Inciensiuwan qoshnitsikuna altarta ruratsinanpä tantiyatsinqan
30
“Inciensiuta rupatsiyänaykipä altarta acacia qerupita ruratsinki. 2 Tsay altarpa largunpis anchunpis chusku chunka pitsqa (45) centïmetrumi kanqa. Altunmi isqun chunka (90) centïmetru kanqa. Chuskun kuchunkunacho altarwan juk piëzalla kananpä waqratanö ruratsinki. 3 Tsay altarta jananpa, lädunkunapa y waqrankunatapis qoriwan laqatsinki. Tsaynölla entëru kuchunpa qoripita rurashqa rebëtita churatsinki. 4 Tsay rebëti chakinpana cada esquïnanman qoripita argöllakunata churatsinki. Tsay argöllakunapami umrukuyänan qerukunata ullkatsiyanqa altarta puritsiyänanpä. 5 Tsay umrukuyänanta acacia qerupita ruraskatsir qoriwan jananpa laqatsinki. 6 Tsaypitana tsay altarta Pactu Babulta tsaparaq cortïna waqtanman churanki. Tsay babulpa tsapanan kaqchömi qamwan tinkushun.7 “Cada tuta candelabruta kamarinqan hörami Aarónqa tsay altarcho mushkuq inciensiuwan qoshnitsinqa. 8 Tsaynöllami cada tardipis candelabruta tsaritsinqan höra tsay altarcho yapay inciensiuwan qoshnitsinqa. Aarónwan tsurinkuna y paykunapita aywaraqkunapis noqapa ñöpächo imaypis tsaynö rurayätsun. 9 Tsay inciensiuwan qoshnitsikuna altarchöqa ama juk niraq inciensiuwan qoshnitsinkitsu.† Tsay altarchöqa ama rupatsina sacrificiuta ni tsaki mikuy ofrendakunatapis rupatsinkitsu. Tsaymanqa vïnutapis ama wiñapankitsu.
10 “Purificatsina sacrificiuta rupatsir watacho juk kutillami uywapa yawarninta altarpa waqrankunaman Aarón llushinqa. Tsay altar sagrädu kaptinmi purificatsina sacrificiuta cada wata imayyaqpis tsaynö rupatsiyanqa”.
Sagrädu Tolducho gastukunapä qellayta qoriyanqan
11 Moiséstami Tayta Dios nirqan: 12 “Israel runakunata censaptiki noqa Tayta Diospä cada ünun ofrendata apayämunqa. Tsaynöpami censakuyanqanpita qeshya ushanqatsu. 13 Llapan censashqa kaqkunami noqa Tayta Diospä pullan sicloa qellayta apayämunqa. Ofrendayanqan qellaykunataqa Tinkuna Tolducho pësakunawanmi pësayanqa. Tsay pësakunawan pësayaptinmi juk siclo qellay kanqa chunka juk grämu. 14 Ishkay chunka (20) watayuqpita janaman censashqa kaqkuna llapanmi noqa Tayta Diospä tsaynö ofrendata apayämunqa. 15 Mana ushakäyänanpä ofrendata apamurqa imaykayuq karpis manami masta apamunmantsu ni muchuq karpis wallkata apamunmantsu. Tsaypa trokinqa llapanpis iwalllami pullan siclo qellayta apayämunqa. 16 Tsay qellayta Israel runakunapita chaskirnin Tinkunantsik Tolducho gastukunapä churanki. Tsaynöpami censakuyanqaykipita ushakätsiyäshaykitsu”.
Broncipita lavatoriuta ruratsinanpä ninqan
17 Mastami Moisésta Tayta Dios nirqan: 18 “Mayllakuyänanpä lavatoriutapis jamakunantinta broncipita ruratsinki.† Tsay lavatoriuta Tinkunantsik Toldupita altarman aywana chawpinman jamaykatsir yakuta wiñatsinki. 19 Tsay lavatoriucho yakuwanmi Aarónwan tsurinkuna makinkunatawan chakinkunata mayllakuyanqa. 20 Tinkunantsik Tolduman manarä yaykurmi mayllakuyanqa mana wanuyänanpä. Tsaynöllami mayllakuyanqa altarcho noqapä sacrificiuta manarä rupatsir. 21 Makinkunatawan chakinkunata mana mayllakurqa wanuyanqami. Tsay ninqäkunaqa imayyaqpis leymi kanqa Aarónpä, tsurinkunapä y paypita aywaraqkunapäpis”.
Sagrädu aceitita ruratsinanpä tantiyatsinqan
22 Mastami Moisésta Tayta Dios nirqan: 23 “Qorinki soqta kïlu mïrra jachapa weqinta, kimsa kïlu canëlata, kimsa kïlu mushkuq cäñata 24 y soqta kïlu casia jachapa qarantapis. Tsaykunata pësanki Tinkunantsik Sagrädu Tolducho kaykaq pësakunawan. Tsaypita kimsa litru pullanta olïvupita rurashqa aceitita kamarinki. 25 Tsay llapan qorinqaykita takutsinki perfümita ruraqkuna takutsiyanqannö. Tsayqa sagrädu aceitimi kanqa. 26 Tsay aceitita wiñapanki Tinkunantsik Tolduta y Pactu Babulta. 27 Tsaynölla wiñapanki mësata manëjuntinta, candelabruta manëjuntinta y inciensiuwan qoshnitsikuna altarta. 28 Tsaynölla wiñapanki sacrificiuta rupatsina altarta manëjuntinta y lavatoriutapis jamakunantinta. 29 Tsaynö wiñapaptikimi llapanpis sagrädu kanqa. Tsaykunata töpaq kaqkunapis sagrädumi kayanqa.
30 “Sirvimaq sacerdötikuna kayänanpä tsay aceitita Aarónpa y tsurinkunapa jananmanpis wiñapanki. 31 Israel runakunata ninki: ‘Kay sagrädu aceitita imaypis rurayanki imamanpis wiñapaptin sagrädu kananpä. 32 Ama llutallaqa tsay aceitita pimanpis wiñapäyankitsu. Tsay sagrädu aceititanöqa ama rurayankitsu. 33 Pipis tsay aceititanö ruraq kaqtaqa o llutalla jukta wiñapaq kaqtaqa Israel runakunapita qarquyanki’ ”.
Inciensiuta ruratsinanpä tantiyatsinqan
34 Tayta Diosmi Moisésta yapay nirqan: “Qorinki Estacte jachapa weqinta, lamarcho kaq caracolpa qaranta, gálbano jachapa weqinta y inciensiu jachapa weqintapis. Tsay llapanta iwalllata qorinki. 35 Tsay llapan qorinqaykiwan mushkuq inciensiuta ruranki. Perfümi ruraq takutsinqannö llapanta shumaq takunki. Tsaymanqa imatapis ama takutsinkinatsu. Tsay inciensiuqa sagrädumi kanqa. 36 Pullanta shumaq ñuchu aqaskir Tinkunantsik Tolduman apar Pactu Babulpa ñöpanman churanki. Tsay inciensiuqa sagrädumi kanqa. 37 Tsay inciensiutanöqa pipis ama ruratsuntsu. Sagrädu karmi noqallapä kanqa. 38 Pipis mushkupänanpä tsay inciensiutanö ruraptinqa Israel runakunapita qarquyanki”.