaynö nin. Rinriyuq kaqkunaqa ninqäkunata wiyakuyätsun”.