2 Efodtami rurayarqan qori jïlupita, azul, granäti y puka millwa jïlukunapita y llanulla putskashqa lïnu jïlupitapis. 3 Qoripita jïluta rurayänanpämi qorita takaypa llapshatsaskir llanullata rutuyarqan. Tsay jïlupita, azul, granäti y puka millwa jïlukunapita y llanulla putskashqa lïnu jïlupitami efodta shumaq awayarqan.

4 Efodpa ishkan kuchunchömi tirantikunata rurayarqan umruncho warkaränanpä. 5 Efodwan wachukupis tsay piëzallami karqan. Tsaytami rurayarqan qori jïlupita, azul, granäti y puka millwa jïlukunapita y llanulla putskashqa lïnu jïlupita. Moisésta Tayta Dios ninqannöllami llapanta rurayarqan.

6 Tsaynöllami ónice rumikunata kamariskir tsararaqninkunata qoripita ruraykur sigurayarqan. Nirkurnami rumipita sëlluta ruraqnö tsay rumikunaman Israelpa tsurinkunapa jutinkunata qellqayarqan. 7 Tsay rumikunatami efodpa tirantinkunaman churayarqan Israel trïbukunapa jutinkunata imaypis yarparänanpä. Moisésta Tayta Dios ninqannöllami llapan tsaykunata rurayarqan.

8 Tsaynöllami kuyayllapä awashqa pectoraltapis rurayarqan. Efodta rurayanqannöllami qori jïlupita, azul, granäti y puka millwa jïlukunapita y llanulla putskashqa lïnu jïlupitapis rurayarqan. 9 Pectoralta ruraskirmi doblayarqan bolsanö cuadrädu kananpä. Largunpis anchunpis ishkay chunka ishkay (22) centïmetrumi karqan. 10 Pectoral jananmannami churayarqan chusku fïla kuyayllapä rumikunata. Punta kaq fïlamanmi churayarqan sárdica rumita, topacio rumita y carbunclo rumita. 11 Ishkay kaq fïlamanmi churayarqan esmeralda rumita, zafiro rumita y diamanti rumita. 12 Kimsa kaq fïlamanmi churayarqan jacinto rumita, ágata rumita y amatista rumita. 13 Chusku kaq fïlamannami churayarqan berilo rumita, ónice rumita y jaspe rumitapis. Tsay rumikuna mana yarqukänanpämi qoriwan tsararaqninkunata ruraskir sigurayarqan. 14 Fïlakunaman churayanqan rumikunami chunka ishkay kayarqan. Israelpa tsurinkuna chunka ishkay kayaptinmi tsaynö chunka ishkay kayarqan. Cada rumimanmi juk jutita qellqarqan rumipita rurashqa sëllunö kananpä.

15 Tsaynöllami pectoralpä cordonkunata qori jïlupita pilltayarqan. 16 Tsaynöllami rumikunata sigurayänanpä ishkay tsararaqninkunata y ishkay taksha argöllankunata qoripita rurayarqan. Tsay argöllakunatami pectoralpa jana kaq ishkan kuchunman churayarqan. 17 Tsay argöllakunamanmi qoripita pilltashqa cordonta ullkatsiyarqan. 18 Cordonpa ishkan puntankunatanami sigurayarqan umruncho kaq tsararaqninkunaman. Tsayqa pëchunchömi watararqan. 19 Tsaynöllami ishkay taksha argöllakunata qoripita ruraskir pectoralpa ura kaq kuchunkunaman churayarqan. Tsay argöllakunaqa pectoral rurincho karmi efod janancho karqan. 20 Tsaynöllami ishkay taksha argöllakunata qoripita ruraykur efodpa wachukun janaläninman churayarqan. Tsaykunami efodpa tirantinkunacho kar pectoralpa costüranman tinkurarqan. 21 Pectoralpa y efodpa argöllankunatami azul cordonwan watayarqan efodpita mana yarqunanpä. Moisésta Tayta Dios ninqannöllami llapanta rurayarqan.

