Broncipita altarta ruranqan
38
Tsaynöllami sacrificiuta rupatsina altarta acacia qerupita Bezaleel rurarqan. Tsay altarpa anchun y largunmi karqan ishkay metru ishkay chunka pitsqa centïmetru (2.25). Altunnami karqan juk metru ishkay chunka pitsqa centïmetru (1.25). 2 Chuskun esquïnankunachömi waqratanö rurarqan. Tsay waqrakunaqa kayarqan altarwan tsay piëzallami. Altarpa jananta y rurintami bronciwan laqarqan. 3 Tsaynöllami altarpä uchpa qorikunata, tenäzakunata, trinchikunata, tazonkunata, kanallakunata y llapan manëjukunatapis broncipita rurarqan. 4 Tsaynöllami rejïllantapis broncipita ruraykur altar rurinman churarqan. Tsaynö churaptinmi tsay rejïlla quëdarqan altarpa pullannincho. 5 Tsaynöllami chusku argöllakunata broncipita fundirkur rejïllapa chuskun esquïnanman churarqan. Tsay argöllakunami karqan umrukuyänan qerukunata ullkatsinanpä. 6 Tsaynöllami altarta puritsiyänanpä acaciapita ishkay qerukunata ruraskir bronciwan jananpa laqarqan. 7 Tsay qerukunatami altarpa ishkanlächo kaykaq argöllankunapa ullkatsirqan tsaywan puritsiyänanpä. Tsay altarqa tablapitami tsapanaynaqlla karqan.Broncipita lavatoriuta ruranqan
8 Mayllakuyänanpämi lavatoriutapis jamakunantinta broncipita rurarqan.† Tsay lavatoriutami Tinkuna Toldupa patiuncho aruq warmikunapa espëjunkunapita rurarqan.a
Sagrädu Toldupa patiunta ruranqan
9 Tsaynöllami Tinkuna Toldupa patiuntapis rurarqan. Tsay patiuta jiruruypa tsaparänanpämi cortïnata awarqan llanulla putskashqa lïnu jïlupita. Sur kaqläpami largun karqan chusku chunka pitsqa (45) metru. 10 Patiupa cada ñöpanpämi ishkay chunka (20) jorcunkunata broncipita rurarqan. Jorcunkunapa jawiräkunantapis ishkay chunkatami broncipita rurarqan. Ganchunkunatapis argöllankunatapis qellaypitami rurarqan.
11 Norti kaqläpami patiupa cortïnan karqan chusku chunka pitsqa (45) metru. Jorcunninkunatapis jawiräkunantapis broncipita ishkay chunkatami (20) rurarqan. Ganchunkunatapis argöllankunatapis qellaypitami rurarqan.
12 Rupay jeqanan kaqläpanami cortïnapa largun karqan ishkay chunka ishkay metru pullan (22.5). Jorcunninkunatapis y jawiräkunantapis chunkatami rurarqan. Ganchunkunatapis argöllankunatapis qellaypitami rurarqan.
13 Rupay yarqamunan kaqläpami cortïnapa largun karqan ishkay chunka ishkay metru pullan (22.5). 14 Tsayläpami punku karqan. Punkupita itsuq kaqläpami karqan qanchis metru cortïna. Cortïnata tsararänanpämi rurarqan kimsa jorcunkunata cada ünunta jawiräkunantawan. 15 Tsaynöllami punkupita derëcha kaqlämanpis churarqan qanchis metru cortïnata. Tsay cortïnata tsararänanpämi rurarqan kimsa jorcunkunata cada ünunta jawiräkunantawan.
16 Patiucho tumaypa kaykaq cortïnakunaqa karqan llanulla putskashqa lïnu jïlupitami. 17 Patiucho kaykaq llapan jorcunkunapa jawiräkunan broncipitami karqan. Cortïnata tsaritsinanpä ganchunkunapis argöllankunapis qellaypita rurashqami karqan. Jorcunkunapa ñöpanpis qellaywan laqashqami karqan. Patiupa llapan jorcunninkunapa argöllankunapis qellaypitami karqan.
