Broncipita altarta ruratsinanpä tantiyatsinqan
27
“Tsaynölla acacia qerupita cuadrädu altarta ruratsinki. Tsay altarpa anchun y largunmi kanqa ishkay metru ishkay chunka pitsqa centïmetru (2.25). Altunnami kanqa juk metru ishkay chunka pitsqa centïmetru (1.25). 2 Chuskun esquïnankunacho waqratanö ruratsinki. Tsay waqrakunawanmi altarqa tsay piëzalla kanqa. Altarpa jananta y rurinta bronciwan laqatsinki. 3 Altarpa llapan manëjunkunami broncipita kanqa. Tsay manëjukuna kayanqa uchpa qorikuna, tenäzakuna, trinchikuna, tazonkuna y kanallakuna. 4 Tsaynölla rejïllantapis ruratsinki broncipita. Tsay rejïllapa chuskun esquïnanman churatsinki broncipita rurashqa argöllakunata. 5 Tsay rejïllata altar rurinman churatsinki. Tsaynö churatsiptikimi tsay rejïlla altar pullancho tsakraranqa. 6 Tsaynölla acaciapita ishkay umrukuyänan qerukunata ruraskatsir jananpa bronciwan laqatsinki. 7 Tsay umrukuyänan qerukunata altarpa ishkanlächo kaykaq argöllankunapa ullkatsinki tsaywan puritsiyänanpä. 8 Tsay altartaqa tsapanaynaqta tablapita ruratsinki. Llapanta ruratsinki jirkacho rikatsinqätanölla.Sagrädu Toldupa patiunta ruratsinanpä tantiyatsinqan
9 “Sagrädu Tolduqa patiuyuq katsun. Tsay patiuta jiruruypa tsaparänanpä cortïnata llanulla putskashqa lïnu jïlupita awatsinki. Sur kaqläpami largun kanqa chusku chunka pitsqa (45) metru. 10 Cortïna warkaränanpä ishkay chunka (20) jorcunkunata broncipita ruratsinki. Jorcunkunapa jawiräkunanta ishkay chunkata broncipita ruratsinki. Cortïna tsararaq ganchukunatapis argöllakunatapis qellaypita ruratsinki. 11 Norti kaqläpami patiupa cortïnan kanqa chusku chunka pitsqa (45) metru. Jorcunninkunatapis jawiräkunantapis broncipita ishkay chunkata (20) ruratsinki. Ganchunkunatapis argöllankunatapis qellaypita ruratsinki.
12 “Rupay jeqanan kaqläpami cortïnapa largun kanqa ishkay chunka ishkay metru pullan (22.5). Tsaypa largunmi kanqa jukaq esquïnapita jukaq esquïnayaq. Jorcunninkunatapis jawiräkunantapis chunkata ruratsinki.
13 “Rupay yarqamunan kaqläpami cortïnapa largun kanqa ishkay chunka ishkay metru pullan (22.5). 14 Tsayläpami punku kanqa. Punkupita itsuq kaqläpami qanchis metru cortïna kanqa. Cortïnata tsararänanpä kimsa jorcunkunata ichïtsinki cada ünunta jawiräkunanman. 15 Tsaynölla punkupita derëcha kaqlämanpis qanchis metru cortïnata churatsinki. Tsay cortïnata tsararänanpä kimsa jorcunkunata cada ünunta jawiräkunanman ichïtsinki.
16 “Patiuman yaykuna punkupä ruratsinki isqun metru largu cortïnata. Tsayta awatsinki azul, granäti y puka millwa jïlukunapita y llanulla putskashqa lïnu jïlupitapis. Tsay cortïnata shumaq bordatsinki. Cortïnata tsararänanpä chusku jorcunkunata cada ünunta jawiräkunanman ichïtsinki. 17 Patiucho kaykaq llapan jorcunkuna qellaypita rurashqa argöllayuq y ganchuyuq kayätsun. Tsay jorcunkunapa jawiräkunanpis broncipita katsun. 18 Tinkunantsik Sagrädu Toldupa patiun kanqa chusku chunka pitsqa (45) metru largu. Anchunna kanqa ishkay chunka ishkay metru pullan (22.5). Altunna kanqa ishkay metru ishkay chunka pitsqa centïmetru (2.25). Cortïnanta ruratsinki llanulla putskashqa lïnu jïlupita. Jorcunkunapa jawiräkunanmi kanqa broncipita. 19 Sagrädu Toldupa llapan manëjunkunapis broncipitami kanqa. Tsaynölla Sagrädu Tolduta ichïtsinaykipä ruri kaq y waqta kaq estäcankunapis broncipita kanqa.
Candelabrupä aceitita rurayänanpä tantiyatsinqan
20 “Israel runakunata ninki olïvupita aceitita ruraskir apayämunanpä. Tsay aceitimi kanqa candelabru imaypis atsikyaränanpä. 21 Tsay candelabrutami cada tsakay Aarón y tsurinkuna Tinkunantsik Tolducho tsaritsinqa warat ñöpächo atsikyänanpä. Tsaynö atsikyanqa Pactu Babulta tsaparaq cortïna waqtanchömi. Tsay ninqäkunaqa imayyaqpis leymi qamkunapä y qamkunapita aywaraqkunapäpis kanqa.