Jamay junaqcho jamayänanpä tantiyatsinqan
35
Llapan Israel runakunata qayaykatsirmi Moisés nirqan: “Kaykunami Tayta Dios mandamanqantsikkuna: 2 Semänacho soqta junaq aruyanki. Qanchis kaq junaqchöqa sagrädu kaptin Tayta Diosta adorarnin jamayanki.† Tsay junaqcho pipis aruq kaqqa wanutsishqami kanqa. 3 Jamay junaqchöqa ni maycho tarpis ninata ama tsaritsiyankitsu”.Sagrädu Tolduta rurayänanpä ofrendata qoriyanqan
4 Tsaypitanami Israel runakunata Moisés nirqan: “Tayta Diosmi nishqa: 5 Tayta Diospä ofrenda qarayta munaq kaqkunaqa llapan voluntäninwan apayämutsun qorita, qellayta, broncita, 6 azul, granäti y puka millwa jïlukunata, llanulla putskashqa lïnu jïluta y cabrapa aqtsanpita putskashqa jïlutapis. 7 Tsaynöpis apayämutsun pukaman tiñishqa üsha qaratsata, fïnu qarata, acacia qeruta, 8 candelabru tsarinanpä aceitita, sagrädu aceitimanpis inciensiumanpis takutsinanpä mushkuq jachakunata, 9 ónice rumikunata y wakin kuyayllapä rumikunatapis. Tsay rumikunami kayanqa mandaq sacerdötipa efodninta y pectoralninta† adornayänanpä.
Sagrädu Tolducho kaqkunata rurayanqan
10 “ ‘Qamkunacho mayqaykipis yachaq kaqkunaqa Tayta Dios nimanqankunata shumaq rurayänaykipä shayämunki. 11 Paymi nimashqa Sagrädu Tolduta ruranantsikpä. Tsaymi ruranantsikpä kaykan cuartunkuna, qatanankuna, ganchunkuna, marcunkuna, travisninkuna, jorcunninkuna y jawiräkunankunapis. 12 Tsaynöllami ruranantsikpä kaykan Pactu Babul, tsay babulta puritsikuyänan qerunkuna, babulpa tsapanan, cuartuta ishkayman rakinanpä cortïna, 13 mësa, mësata umrukunantsik qerukuna, mësapa manëjunkuna, mësacho churaränanpä jatusaq tantakuna, 14 aktsi tsarinanpä candelabru, candelabrupa manëjunkuna, mechërunkuna, aktsi tsarinanpä aceiti, 15 inciensiuwan qoshnitsikuna altar, tsay altarta puritsikuyänan qerukuna, sagrädu aceiti, mushkuq inciensiu, Sagrädu Tolduman yaykuna cortïna, 16 sacrificiuta rupatsina altar, broncipita rurashqa rejïllan, altarta puritsikuyänan qerukuna, altarpa manëjunkuna, jamakunantin broncipita lavatoriu, 17 patiupa cortïnankuna, patiupa jorcunninkuna, jorcunkunapa jawiräkunan, patiupa punkunta tsaparaq cortïna, 18 Sagrädu Tolduta ichïtsinanpä estäcankuna waskantin y patiupa jorcunninkunapa estäcankuna waskantin. 19 Tsaynöllami ruranantsikpä kaykan Tinkunantsik Sagrädu Tolducho sacerdöti Aarón jatikunanpä kaq sagrädu latsapakuna y tsurinkuna jatikuyänanpä latsapankunapis’ ”.
Ofrendata apayanqan
20 Moisés tsaynö niptinmi Israel runakuna aywayarqan imatapis kanqanpita apayänanpä. 21 Tsaymi Tinkuna Tolduta shäritsiyänanpä ofrendata churayta munaqkuna Tayta Diospä apayarqan. Tsaynöllami apayarqan manëjukunata rurayänanpä y sacerdöti jatikunanpä sagrädu latsapakunata rurayänanpäpis. 22 Tsaymi ofrendayta munaqkuna ollqupis warmipis apayarqan tikpinkunata, arëtikunata, sortïjankunata, wallqankunata y imatapis qoripita rurashqa kaqta. Tsaykunataqa llapantami Tayta Diospä apayarqan. 23 Tsaynöllami kanqanpita apayarqan azul, granäti y puka millwa jïlukunata, llanulla putskashqa lïnu jïluta, cabrapa aqtsanpita putskashqa jïluta, pukaman tiñishqa üsha qaratsata y fïnu qaratapis. 24 Tsaynöllami kanqanpita Tayta Diospä apayarqan qellayta y broncita. Wakinnami Tinkuna Sagrädu Tolduta shäritsiyänanpä acacia qeruta apayarqan.
25 Putskay yachaq warmikunami apayarqan azul, granäti y puka millwa jïlukunata y llanulla putskashqa lïnu jïlutapis. 26 Tsaynöllami putskay yachaq warmikuna cabrapa aqtsanta putskayarqan. 27 Israel runakunapa mandaqninkunanami apayarqan ónice rumikunata y wakin kuyayllapä rumikunatapis. Tsay rumikunaqa mandaq sacerdötipa efodninta y pectoralninta adornayänanpämi karqan. 28 Tsaynöllami apayarqan candelabru tsarinanpä aceitita. Tsaynöllami sagrädu aceitita rurayänanpä y inciensiuman takutsiyänanpä mushkuq jachakunata apayarqan. 29 Ofrendata churayta munaqkunaqa ollqupis warmipis kikinkunapa voluntäninpitami apayarqan Tayta Dios ninqannölla Tinkunantsik Sagrädu Tolduta shäritsiyänanpä.
Habilidäyuq runakunata aruyänanpä Moisés churanqan
30 Israel runakunatami Moisés nirqan: “Sagrädu Tolduta rurananpämi Uripa tsurin y Hurpa willkan Bezaleelta Tayta Dios akrashqa. Payqa Judá trïbupitami. 31 Bezaleelqa Tayta Dios yachayta qarashqa kaptinmi imayka ruraytapis shumaq yachan. 32 Qoripita, qellaypita y broncipita kuyayllapä kaqkunata rurananpäpis yachaynin kanmi. 33 Kuyayllapä rumikunatapis llaqllayta yacharmi tsararaqninta shumaq ruraskir siguratsin. Tsaynöllami qerutapis llaqllayta yachan y tukuy niraq kuyayllapäkunatapis rurayta yachan.
34 “Bezaleelta y Ahisamacpa tsurin Aholiabtapis Tayta Diosmi yachayta qarashqa wakin runakunata yachatsiyänanpä. Aholiabqa Dan trïbupitami. 35 Ishkantami Tayta Dios yachayta qarashqa imatapis kuyayllapäta rurayänanpä, azul, granäti y puka millwa jïlukunawan y llanulla putskashqa lïnu jïlukunawan imatapis bordayänanpä y kuyayllapäta imaykata awayänanpä.