2 Tsaynö niyaptinmi Aarón nirqan: “Warmikikuna y tsurikikuna jatiräyanqan qori arëtikunata apayämuy”.

3 Tsaymi jatiräyanqan qori arëtikunata Aarónman llapan apayarqan. 4 Aarónnami tsay qorita tsullurkatsir fundirqan taksha torïtuta.^† Tsayta rikaykurmi llapan niyarqan: “¡Israel runakuna, kaymi Egiptupita jipimaqnintsik diosnintsik!”

5 Tsayta rikarmi Aarónqa torïtupa ñöpancho juk altarta rurarqan. Nirkurnami Israel runakunata nirqan: “Waray junaqmi Tayta Diospa jutincho fiestata rurashun”.

6 Tsaynö niptinmi waraynin junaq tsaka tsakalla shärikuskir uywakunata pishtar rupatsina sacrificiukunata y alli päsakuy sacrificiukunatapis rupatsiyarqan. Nirkurmi llapan jamaykur mikuyarqan y upyayarqan. Kushikurmi jukninpis jukninpis jutsata rurar kakuyarqan.^†

7 Tsaymi Moisésta Tayta Dios nirqan: “Kay jirkapita ras kutiy. Egiptupita jipimunqayki Israel runakunami jutsata rurar kaykäyan. 8 Paykunaqa manaräpis unaytami qonqaskamar qoripita torïtuta ruraskir adoraykäyan. Tsaynöllami sacrificiukunata rupatsir nikäyan: ‘¡Israel runakuna, kaymi Egiptupita jipimaqnintsik diosnintsik!’ ”

9 Mastami Moisésta Tayta Dios nirqan: “Noqa rikashqämi Israel runakuna pasaypa mana wiyakuq kayanqanta. 10 Paykunapa janan ama shäriynatsu. Pasaypa ajanätsiyämanqanpitami paykunata ushakätsishä. Qamllapitanami mirayanqa jatun nación kayanqanyaq”.

11 Tsaynö niptinmi Tayta Diospa ajanaynin qallqünanpä rugakur Moisés nirqan: “Tayta Dios, munayyuq kanqaykita pïmaytapis musyatsirmi Israel runakunata Egiptupita jipimurqayki. Tsaynö jipiykämurqa Israel runakunapä ama tsayjinanpa ajanaykullaytsu. 12 Ushakätsiptikiqa Egipto runakunami niyanqa: ‘Tsunyaq jirkacho ushakätsinanpäku kay nacionpita jipishqa’. Tsaynö mana parlayänanpä ama ushakaykatsillaytsu. Taytay, tsaypa trokinqa jutsata rurayanqanpita perdonaykullay. 13 Sirvishuqniki Abrahamta, Isaacta y Israelta^a awninqaykita yarpaykullay. Paykunatami nirqayki: ‘Noqami qamkunapita aywaraqkunata alli rikashä qoyllurkunanörä atska kayänanpä.^† Awninqänöllami paykunata rikatsishä kay llapan jallqakunata y raqrakunata imayyaqpis herenciankuna kananpä’ ”.^†

14 Tsaynö Moisés rugakuptinmi Israel runakunata kuyaparnin Tayta Dios ushakätsirqantsu.^†

15 Tsay jirkapita urämurmi Moisés apamurqan ishkay läja rumikunata. Tsay läjakunachömi Israel runakunawan Tayta Dios ruranqan pactu ishkan lädunpa qellqashqa karqan. 16 Tsay läjakunataqa kikin Tayta Diosmi rurarqan. Tsaycho qellqaraykaqkunataqa kikin Tayta Diosmi qellqarqan.

17 Runakunata qayaykachaqta wiyarmi Josuéqa Moisésta nirqan: “Guërracho pelyar qayaraykaqnörämi campamentucho wiyakaykämun”.

18 Moisésnami nirqan: “Manami vinciskirtsu ni vinciyanqanpitatsu qayaykachäyan, sinöqa fiestata rurar cantayanqanmi wiyakaykämun”.

