2 Aruyta qallaykuyänanpämi Bezaleelta, Aholiabta y wakin yachaq y tantiyaq runakunatapis Moisés qayarqan. Paykunaqa aruyänanpä listumi kayarqan. 3 Tinkuna Sagrädu Tolduta rurayänanpämi Israel runakuna apayanqan ofrendakunata paykunata Moisés entregarqan. Israel runakunaqa voluntäninpitami cada tuta mas ofrendakunata apayarqan. 4 Tsaymi aruyninkunata jaqiykur Tinkuna Sagrädu Tolducho aruqkuna 5 Moisésta willaq aywar niyarqan: “Tayta Dios nimanqantsiknö Tinkuna Sagrädu Tolduta shäritsinantsikpä alläpanami runakuna apayämushqa”.

6 Tsaymi Moisésqa llapan campamentupa runakunata willakatsir nirqan: “Tinkuna Sagrädu Tolduta shäritsinantsikpä imatapis apayämutsunnatsu”.

Tsaynö willakatsiptinmi runakuna manana apayarqannatsu. 7 Llapanta rurayänanpäpis pasaypa atskanami karqan.

8 Sagrädu Toldupämi mas yachaq runakuna chunka bayëtakunata awayarqan llanulla putskashqa lïnu jïlupita y azul, granäti y puka millwa jïlukunapita. Tsay bayëtakunamanmi querubinkunata bordayarqan. 9 Tsay chunka bayëtakunaqa tsay tamäñullami kayarqan. Cada bayëtapa largunmi karqan chunka ishkay metru pullan (12.5). Anchunnami karqan ishkay metru.

10 Pitsqa bayëtakunatami largun kaqpa jirayarqan jukllayllanö kananpä. Tsaynöllami jirayarqan pitsqa kaq bayëtakunatapis. 11 Tsay ishkan jirayanqan bayëtakunapa largun kaq kuchunmanmi azul jïlukunata ishkaparkur ojalnin kananpä churayarqan. 12 Pitsqa chunkatami (50) rurayarqan jukaq bayëtapa kuchunpä y pitsqa chunkatanami rurayarqan jukaq bayëtapa kuchunpä. Tsaynöpami ishkan bayëtakunapa ojalninkuna frenti frenti tsaritsinanpä kayarqan. 13 Ojalninkunapita tsaritsiyänanpämi qoripita rurayarqan pitsqa chunka ganchukunata. Tsay ganchukunawan ishkan jirayanqan bayëtakunata tsaritsiyaptinmi juk toldullana karqan.

14 Tsay jananman qatayänanpämi cabrapa aqtsanpita awayarqan chunka juk bayëtakunata. 15 Tsay bayëtakunaqa llapanpis tsay tamäñullami kayarqan. Cada bayëtapa largunmi karqan chunka kimsa metru pullan (13.5). Anchunnami karqan ishkay metru. 16 Nirkurnami pitsqa bayëtakunata largun kaqpa jirayarqan jukllayllanö kananpä. Tsaynöllami soqta kaqkunatapis largun kaqpa jirayarqan jukllayllanö kananpä. 17 Tsaynöllami ojalkunata jïlupita ruraskir tsay jirayanqan bayëtakuna tinkunanpä kaq kuchunman churayarqan. Pitsqa chunka (50) ojalkunatami churayarqan jukaq jirayanqan bayëtapa kuchunman y pitsqa chunkatanami churayarqan jukaq bayëtapa kuchunman. 18 Tsay ojalkunata tsarinanpämi broncipita pitsqa chunka ganchukunata rurayarqan. Tsay ganchukunawan tsaritsiyaptinmi juk bayëtanöllana karqan.

19 Tsay bayëta jananpa qatayänanpämi rurayarqan pukaman tiñishqa üsha qaratsapita rurashqa tolduta. Tsay qaratsakuna jananmannami qatayarqan fïnu qarapita rurashqa tolduwan.

20 Nirkurnami acacia qerupita marcukunata ruraskir derëchu ichïtsiyarqan. 21 Cada marcupa altunmi karqan chusku metru pullan. Anchunnami karqan soqta chunka pitsqa (65) centïmetru. 22 Marcupura laqaränanpämi cada marcupa chakincho ishkay espïgata rurayarqan. Tsaynöllami llapan marcukunatapis rurayarqan. 23 Ishkay chunka (20) marcukunata rurayarqan sur kaqläman ichïtsiyänanpämi. 24 Tsay marcukuna ichiränanpämi qellaypita chusku chunka (40) jawiräkunanta rurayarqan. Cada marcupa ishkay espïgan kaptinmi cada marcupa ishkay jawiräkunanpis karqan. 25 Tsaynöllami ishkay chunka (20) marcukunata rurayarqan norti kaqläman ichïtsiyänanpäpis. 26 Tsaykuna jawiräyänanpämi qellaypita chusku chunka (40) jawiräkunanta rurayarqan. Tsaynöpami cada marcupä ishkay jawiräkunan karqan.

27 Soqta marcukunatami rupay jeqanan kaqläpa ichïtsiyänanpä rurayarqan. 28 Qepan kaq esquïnankunapäpis mas ishkay marcukunatami rurayarqan. 29 Tsay marcukunami esquïnacho tinkuq marcukunaman shumaq laqararqan. Jana kaq esquïnachömi juk argöllawan shequrarqan. Ishkan esquïnanchöpis marcukunata tsaynöllami ichïtsiyarqan. 30 Tsaymi puwaq marcukuna tsaylächo kayarqan. Cada marcupami qellaypita rurashqa ishkay jawiräkunan karqan. Tsaynöpami tsaylächo chunka soqta jawiräkunan karqan.

31 Sagrädu Toldupa jukaq ñöpan marcunkuna witsaypa tsararänanpämi acacia qerupita pitsqa traviskunata rurayarqan. 32 Tsaynöllami jukaq ñöpanpäpis pitsqa traviskunata rurayarqan. Sagrädu Toldu qepanpäpis pitsqa mas traviskunatami rurayarqan. Tsayqa rupay jeqanan kaqläpami karqan. 33 Chawpi kaq travisqa juk kuchunpita jukaq kuchunyaqmi ichiraq marcukunapa päsarqan. 34 Tsay marcukunata y traviskunatapis qoriwanmi laqayarqan. Traviskuna päsayänanpäqa qoripitami argöllankunata rurayarqan.

35 Cortïnatanami awayarqan azul, granäti y puka millwa jïlukunapita y llanulla putskashqa lïnu jïlupita. Tsaymanmi ishkay querubinkunata shumaq bordayarqan. 36 Tsay cortïnatami qoripita rurashqa ganchukunawan shequyarqan acacia qerupita rurashqa chusku jorcunkunaman. Tsay jorcunkunaqa qoriwan laqashqami karqan. Jorcunkunapa jawiräkuyänanpis qellaypita rurashqami karqan.

37 Nirkurmi juk cortïnata awayarqan tolduman yaykuna punkupä. Tsaytami awayarqan azul, granäti y puka millwa jïlukunapita y llanulla putskashqa lïnu jïlupita. Tsay cortïna kuyayllapä kananpämi shumaq bordayarqan. 38 Cortïna warkaränanpämi pitsqa jorcunkunata ganchunkunatawan rurayarqan. Tsay jorcunkunapa puntantapis argöllankunatapis qoriwanmi laqayarqan. Tsaynöllami jorcunkuna ichiräyänanpä pitsqa jawiräkunanta broncipita fundiyarqan.