22 Tsaynöllami efodpa rurinman jatikunanpä azul jïlupita sotänata rurayarqan. 23 Uman yaykunanpä kunkayuqta ruraskirmi sotänapa kunkan mana rachinanpä rebëtita jirayarqan. Tsay rebëtiqa qara casäcapa kuchun jirashqanömi karqan. 24 Sotänapa ura kuchunpami llanulla putskashqa lïnu jïluwan y azul, granäti y puka millwa jïlukunawan granädatanö adornuta bordayarqan. 25 Tsaynöllami tsay kuchunpa qoripita rurashqa campanillakunata churayarqan. Tsaynöpami sotäna kuchunman granädakunatawan qori campanillakunata tumaypa churayarqan. 26 Tsay sotänachöqa llapan kuchunpami tumaypa karqan juk granäda, juk qori campanilla, juk granäda, juk qori campanilla. Moisésta Tayta Dios ninqannöllami Tinkuna Tolduman yaykur jatikunanpä tsay sotänata rurayarqan.

27 Aarónpä y tsurinkunapämi tünicakunatapis llanulla putskashqa lïnu jïlupita awayarqan. 28 Tsaynöllami llanulla putskashqa lïnu jïlupita rurayarqan görrata, görrapa adornunkunata y calzoncïllukunata. 29 Wachukutapis awayarqan llanulla putskashqa lïnu jïlupita y azul, granäti y puka millwa jïlukunapitami. Awaskirnami wachukuman kuyayllapäta bordayarqan. Moisésta Tayta Dios ninqannöllami llapanta rurayarqan.

30 Tsaynöllami qoripita sagrädu vinchata ruraykur rumipita rurashqa sëllunö kananpä tsayman qellqayarqan: “Tayta Diospa karmi santu” nir. 31 Moisésta Tayta Dios ninqannöllami tsay vinchata azul cordonwan görraman watayarqan.

32 Tsaynömi Tinkuna Sagrädu Toldu rurayta ushayarqan. Moisésta Tayta Dios ninqannöllami Israel runakunaqa llapantapis rurayarqan. 33 Nirkurmi Sagrädu Tolduta y llapan manëjunkunata Moisésman apayarqan. Tsaymi apayarqan Sagrädu Toldupä rurayanqan ganchukunata, marcukunata, traviskunata, jorcunkunata, jawiräkunanta, 34 Tinkuna Tolduta qatananpä pukaman tiñishqa üsha qaratsata, fïnu qarakunata, babulta tsaparaq cortïnata, 35 Pactu Babulta, babulta puritsikuyänan qerukunata, babulpa tsapananta, 36 mësata, mësapa manëjunkunata, Tayta Diospa ñöpancho churaränanpä kaq tantata, 37 qoripita rurayanqan candelabruta, candelabrupa puntankunaman churayänanpä kaq mechërukunata, candelabrupa manëjunkunata, aktsi tsarinanpä aceitita, 38 qoripita rurashqa altarta, sagrädu aceitita, mushkuq inciensiuta, Tinkuna Toldupa punkunta tsaparaq cortïnata, 39 broncipita rurashqa altarta, broncipita rurashqa rejïllata, altarta puritsikuyänan qerukunata, altarpa manëjunkunata, lavatoriuta jamakunantinta, 40 patiupa cortïnankunata, patiupa jorcunninkunata, jorcunkunapa jawiräkunanta, patiupa punkunta tsaparaq cortïnata, patiupa estäcankunata waskantinta y Tinkuna Sagrädu Toldupa llapan manëjunkunatapis. 41 Tsaynöllami apayarqan Tinkuna Sagrädu Tolducho sacerdöti jatikunanpä kaq latsapata. Tsay latsapakunaqa karqan sacerdöti Aarónpa sagrädu latsapankunawan tsurinkuna jatikuyänanpä latsapakunami.

42 Moisésta Tayta Dios ninqannöllami Israel runakunaqa llapantapis rurayarqan. 43 Tayta Dios ninqannö llapantapis rurayanqanta rikarmi Moisés paykunata bendisarqan.