19 Israel runakunapa campamentunman chaykurmi Moisés rikarqan qoripita rurashqa torïtuta y runakuna tushur kaykaqta. Tsayta rikaykurmi pasaypa ajanar apamunqan läjakunata pakiqpä saqtaskirqan. 20 Nirkurnami qoripita rurashqa torïtuta ninaman jitaskirqan. Tsaypitanami ñuchu aqaskir yakuman wiñarnin tsay yakutana Israel runakunata uputsirqan.

21 Aaróntanami Moisés nirqan: “Israel runakuna ¿imanayäshushqaykitä kayjinanpa jutsata ruratsinaykipä?”

22 Tsaynö niptinmi Aarón nirqan: “Taytay, ama ajanaykullaytsu. Qampis musyankimi kay runakuna jutsa rurayllapä imaypis kayanqanta. 23 Paykunami niyämashqa: ‘Diosnïkunata rurapäyämay kaypita pushamänantsikpä. Egiptupita jipimaqnintsik Moisésta ima päsanqantapis manami musyantsiktsu’. 24 Tsaymi nirqä qorita tsararaqkuna qorinta apayämunanpä. Apayämuptin ninaman wiñaptïmi torïtuman tikrashqa”.

25 Tsaynö niptinmi Moisés tantiyarqan Israel runakuna jutsata rurananpä Aarón jutsayuq kanqanta. Tsaymi yarpachakur nirqan: “Kananqa Israel runakunata contrankuna jamurar manakaqmanchi churayanqa”.

26 Tsaymi campamentu yaykunaman aywar Israel runakunata Moisés nirqan: “Mayqaykipis Tayta Diosta cäsukuyta munaqkuna noqa kaykanqäman qorikäyämuy”.

Tsaynö niptinmi levitakuna Moisés kaykanqanman qorikäyarqan.

27 Paykunatami Moisés nirqan: “Tayta Diosmi nin: ‘Llapayki campamentu juk kuchunpita jukaq kuchunyaq espädaykikunawan runakunata wanutsiyanki castayki, vecïnuyki o amïguyki kaptinpis’ ”.

28 Tsaymi Moisés ninqannö rurar tsay junaqcho kimsa waranqatanö (3,000) runakunata wanutsiyarqan.

29 Tsaypitanami levitakunata Moisés nirqan: “Tayta Diosta cäsukurmi qamkunaqa tsurikikunapa y castaykikunapa contranpis shäriyashqayki. Tsaymi kanan junaq Tayta Dios churayäshushqayki payta imaypis sirviyänaykipä”.

30 Tsaypita waraynin junaqnami Israel runakunata Moisés nirqan: “Qamkunaqa pasaypami jutsata rurayashqayki. Kananmi Tayta Dios kaykanqan jirkaman yapay kutishä. Capazchi qamkunapä rugakuptï perdonayäshunkiman”.

31 Tsaynö nirmi Tayta Dios kaykanqan jirkaman kutiykur Moisés rugakurqan: “Qoripita diosninkuna ruraykurmi Israel runakunaqa jutsata rurayashqa. 32 Taytay, tsaymi perdonaykunaykipä mañakullä. Mana perdonarqa libruykicho^† qellqaraykaq jutïtapis pitsaskillay”.

33 Tsaynö niptinmi Tayta Dios nirqan: “Noqata mana cäsukamaqpa jutintami librüpita pitsashä. 34 Kanan kutir runakunata awninqä nacionman pushay. Angelnïmi wallkishurniki puntaykita aywanqa. Tsaynö kaptinpis Israel runakuna jutsata rurayanqanqa manami tsayllachötsu ushakanqa, sinöqa castiganä junaq chämuptinmi paykunata castigashä”.

35 Ninqannöllami Israel runakunata Tayta Dios mantsariypa qeshyawan castigarqan. Tsaynö castigarqan Aarón rurapanqan torïtuta adorayanqanpitami.