2 “Noqa rikaykämi imaypis yärakamur llapan rurayanqaykikunata. Llutan yachatsikuqkunata manami chaskipäyashqaykitsu. Apóstol tukuqkuna llutanta yachatsir kaykaqtami tariyashqayki. 3 Yärakayämunqaykipita ñakatsiyäshuptikipis mana ajayaypami munanqänö kawaykäyanki.

4 “Itsanqa manami gustamantsu ñöpata kuyakuq kayanqaykita kachariyanqayki. 5 Ñöpata kuyakuq kayanqaykinö kananpis kuyakuq kayay. Tsaynö mana kayaptikiqa [illaqpita] shamurmi ñöpächo kaykaq candelabruykita jipiskishä.

6 “Tsaynö karpis nicolaíta runakunapa mana alli rurayninkunata^† mana chaskipar allitami ruraykäyanki. Paykuna yachatsiyanqankunata manami wiyaytapis munätsu.

7 “Espíritu Santumi iglesiakunata tsaynö nin. Rinriyuq kaqkunaqa ninqäkunata wiyakuyätsun. Imanö ñakarpis mana ajayaypa yärakamuqkunataqa Tayta Diospa ñöpanchömi imayyaqpis kawatsikuq jachapa wayuyninta qarashä”.^†

8 “Esmirna markacho iglesiapa angelninpä kay ninqäta qellqay: Noqami qallanan y ushanan kä. Wanunqäpitapis kawarimushqämi.

9 “Noqa rikaykämi [llapan rurayanqaykikunata,] ñakayanqaykita y muchuq kayanqaykitapis. Muchuq karpis rasunpaypa imaykayuqnömi kaykäyanki. Tsaynöpis wiyaykämi wasayki rimaykäyanqanta. Tsay runakunaqa ‘Tayta Dios kuyanqan Israel runami kayä’ nikarpis Satanás munanqantami ruraykäyan.

10 “Ñakaykuna qamkunaman chaykämunnami. Tsaynö kaptinpis ama mantsakäyaytsu. Diablu ishkitsiyäshuynikita munarmi wakinnikita carcelman wichqatsiyäshunki. Tsaychömi chunka junaq ñakayanki. Tsaynö kaptinpis wanuyanqaykiyaq mana ajayaypa noqaman yärakayämuy. Tsaynö kayaptikimi corönata qarayäshayki. Tsay corönaqa mana ushakaq kawaymi kanqa.

11 “Espíritu Santumi iglesiakunata tsaynö nin. Rinriyuq kaqkunaqa ninqäkunata wiyakuyätsun. Imanö ñakarpis mana ajayaypa yärakamuqkunaqa manami nina qochaman jitarpushqatsu kayanqa”.^†

12 “Pérgamo markacho iglesiapa angelninpä kay ninqäta qellqay: Noqami ishkan lädunpa afilashqa espädä aptashqa kaykä.

13 “Noqa rikaykämi [llapan rurayanqaykikunata y] markaykicho Satanáspa trönun kanqanta. Tsaynö kaptinpis mana ajayaypami noqaman yärakaykäyämunki. Willakuynïta willakuq Antipasta tsay markacho wanutsishqa kayaptinpis mana ajayaypami yärakayämushqayki.

14 “Itsanqa wakin ruraykäyanqaykikuna manami gustamantsu. Wakikikunami Balaam yachatsinqannö llutanta yachaykätsiyanki. Pay yachatsiptinmi Balac jutiyuq runa Israel runakunata^† fiestankunaman qayatsiyarqan ïdulukunapa jutincho pishtayanqan aytsata mikuyänanpä. Tsaynöllami runakunata yachatsirqan fornicación jutsata rurayänanpä.^†

15 “Tsaynöpis wakinnikikunaqa nicolaíta runakunapa yachatsikuynintami chaskiyashqayki. [Tsay yachatsikuyta manami wiyaytapis munätsu.] 16 Tsaynö kaptinqa tsay yachatsikuykunata kachariyay. Mana kachariyaptikiqa qamkuna kaqman illaqpita shamurmi shimïpita yarqamuq espädawan ushakätsiyäshayki.

17 “Espíritu Santumi iglesiakunata tsaynö nin. Rinriyuq kaqkunaqa ninqäkunata wiyakuyätsun. Imanö ñakarpis mana ajayaypa yärakamuqkunataqa ciëlucho churaraykaq maná mikuytami^† qarashä. Tsaynöllami yuraq rumicho mushuq jutin^† qellqaraykaqta entregashä. Tsay mushuq jutitaqa yuraq rumita chaskiqkunallami musyayanqa”.

18 “Tiatira markacho iglesiapa angelninpä kay ninqäta qellqay: Noqami Tayta Diospa Tsurin kä. Ñawïpis ninanörämi atsikyaykan. Chakïpis chipipiykaq broncipita rurashqanömi kaykan.

19 “Noqa rikaykämi llapan rurayanqaykikunata y pïmaywanpis kuyanakuyanqaykita. Tsaynöpis musyaykämi noqaman yärakayämunqaykita, yanapakuq kayanqaykita y munanqänö imaypis kawayanqaykita. Unay sirviyämanqaykipita masmi sirviyämanki.

20 “Itsanqa manami gustamantsu Jezabel^† llutanta yachatsiptin mana michäyanqayki. Tsay warmiqa profetïsa tukurmi noqaman yärakamuqkunata criyitsir yachaykätsin fornicación jutsata rurayänanpä y ïdulukunapa jutincho pishtayanqan aytsata mikuyänanpä. 21 Kananyaqnami shuyarashqä jutsankunata tsay warmi kacharinanpä. Tsaypis jutsa rurayta manami kacharintsu.

22 “Tsaymi payta qeshyawan castigashä. Tsay warmi yachatsinqanta chaskikuqkunatapis jutsa rurayta mana kachariyaptinqa pasaypami castigashä. 23 Paykunapa wamrankunatapis wanutsishämi. Tsaynöpami noqaman yärakamuqkuna tantiyakuyanqa runakuna imata yarpäyanqantapis musyanqäta.^† Noqaqa imatapis rurayanqanman tupumi pïmaytapis juzgashä.^†

24 “Wakinnikikunaqa tsay warmipa llutan yachatsikuyninkunata manami chaskipäyashqaykitsu. ‘Mas allinnin kaq yachatsikuyta yachakushun’ niptinpis tsay yachatsinqankunaqa Satanáspitami kaykan. Tsaymi qamkunata nï: 25 Noqa yachatsinqäkunata shamunqäyaq mana qonqaypa cäsukuyay. 26 Imanö ñakarpis mana ajayaypa yärakamuqkunataqa nacionkunata munaynincho tsararäyänanpämi churashä. 27 Mandakunäpä Taytä churamanqannömi paykunatapis mandaq kayänanpä churashä. Tsaynö munayyuq karmi nacionkunata fiërru väranwan mandayanqa. Mitu mankata pakiqnömi paykunata ushakätsiyanqa.^† 28 Tsay mandaqkunatami waraq lucëruta^† entregashä.^a

29 “Espíritu Santumi iglesiakunata tsaynö nin. Rinriyuq kaqkunaqa ninqäkunata wiyakuyätsun.