Israel runakuna aywar sïguiyänanpä ninqan
33
Tayta Diosmi mastapis Moisésta nirqan: “Kananqa Egiptupita jipimunqayki runakunata pushar ayway Abrahamta,† Isaacta† y Jacobta† awninqä nacionman. Tsay naciontami awnirqä paykunapita aywaraqkunata rikatsinäpä. 2 Qamkunata yanapayäshunaykipämi angelnïta kachamushä. Tsayman chäyaptikinami cananeo runakunata, amorreo runakunata, heteo runakunata, ferezeo runakunata, heveo runakunata y jebuseo runakunatapis qarqushä. 3 Yakunörä atska lichipis abëjapa mishkinpis kaykaq nacionman aywayay. Mana cäsukuq kayaptikimi qamkunawan aywashänatsu. Qamkunawan aywarqa usharpis ushakaykatsïmanchi”.4 Tayta Dios tsaynö ninqanta Moisés willaptinmi Israel runakuna pasaypa llakikurnin alli latsapatawan alhäjakunata jatikuyarqannatsu. 5 Tsaynö llakikuyarqan Moisésta Tayta Dios nishqa kaptinmi: “Qamkunaqa mana wiyakuq runakunami kayanki. Tsaymi qamkunawan juk rätullapis aywarqa usharpis ushayküman. Alhäjaykikunata y alli latsapaykikunataqa ama jatikuyaynatsu. Yarpachakushärämi qamkunata imanö castiganäpä kanqantapis”.
6 Tsaynö niptinmi Horeba jirka chakinpita Israel runakuna aywakur alhäjankunata y alli kaq latsapakunata jatikuyarqannatsu.
Tinkuna Tolducho Moiséswan Tayta Dios parlanqan
7 Israel runakunapa campamentunpita mas karulächömi Moisésqa juk tolduta ichïtsirqan. Tsaytami jutitsirqan Tinkuna Toldu jutin kananpä.b Pipis Tayta Diosta ashiyta munarqa tsay toldumanrämi aywayaq.
8 Moisés tsayman aywaptinmi Israel runakunaqa toldunkuna punkunman ichiykur rikaräyaq Tinkuna Tolduman yaykunqanyaq. 9 Moisés yaykuskiptinmi tsay toldu punkuman pukutay urämuq. Moiséswan Tayta Dios parlanqanyaqmi toldu punkucho ichiraykaq pukutay ichiraq. 10 Tsay toldu punkucho pukutay ichiraykaqta rikarmi llapan runakuna toldunkuna punkullanpita Tayta Diosta adorayaq. 11 Amïgunwan runa parlaqnömi Moiséswan Tayta Dios parlayaq. Tsaynö parlaskirmi Moisésqa campamentuman kutiq. Moisésta yanapaq chölu Josuémi itsanqa Tinkuna Toldupita imaypis yarquqtsu. Josuéqa Nunpa tsurinmi karqan.
Tayta Diospa qaqllanta Moisés rikayta munanqan
12 Moisésmi Tayta Diosta nirqan: “Taytay, kay runakunata pushanäpämi nimashqayki. Tsaynö kaptinpis manami nimankirätsu pï wallkimänanpä kanqantapis. Tsaynöllami nimashqayki amïguyki kaptï kuyapämanqaykita. 13 Rasunpaypa kuyapämarqa imata yarpanqaykitapis willaykamay. Tsaynöpami kuyapäyämanqaykita tantiyashä. Ama qonqaykullaytsu kay runakunata kikiki akranqaykita”.
14 Tsaymi Tayta Dios nirqan: “Kikïmi wallkishayki. Noqami jamayta qoshayki”.†
15 Tsaynami Moisés nirqan: “Mana wallkiyämänayki kaptinqa kaypita ama jipiyämaytsu. 16 Mana wallkiyämaptikiqa ¿imanörä musyayäshä kuyapäyämanqaykita? Wakin casta runakunapitapis noqakunata mas kuyayämanqaykita ¿imanörä musyayäshä?”
17 Tsaynö niptinmi Tayta Dios nirqan: “Amïgü kaptikimi kuyaparniki mañakamanqaykinö wallkishayki”.
18 Tsaymi Moisés nirqan: “Taytay, rugakulläshayki. Kikikitami rikayta munä”.
19 Tsaynö niptinmi Moisésta Tayta Dios nirqan: “Kuyapanqä kaqtami kuyapä. Perdonayta munanqä kaqtami perdonä.† Tsaymi ñöpaykipa päsar kuyapäkuq kanqäta musyatsishayki. Tsaynöpis jutï Yahweh kanqantami willashayki. 20 Tsaynö kaptinpis qaqllätami itsanqa rikankitsu. Pipis qaqlläta rikaq kaqqa wanunqami”.