Apocalipsis
Librupa qallaykunan
1
Kay libruchömi qellqaraykan Jesucristuta Tayta Dios revelanqan. Jesucristumi angelninta kachamur tsay revelacionta sirviqnin Juanta revelarqan. Tsay revelacionwanmi sirviqninkunata imapis päsananpäna kaqkunata tantiyatsirqan. 2 Juannami tsay revelacionta qellqar Tayta Dios ninqankunata, Jesucristo ninqankunata y llapan rikanqankunata qellqashqa.3 Kushishqami kayanqa kay qellqaraykaqkunata liyiqkuna y liyipäyanqanta wiyar cäsukuqkunapis. Kay qellqaraykaqkunaqa cumplinanpänami kaykan.
Qanchis iglesiakunacho qorikaq wawqikunata panikunata winchikunqan
4 Asia provinciacho kaykaq qanchis iglesiakunacho qorikaq wawqikuna panikuna:
Noqa Juanmi qamkunaman qellqaykämü. Unaypita kawaq, kananpis kaykaq y shamunanpä kaykaq Tayta Dios y trönunpa puntancho kaykaq qanchis espïritukunapisa kuyapäyäshurniki alli kawayänaykipä yanapaykuyälläshuy.†
5 Jesucristupis alli kawayänaykipä qamkunata yanapaykuyälläshuy. Paymi Tayta Dios munanqannölla willakuyninta willakushqa y wanushqakunapita puntata kawarimushqa.† Kay patsacho llapan mandaq reykunapitapis mas munayyuqmi.† Paymi kuyamarnintsik yawarninta jichar llapan jutsantsikta mayllamashqantsik.
6 Mandamaqnintsik rey karmi munaynincho kanantsikpä qorimashqantsik. Tsaynöpis Taytan Diosta sirviq sacerdötikuna kanantsikpämi churamashqantsik.† ¡Jesucristo imaypis alabashqa kaykullätsun! ¡Pay japallan mandamaqnintsik kaykullätsun! Amén.
7 ¡Pukutay jananchömi Jesucristo kutimunqa!†
Kutimuqtami llapan runakuna rikayanqa.
Payta tuksir wanutsiqkunapis rikayanqami.†
Kutimuqta rikarmi maytsaychöpis runakuna waqayanqa.
Tsaynömi kanqa. Amén.
8 Unaypita kawaq, kananpis kaykaq y shamunanpä kaykaq munayyuq Tayta Diosmi nin: “Alfa y Omegami noqa kä.b [Qallanan y ushananmi kaykä]”.†
Jesucristuta Juan rikanqan
9 Noqaqa Jesucristuman yärakuq mayiki Juanmi kaykä. Qamkunanöllami Jesucristupa mandakuynincho kaykä. Ñakatsiyäshunqaykinöllami noqatapis Jesucristuman yärakunqäpita ñakatsiyäman. Qamkunanöllami mana ajayaypa shuyakuykä paypa ñöpanman chänäpä. Tayta Diospa willakuyninta willakunqäpita y Jesucristo salvamaqnintsik kanqanta willakunqäpitami Patmos islacho prësu kaykä.
10 Tsaycho kaykarmi domingu junaq Espíritu Santupa munaynincho kar wiyarqä cornëta tukamuqnörä qepächo nimuqta: 11 “[Alfa y Omegami noqa kä. Qallanan y ushananmi kä.] Revelacioncho rikatsinqäkunata juk rölluman qellqaykur apatsiy [Asia provincia] qanchis markakunacho kaykaq iglesiakunaman. Tsay markakunami kayan Éfeso, Esmirna, Pérgamo, Tiatira, Sardis, Filadelfia y Laodicea”.
12 Qepächo parlamuqta wiyarmi tikrarqä pï kanqantapis rikanäpä. Tsaychömi rikarqä qoripita rurashqa qanchis candelabrukunacho nina tsariykaqta.† 13 Tsay candelabrukuna chawpinchömi runapa tsurinnö kaykaqta rikarqä.† Paymi chaki puntanyaq latsapan jatishqa kaykarqan. Pëchunpami qoripita rurashqa wachukuwan wataraykarqan.† 14 Aqtsanpis yuraq millwanö y rashtanö yuraqmi karqan.† Ñawinnami ninanörä atsikyarqan. 15 Chakinkunapis pulishqa broncinörämi chipipirqan.† Parlanqanpis atska yaku aywar qayaraqnörämi karuman wiyakarqan.† 16 Derëcha kaq makinchömi qanchis qoyllurkunata tsarararqan. Shiminpitanami ishkan lädunpa afilashqa espäda yarqamurqan. Qaqllanpis rupaynörämi chipipirqan.
17 Payta rikaykurmi ñöpanman wanushqanö ishkiskirqä. Tsaymi derëcha kaq makinwan yataykamar nimarqan: “Ama mantsamaytsu. Noqami qallanan y ushanan kaykä.† 18 Imayyaqpis kawaqmi kä. Imayyaqpis kawanäpämi wanutsiyämanqanpita kawarimushqä. [Amén.] Noqami tsararaykä wanushqakunapa almankuna kaykäyanqan llävita.c 19 Llapan rikanqaykita qellqay. Kanan päsaykanqanta y päsananpä kaqkunatapis llapanta qellqay.
20 “Kananmi tantiyatsishayki derëcha kaq makïcho rikanqayki qanchis qoyllurkuna y qoripita qanchis candelabrukuna ima kanqantapis. Qanchis qoyllurkuna kaykäyan tsay qanchis iglesiakunapa angelninkunami. [Rikanqayki] qanchis candelabrukuna kayan tsay qanchis markakunacho kaykaq iglesiakunami”.