Sagrädu Tolduta rurayänanpä Bezaleelta y Aholiabta akranqan
31
Tayta Diosmi mastapis Moisésta nirqan: 2 “Uripa tsurin y Hurpa willkan Bezaleelta noqami akrashqä. Payqa Judá trïbupitami. 3 Bezaleelman Espïritüta kachamurmi yachayta qarashqä. Tsaymi payqa imayka ruraytapis shumaq yachan. 4 Qoripita, qellaypita y broncipita kuyayllapä kaqkunata rurananpäpis yachaynin kanmi. 5 Kuyayllapä rumikunatapis llaqllayta yacharmi tsararaqninta shumaq ruraskir siguran. Tsaynöllami qerutapis llaqllayta yachan y tukuy niraq kuyayllapäkunatapis rurayta yachan. 6 Payta yanapananpämi Dan trïbupita Ahisamacpa tsurin Aholiabta churashqä. Tsaynöllami ninqäkunata ruratsinaykipä qamkunacho kaq llapan yachaq runakunatapis yachayta qarashqä. 7 Paykunami rurayanqa Tinkunantsik Tolduta, Pactu Babulta, Pactu Babulpa tsapananta y Tinkunantsik Toldupa llapan manëjunkunatapis. 8 Tsaynöllami rurayanqa mësata manëjuntinta, qoripita candelabruta manëjuntinta, inciensiuwan qoshnitsikuna altarta, 9 sacrificiuta rupatsina altarta manëjuntinta y jatun lavatoriutapis jamakunantinta. 10 Tsaynöllami rurayanqa Aarón jatikunanpä sagrädu latsapata y tsurinkuna jatikuyänanpä latsapakunatapis. 11 Tsaynölla rurayanqa sagrädu aceitita y Tinkunantsik Toldupä inciensiutapis. Qamta yätsinqänöllami llapantapis rurayanqa”.Jamay junaqpä tantiyatsinqan
12 Tayta Diosmi mastapis Moisésta nirqan: 13 “Jamay junaqta respitayänanpä Israel runakunata willanki. Jamay junaqmi imaypis señal kanqa qamkunapä y qamkunapita aywaraqkunapäpis. Tsaymi tsay junaqta respitar santu kayänaykipä qamkunata akranqäta tantiyayanki. 14 Jamay junaq sagrädu kaptinmi llapayki respitayanki. Tsay junaqta mana respitaq kaqtaqa wanutsiyanki. Tsay junaqcho ima aruytapis aruq kaqtaqa Israel runakunapita qarquyanki.
15 “Soqta junaqlla aruyanki. Qanchis kaq junaqchöqa sagrädu kaptin jamayanki.† Pipis jamay junaqcho aruq kaqqa wanutsishqami kanqa. 16 Tsaynö kaykaptinqa Israel runakuna imaypis jamay junaqta respitayätsun. Tsaynö respitarmi paykunawan pactu ruranqäta cumpliyanqa. 17 Ciëlutawan patsata soqta junaqcho kamaskirmi qanchis junaqcho jamarqä. Tsaymi Israel runakuna cäsukayämanqanta musyanäpä tsay junaq señal kanqa”.†
18 Sinaí jirkacho Moisésta parlapaskirmi ishkay läja rumikunaman dëdunwan qellqanqan leyninkunata Tayta Dios entregarqan. Tsay mandamientunkuna karqan paykunawan Tayta Dios ruranqan pactuta cumpliyänanpämi.