Jesucristuta ciëlucho alabayanqan
5
Tsaypitanami trönucho jamaraykaqpa derëcha kaq makincho rölluta rikarqä. Tsay rölluqa jananpa y rurinpami qellqaraykarqan. Qanchis kutimi cërawan kuchun laqararqan.† 2 Tsaychömi juk munayyuq angelta rikarqä. Paymi jinchi qayakur nirqan: “¿Pillarä cërankunata jipiskir rölluta kichaykunman?”3 Tsaynö niptinpis ciëlucho, ni kay patsacho ni patsa rurinchöpis tsay rölluta kichananpä ni qellqaranqanta rikananpäpis manami pipis karqantsu.
4 Pipis tsay rölluta kichananpä ni liyinanpä mana kaptinmi pasaypa llakikur waqarqä. 5 Tsaymi ishkay chunka chusku (24) mayor runakunapita juknin nimarqan: “Ama waqaytsu. ‘Judá trïbupita yuriq León’† ninqan runami Satanásta vincishqa.† Paymi munayyuq kaykan qanchis cërata jipiskir rölluta kichananpä. Payqa rey Davidpita aywaraqmi kaykan”.†
6 Tsaynö nimaptinmi juk Carnishtaa † rikarqä. Wanutsishqanö karpis trönu ñöpanchömi kawaykar ichiraykarqan. Tsaynöllami chusku kawaykaqkunapa chawpincho y ishkay chunka chusku (24) mayor runakunapa chawpincho kaykarqan. Qanchis waqrayuq y qanchis ñawiyuqmi karqan.b Tsay qanchis ñawinkunaqa Tayta Dios kay patsaman kachamunqan qanchis espïritukunami kaykäyan.
7 Trönucho jamaraykaqpa derëcha kaq makinpitami rölluta Carnish chaskirqan. 8 Chaskiskiptinmi ñöpancho kaq chusku kawaykaqkuna y tsaycho kaq ishkay chunka chusku (24) mayor runakunapis ñöpanman lätakaykur adorayarqan. Paykunaqa llapanmi arpankunawan kaykäyarqan. Tsaynöpis qoripita rurashqa tazonwanmi inciensiuta tsararäyarqan. Tsay inciensiuqa Tayta Diosman yärakuqkuna mañakuyanqankunami karqan.†
9 Paykunami mushuq alabanzata cantarnin Carnishta alabar niyarqan:†
“Qamllami munayyuq kanki tsay rölluta chaskiskir kichanaykipä.
Qammi runakuna raykuq wanushqayki.
Yawarnikita jicharmi Tayta Diospä runakunata rantishqayki.
Tsaymi runakunata Tayta Dios salvashqa pï casta kayaptinpis, ima idiömata parlayaptinpis, may markacho täyaptinpis y may nacionpita kayaptinpis.
10 Tayta Diosnintsikpa munaynincho kayänanpä y sirviqnin sacerdötikuna kayänanpämi churashqayki.†
Paykunami patsacho mandaq kayanqa”.
11 Tsaypitanami yupaytapis mana atipaypä angelkuna Carnishta alabaykäyaqta rikarqä.† Paykunami trönupa ñöpancho, chusku kawaykaqkunapa ñöpancho y ishkay chunka chusku (24) mayor runakunapa ñöpanchöpis alabar 12 jinchi niyarqan:
“¡Runakuna raykuq wanutsiyanqan Carnishqa† llapanpä munayyuqmi!
¡Paymi llapan kamanqankunapapis duëñun kaykan!
¡Paynöqa manami pipis yachaq kantsu!
¡Llapan kawaqkuna payta imaypis alabaykuyällätsun!”
13 Tsaynöllami wiyarqä ciëlucho kaykaqkuna, kay patsacho kaykaqkuna, patsa rurincho kaykaqkuna, lamar rurincho kaykaqkuna y llapanpis Tayta Dios kamanqan kaqkuna alabarnin nikäyaqta: “¡Trönucho jamaraykaq Tayta Dios y ñöpancho kaykaq Carnish imayyaqpis alabashqa kaykullätsun!”
14 Tsaynö alabayaptinmi Tayta Diospa ñöpancho kaykaq chusku kawaykaqkuna “¡amén!” niyarqan. Tsaynöllami ishkay chunka chusku (24) mayor runakuna lätakaykur [imayyaqpis kawaq] Tayta Diosta adorayarqan.