Pactu Babulta ruranqan
37
Tsaynöllami acacia qerupita juk babulta Bezaleel rurarqan. Tsay babulpa largunmi karqan juk metru chunka centïmetru. Tsaynöllami anchunpis altunpis karqan soqta chunka pitsqa (65) centïmetru. 2 Rurinpa y jananpami qoriwan laqarqan. Tsaynöllami llapan kuchunpa qoripita rebëtita ruraskir tumaypa churarqan. 3 Chusku argöllankunata qoripita ruraskirmi chuskun chakinkunaman churarqan: ishkayta babulpa jukaq lädunman y ishkaytana babulpa jukaqnin lädunman. 4 Tsaynöllami acacia qerupita ishkay umrukuyänan qerukunata ruraskir qoriwan laqarqan. 5 Nirkurnami argöllapa uchkunpa ullkatsirqan babulta umrushqa puritsiyänanpä.6 Babulpa tsapanantaqa qori pürullapitami rurarqan. Largunmi karqan juk metru chunka centïmetru. Anchunnami karqan soqta chunka pitsqa (65) centïmetru. 7 Tsaynöllami martilluwan takayllapa ishkay querubinkunata qoripita rurarqan. Tsay querubinkunatami babulpa tsapanan ishkan kuchunkunaman ichitsirqan. 8 Tsapanantawan querubinkunataqa tsay piëzallatami rurarqan. Jukaq querubinmi karqan itsuqnincho y jukaqnami karqan derëchancho. 9 Tsay ishkan querubinkunami frenti frenti älankuna kichashqa babulpa tsapananta rikaräyarqan. Tsaynöpami ishkanpa älankuna tsapananta llanturäyarqan.
Tanta churakuna mësata ruranqan
10 Tsaynöllami acacia qerupita mësatapis rurarqan. Tsay mësapa largunmi karqan isqun chunka (90) centïmetru. Anchunnami karqan chusku chunka pitsqa (45) centïmetru y altunnami karqan soqta chunka pitsqa (65) centïmetru. 11 Tsay mësapa jananta, rurinta y chakinkunatami qoriwan laqarqan. Kuchunkunapapis tumaypami qoripita rurashqa rebëtita churaparqan. 12 Tsaynöllami qanchis centïmetru anchuta listunta tumaypa churarqan. Tsay jananmannami qoripita rurashqa juk rebëtita churarqan. 13 Tsaynöllami chusku argöllakunata qoripita ruraskir mësapa chuskun chakinkunaman churarqan. 14 Tsay argöllakunatami churarqan chakinpita rebëtin tinkuraqman. Tsay mësata puritsiyänanpämi argöllakunapa ishkay umrukuyänan qerukunata ullkatsiyarqan.
15 Mësata puritsikuyänan qerukunata acacia qerupita ruraskirmi jananpa qoriwan laqarqan. 16 Tsay mësapa manëjunkunatami qori pürupita rurarqan plätukunata, wishllakunata, järrakunata y cöpakunata. Tsay järrakuna y cöpakunaqa vïnuta altarman wiñapäyänanpämi karqan.
Candelabruta ruranqan
17 Tsaynöllami candelabrutapis qori pürupita martilluwan takayllapa rurarqan. Tsay candelabrupa jamakunan, chakin, cöpankuna y waytankunapis juk piëzallami kayarqan. 18 Tsay candelabruqa soqta rikrayuqmi karqan. Kimsa rikranmi jukaq lädunpa karqan y kimsa kaqnami jukaqläninpa karqan. 19 Cada rikrankunachömi kimsa waytakunata rurarqan. Tsay waytakunaqa karqan almendrupa waytan niraqmi. 20 Candelabrupa chakinchömi chusku waytankuna karqan. Tsay waytakunapis almendrupa waytan niraqmi kayarqan. 21 Cada rikran tinkuraqchömi juk wayta karqan. 22 Waytankunapis rikrankunapis tsay piëzallami karqan. Llapanpis qori pürupita martilluwan takayllapa rurashqami kayarqan.
23 Tsaynöllami candelabrupä qanchis mechërunkunata, mëchapa lliptanta jipinanpä taksha alicätikunata y llipta qorikunan platïllunkunatapis qori pürupita rurarqan. 24 Tsay candelabruta y llapan manëjunkunatami kimsa chunka kimsa (33) kïlu qoripita rurarqan.
Inciensiuwan qoshnitsikuna altarta ruranqan
25 Inciensiuwan qoshnitsikuna altartapis acacia qerupitami rurarqan. Tsay altarpa largunpis anchunpis chusku chunka pitsqa (45) centïmetrumi karqan. Altunmi karqan isqun chunka (90) centïmetru. Chuskun kuchunkunachömi altarwan juk piëzalla kananpä waqratanö rurarqan. 26 Tsay altartami jananpa, lädunkunapa y waqrankunatapis qori püruwan laqarqan. Tsaynöllami llapan kuchunpa qoripita rebëtita rurarkur tumaypa churaparqan. 27 Tsay churanqan rebëti chakinpanami cada esquïnanman qoripita argöllakunata churarqan. Tsay argöllakunami karqan umrukuyänan qerukunata ullkatsir altarta puritsiyänanpä.
28 Altarta puritsikuyänan qerukunata acacia qerupita ruraskirmi jananpa qoriwan laqarqan.
29 Tsaynöllami perfümita ruraqkuna rurayanqannö sagrädu aceitita y mushkuq inciensiutapis rurarqan.†