18 Patiupa punkunta tsaparaq cortïnatami llanulla putskashqa lïnu jïlupita y azul, granäti y puka millwa jïlukunapita rurarqan. Tsay cortïna shumaq kuyayllapä kananpämi shumaq bordayarqan. Largunmi karqan isqun metru. Patiupa wakin cortïnankunanömi tsay cortïnapapis altun karqan ishkay metru ishkay chunka pitsqa centïmetru (2.25). 19 Tsay punkupämi chusku jorcunninkunata y jawiräkunanta broncipita rurarqan. Cortïnata tsararänanpämi ganchunkunatapis argöllankunatapis qellaypita rurarqan. Jorcunkunapa puntankunatapis qellaywanmi laqarqan. 20 Sagrädu Tolduta ichïtsinanpä estäcankuna y patiupa jorcunninkunapa estäcankunapis broncipitami karqan.
Sagrädu Tolduta rurayänanpä aykata qoriyanqanpis
21 Tsaypitami Aarónpa tsurin Itamarta Moisés nirqan: “Tayta Diospa Pactu Toldunpä aykata qorinqantsiktapis levitakunawan listata rurayay”.
Tsaymi ninqannölla aykata qoriyanqantapis listata rurayarqan.
22 Moisésta Tayta Dios ninqannöllami Judá trïbupita Uripa tsurin y Hurpa willkan Bezaleel llapanta rurarqan. 23 Bezaleeltami Ahisamacpa tsurin Aholiab yanaparqan. Aholiab karqan Dan trïbupitami. Paypaqa yachaynin karqan imatapis kuyayllapäkunata rurananpämi. Tsaynöllami yacharqan imaykatapis bordayta azul, granäti y puka millwa jïlukunapita y llanulla putskashqa lïnu jïlupita.
24 Tinkuna Sagrädu Toldutawan manëjunkunata rurananpä runakuna apayanqan qorimi karqan isqun pachak soqta chunka pitsqa (965) kïlu kimsa chunka (30) grämu. Tsaykunatami pësayarqan Tinkuna Sagrädu Tolducho kaykaq pësakunawan.
25 Qellayta qoriyanqanmi karqan kimsa waranqa kimsa pachak chunka isqun (3,319) kïlu pitsqa pachak ishkay chunka pitsqa (525) grämu. Tsaykunatami pësayarqan Tinkuna Sagrädu Tolducho kaykaq pësakunawan. Tsay qellayqa karqan censashqa kaqkuna pägayanqanmi.† 26 Ishkay chunka (20) watayuqpita janamanmi runakunata censayarqan. Tsaymi censashqa kaqkuna kayarqan soqta pachak kimsa waranqa pitsqa pachak pitsqa chunka (603,550) runakuna. Cada ünunmi pägarqan pullan siclo qellayta. Tsaykunatami pësayarqan Tinkuna Sagrädu Tolducho kaykaq pësakunawan.† 27 Tsay qoriyanqan qellaymi kimsa waranqa kimsa pachak (3,300) kïlu karqan. Tsay qellaywanmi Tinkuna Toldupa marcunkunapa jawiräkunanta y rurincho kaq cortïnata tsararaq jorcunkunapa jawiräkunantapis rurarqan. Juk pachaktami (100) jawiräkunanta fundirqan. Tsaymi cada jawiräkunanta fundirqan kimsa chunka kimsa (33) kïlu qellaypita. 28 Wakin kaq qellaywanmi rurayarqan patiupa cortïnanta tsararänanpä ganchunkunata y jorcunkunapa puntancho argöllankunatapis. Tsaynöllami tsay qellaywan jorcunkunapa puntanta laqarqan.
29 Tinkuna Sagrädu Toldupä apayanqan broncimi karqan ishkay waranqa kimsa pachak kimsa chunka soqta (2,336) kïlu chusku pachak (400) grämu. 30 Tsay apayanqan broncipitami rurayarqan Tinkuna Toldupa punkun ichiraq jorcunkunapa jawiräkunanta, altarta, altarpa rejïllanta y altarpa manëjunkunatapis. 31 Tsaynöllami broncipita rurayarqan Sagrädu Toldupa patiunpa tumaraq jorcunkunapa jawiräkunanta y punkupa jorcunninkunapa jawiräkunantapis. Tsaynöllami broncipita rurayarqan Sagrädu Toldupa y patiunpa jorcunninkunata tsararaq estäcankunatapis.