3 “Pitsqa bayëtakunata largun kaqpa jiratsinki juk bayëtanölla kananpä. Tsaynölla pitsqa kaqtapis jiratsinki juk bayëtanölla kananpä. 4 Tsay ishkay bayëtakunapa largun kaq kuchunman azul jïlukunata ojalnin kananpä churatsinki. 5 Pitsqa chunka (50) kanqa jukaq bayëtapa kuchunpä y pitsqa chunkanami kanqa jukaq bayëtapa kuchunpä. Tsaynöpami ishkan bayëtakunapa ojalninkuna frenti frenti kayanqa tsaritsinanpä. 6 Ojalninkunapita tsaritsinaykipä qoripita ruratsinki pitsqa chunka ganchukunata. Tsay ganchukunawan tsaritsinki ishkan jirayanqan bayëtakunata. Tsaynöpami juk toldullana kanqa.

7 “Tsay jananman qatanaykipä cabrapa aqtsanpita chunka juk bayëtakunata awatsinki. 8 Tsay bayëtakunaqa llapanpis tsay tamäñullami kayanqa. Cada bayëtapa largunmi kanqa chunka kimsa metru pullan (13.5). Anchunnami kanqa ishkay metru.

9 “Tsaypitana pitsqa bayëtakunata largun kaqpa jiratsinki jukllayllanö kananpä. Tsaynölla soqta kaqkunatapis largun kaqpa jiratsinki jukllayllanö kananpä. Tsay bayëtakunawan qatatsiptikimi soqta kaq jiranqan bayëtaqa punku yaykunacho päsaränanpä kanqa. Tsay päsaraq kaqta jananman doblatsinki.

10 “Ojalkunata jïlupita rurarkur tsay jiranqan bayëtakuna tinkunanpä kaq kuchunman churatsinki. Pitsqa chunka (50) ojalkunata churatsinki jukaq jiranqan bayëtapa kuchunman y pitsqa chunkatana churatsinki jukaq bayëtapa kuchunman. 11 Tsay ojalkunata tsaritsinaykipä pitsqa chunka ganchukunata broncipita ruratsinki. Tsaywan tsaritsiptikimi juk bayëtanöllana kanqa.

12 “Tsay bayëtakunawan qatatsiptikimi mas jatun kar sobrarnin Sagrädu Toldupa ñöpankunapa päsaranqa. 13 Tsay qataraq bayëtaqa ruri kaq bayëtapitami ishkan ñöpanpa päsaranqa chusku chunka pitsqa (45) centïmetru.

14 “Tsay bayëta jananman qatatsinki pukaman tiñishqa üsha qaratsapita rurashqa tolduwan. Tsay qaratsakuna jananmanna qatatsinki fïnu qarakunawan.

15 “Sagrädu Tolduta ichïtsinaykipäqa acacia qerupita shumaq shutu marcukunata ruratsinki. 16 Cada marcuta ruratsinki chusku metru pullan altuta. Anchuntana ruratsinki soqta chunka pitsqa (65) centïmetruta. 17 Marcupura laqaränanpä cada marcupa chakincho ishkay espïgata ruratsinki. Llapan marcukunatapis tsaynölla ruratsinki. 18 Sur kaqläman ichïtsinaykipä ishkay chunka (20) marcukunata ruratsinki. 19 Tsay marcukuna ichiränanpä chusku chunka (40) jawiräkunanta qellaypita ruratsinki. Cada marcupa ishkay espïgan kaptinmi cada marcupa ishkay jawiräkunanpis kanqa. 20 Tsaynölla norti kaqläman ichïtsinaykipä ishkay chunka (20) marcukunata ruratsinki. 21 Tsaykunata ichïtsiyänanpäpis qellaypita ruratsinki chusku chunka (40) jawiräkunanta. Tsaynöpami cada marcupä kanqa ishkay jawiräkunan.

22 “Rupay jeqanan kaqläpa ichïtsinaykipäpis soqta marcukunata ruratsinki. 23 Qepan kaq esquïnankunapä mas ishkay marcukunata ruratsinki. 24 Tsay marcukunami esquïnacho tinkuq marcukunaman shumaq laqaranqa. Jana kaq esquïnachömi juk argöllawan shequranqa. Ishkan esquïnanchöpis marcukunata tsaynölla ichïtsinki. 25 Tsaymi puwaq marcukuna tsaylächo kanqa. Cada marcupami qellaypita rurashqa ishkay jawiräkunan kanqa. Tsaynöpami tsaylächo chunka soqta jawiräkunan kanqa.

26 “Sagrädu Toldupa jukaq ñöpan marcunkuna witsaypa tsararänanpä acacia qerupita pitsqa traviskunata ruratsinki. 27 Tsaynölla jukaq ñöpanpäpis pitsqa traviskunata ruratsinki. Sagrädu Toldu qepanpäpis pitsqa mas traviskunata ruratsinki. Tsayqa rupay jeqanan kaqläpami kanqa. 28 Chawpi kaq travisqa marcukunapa juk kuchunpita jukaq kuchunyaqmi päsanqa. 29 Tsay marcukunata y traviskunatapis qoriwan laqatsinki. Traviskuna päsayänanpäqa qoripita argöllankunata ruratsinki. 30 Kay jirkacho rikatsinqätanölla Sagrädu Tolduta ruratsinki.

31 “Cortïnata awatsinki azul, granäti y puka millwa jïlukunapita y llanulla putskashqa lïnu jïlupita. Tsayman querubinkunata shumaq bordatsinki. 32 Tsay cortïnata qoripita rurashqa ganchukunawan acacia qerupita rurashqa chusku jorcunkunaman shequtsinki. Tsay jorcunkunaqa qoriwan laqashqami kanqa. Jorcunkunapa jawiräkuyänanpis qellaypita rurashqami kanqa. 33 Cortïnapa qepanmanna churanki Pactu Babulta. Tsay cortïnami Lugar Santïsimupita Lugar Santuta rakinqa.^† 34 Tsaypitana Lugar Santïsimucho Pactu Babulta tsapananwan tsaparkunki. 35 Lugar Santïsimu waqtanmanna mësatawan candelabruta churanki. Mësata churanki norti kaqläman y candelabrutana churanki sur kaqläman.

36 “Juk cortïnatana awatsinki tolduman yaykuna punkupä. Tsayta awatsinki azul, granäti y puka millwa jïlukunapita y llanulla putskashqa lïnu jïlupitapis. Tsay cortïnaman shumaq bordatsinki kuyayllapä kananpä. 37 Cortïna warkaränanpä acacia qerupita pitsqa jorcunkunata ruratsinki. Tsay jorcunkunata jananpa qoriwan laqatsinki. Ganchunkunatapis qoripita ruratsinki jorcun puntancho kananpä. Tsaynölla jorcunkuna ichiräyänanpä pitsqa jawiräkunanta broncipita funditsinki.