Candelabrupä aceitita apayämunanpä ninqan
24
Mastami Moisésta Tayta Dios nirqan: 2 “Israel runakunata niy: ‘Tinkuna Tolducho kaykaq candelabru imaypis atsikyaränanpä olïvupita rurashqa aceitita apayämunki. 3 Pactu Babulta rakiq cortïnapa ñöpanman aywar tsay apayämunqayki aceitita candelabruman Aarón wiñapanqa Tayta Diospa ñöpancho warat tsarinanpä. Tsay ninqäkunaqa imayyaqpis leymi qamkunapä y qamkunapita aywaraqkunapäpis kanqa. 4 Qori candelabrucho kaykaq mechërukunata tsaynö kamarinqa Tayta Diospa ñöpancho warat tsarinanpä.Qori mësaman tantakunata churayänanpä ninqan
5 “ ‘Allinnin jarinapita chunka ishkay tantata rurayanki. Cada tantata rurayanki chusku kïlu pullan jarinapita. 6 Tayta Diospa ñöpancho kaykaq qori mësaman tsay chunka ishkay tantakunata soqta soqta churayanki.† 7 Cada soqta tantakunapa ñöpanman inciensiuta churayanki. Tayta Dios imaypis yarparänanpämi tsay inciensiuta payta adorar qoshnitsiyanki. 8 Cada jamay junaqmi Tayta Diospa ñöpanman mana qonqaypa tsay tantakunata churayanki. Tsaykunata imaypis rurayanki Israel runakunawan Tayta Dios pactu ruranqanta cumplir. 9 Tsay tantakunataqa Aarón y paypita aywaraq sacerdötikunallami mikuyanqa. Wakin ofrendakunapita y sacrificiukunapitapis mas sagrädu kaptinmi sagrädu lugarllachoa tsay tantakunata mikuyanqa’ ”.†
Tayta Diospa contran parlaq runata wanutsiyanqan
10 Juk runapa mamanmi Israel warmi karqan y taytannami Egipto runa karqan. Tsay Egipto runapa tsurinmi juk junaq Israel mayinwan campamentucho rimanakur 11 Tayta Diosta manakaqman churar contran parlarqan. Tsaynö parlanqanta wiyaqkunami Moisésman apayarqan. Tsay runapa mamanpa jutinmi Selomit karqan. Selomitpa taytanmi karqan Dibri. Dibriqa karqan Dan trïbupitami. 12 Tsaychömi prësu tsarararqan imata rurayänanpäpis Tayta Dios ninqanyaq.
13 Tsaymi Moisésta Tayta Dios nirqan: 14 “Conträ parlaq runata campamentupita jukläman jipiy. Tsaycho conträ parlanqanta wiyaqkuna paypa umanman makinkunata churayätsun. Nirkur llapan runakuna saqmar wanutsiyätsun. 15 Israel runakunata niy: ‘Pipis Tayta Diospa contran parlaq kaqmi jutsayuq kanqa. 16 Tsay runataqa saqmaykällar llapan runakuna wanutsiyätsun. Jäpa runa o Israel mayiki kaptinpis Tayta Diospa contran parlaq kaqtaqa wanutsiyätsun.
17 “ ‘Pipis runa mayinta wanutsiq kaqtaqa wanutsiyätsun.†
18 “ ‘Jukpa uywanta wanutsirqa trokinta kutitsitsun.
19 “ ‘Pipis runa mayinta maqaptinqa ruranqannölla kikintapis maqayätsun. 20 Maqaykanqancho tullunta pakiptinqa kikinpa tulluntapis pakiyätsun. Ñawinta pashtaptinqa kikinpa ñawintapis pashtayätsun. Kirunta jipiptinqa kikinpa kiruntapis jipiyätsun. Runa mayinta maqanqannölla kikintapis maqayätsun.†
21 “ ‘Pipa uywantapis wanutsirqa trokinta kutitsitsun. Runa mayinta wanutsiptinqa kikintapis wanutsiyätsun.
22 “ ‘Tsay ninqä leykunaqa jäpa runakunapä y Israel runakunapäpis tsaynöllami kanqa. Noqaqa Tayta Diosnikikunami kaykä’ ”.†
23 Moisés tsaynö niskiptinmi Tayta Diospa contran parlaq runata Israel runakuna campamentupita jukläman jipiykur saqmaypa wanutsiyarqan. Moisésta Tayta Dios ninqannöllami Israel runakuna rurayarqan.