3 “ ‘Soqta junaqlla aruyanki. Qanchis kaq junaqchöqa Tayta Diosta adorayänaykipä qorikäyanki. Tsay junaq ama aruyankitsu, sinöqa maycho tarpis Tayta Diosta adorar jamayanki.^†

4 “ ‘Wakin junaqkunapis kanmi Tayta Diosta adorar qorikäyänaykipä. 5 Cada wata punta kaq killacho chunka chusku kaq junaq tardi Tayta Diosta adorar Pascua fiestata rurayanki.^†

6 “ ‘Tsaypita waraynin junaqmi Levadüraynaq Tanta Mikuna fiesta qallaykunqa.^† Tsay fiestachöqa Tayta Diosta adorar levadüraynaq tantata qanchis junaq mikuyanki. 7 Tsay fiesta qallanqan junaq ima aruytapis ama aruyankitsu, tsaypa trokinqa Tayta Diosta adorayänaykipä qorikäyanki. 8 Tsaypita qoyay qoyay fiesta ushanqanyaq sacrificiukunata altarcho Tayta Diospä rupatsiyanki. Qanchis kaq junaqchöqa ima aruychöpis ama aruyankitsu, sinöqa tsay junaq yapay qorikäyanki’ ”.

9 Mastami Moisésta Tayta Dios nirqan: 10 “Israel runakunata niy: ‘Rikatsinäpä kaykaq nacionman chaykur murupakuyanqaykita cosechar punta poquqpita juk iñuyta sacerdötiman apayämunki. Tsay apayämunqaykiqa primiciami kanqa. 11 Tayta Dios chaskinanpämi jamay junaqpita waraynin junaq Tayta Diospa ñöpancho joqarkur wakman kayman sacerdöti kuyutsinqa.

12 “ ‘Tsay junaqmi juk watayuq sänu carnishtapis apayämunki sacrificiuta rupatsir Tayta Diosta adorayänaykipä. 13 Tsaynölla chusku kïlu pullan jarinatapis aceitiwan pichuskir apayämunki. Tsayqa altarcho rupatsinanpä tsaki mikuy ofrendami kanqa. Tsay rupatsinqanpa mushkuyninmi Tayta Diospa shonqunpänö kanqa. Juk litru vïnutapis apayämunki altarman wiñapänanpä. 14 Tayta Diosnintsikpä manarä apamurqa ni ankaypa ni chawanpa ni masaraypapis trïguta ama mikuyankitsu. Maycho täyaptikipis tsay ninqäkunaqa imayyaqpis leymi qamkunapä y qamkunapita aywaraqkunapäpis kanqa.

15 “ ‘Punta poquqta apaykamur jamay junaq warayninpita qanchis semänata yupayanki. 16 Qanchis semäna cumpliskiptin juk junaq masta yupayaptikimi pitsqa chunka (50) junaqna kanqa. Tsay junaqmi cosechayanqayki trïgupita Tayta Diospä ofrendata apayämunki. 17 Tsaynölla wayikikunapita ishkay tantata apayämunki. Tsay tantakunaqa cada ünunmi chusku kïlu allinnin jarinapita levadürawan rurashqa kanqa. Cada watacho puntata cosechayanqaykipita wakman kayman kuyutsinqan ofrenda karmi tsay tantakuna Tayta Diospä primicia kanqa. 18 Tantata apamurmi rupatsina sacrificiupä apayämunki juk watayuq qanchis sänu carnishkunata, juk torïtuta y ishkay carnërukunata. Tsay apayämunqayki uywakunata, tsaki mikuy ofrendata y vïnuta altarcho sacerdöti rupatsiptinmi mushkuynin Tayta Diospa shonqunpänö kanqa.

19 “ ‘Tsaynölla juk chïvuta apayämunki purificatsina sacrificiupä y juk watayuq ishkay carnishkunata alli päsakuy sacrificiupä. 20 Tsay uywakunatami punta poquq trïgupita rurayanqayki tantakunatawan Tayta Diospa ñöpancho wakman kayman sacerdöti kuyutsinqa. Tsaykuna Tayta Diospä sagrädu kaptinmi sacerdöti mikunanpä kanqa.

21 “ ‘Tsay junaqqa ima aruytapis jaqiskir Tayta Diosta adorayänaykipä llapayki qorikäyanki. Maycho täyaptikipis tsay ninqäkunaqa imayyaqpis leymi qamkunapä y qamkunapita aywaraqkunapäpis kanqa.^†

22 “ ‘Cosëcha witsan ama llapantaqa qoriyankitsu ni espigakuna shushuqtapis ama pallapäyankitsu. Tsaykunata jaqiykuyanki muchuqkuna y jäpa runakuna qorikuyänanpä’. Noqaqa Tayta Diosnikikunami kaykä”.^†

23 Mastami Moisésta Tayta Dios nirqan: 24 “Israel runakunata niy: ‘Qanchis kaq killa qallanan junaqcho llapayki jamar Tayta Diosta adorayänaykipä qorikäyanki. Cornëtata tukar fiestata rurayanki. 25 Tsay junaqqa ima aruytapis jaqiykur Tayta Diosta adorar sacrificiukunata rupatsiyanki’ ”.

26 Mastami Moisésta Tayta Dios nirqan: 27 “Qanchis killa chunka junaqchömi jutsata rurayanqaykipita purificashqa kayänaykipä kaykan. Tsay junaq ayunar Tayta Diosta adorayänaykipä llapayki qorikäyanki. Tsaynölla Tayta Diosta adorar sacrificiuta rupatsiyanki. 28 Tsay junaqqa ama ima aruytapis aruyankitsu. Purificashqa kayänaykipä kaq junaq kaptinmi llapan jutsaykikunapita Tayta Diosnintsik perdonayäshunki. 29 Tsay junaq mana ayunaq kaqtaqa pï kaptinpis Israel runakunapita qarquyanki. 30 Ayunananpa trokin tsay junaq pipis aruptinqa kikïmi ushakätsishä. 31 Tsaynö kaykaptinqa tsay junaq ama aruyankitsu. Maycho täyaptikipis tsay ninqäkunaqa imayyaqpis leymi qamkunapä y qamkunapita aywaraqkunapäpis kanqa. 32 Tsay junaqqa ayunar jamayanki. Tsaynö ayunayanki isqun junaq tardipita waraynin tardiyaq”.

33 Mastami Moisésta Tayta Dios nirqan: 34 “Israel runakunata niy: ‘Qanchis killacho chunka pitsqa kaq junaqcho Ramäda fiestata rurar qallaykuyanki. Tayta Diosta adorarmi tsay fiestata qanchis junaq rurayanki. 35 Qallaykunan junaq ima aruytapis jaqiykur Tayta Diosta adorayänaykipä llapayki qorikäyanki. 36 Qanchis junaqyaqmi Tayta Diosta adorar sacrificiukunata rupatsiyanki. Tsaynölla puwaq kaq junaqchöpis llapayki qorikaykur Tayta Diosta adorar sacrificiuta rupatsiyanki. Tsay junaqqa ima aruytapis ama aruyankitsu.^†

37 “ ‘Tsay fiestakunata rurar qorikäyänaykipämi Tayta Dios nishqa. Pay ninqannö altarcho rupatsiyänaykipämi uywakunata y tsaki mikuy ofrendakunatapis apayämunki. Tsaynölla vïnutapis altarman wiñapänanpä apayämunki. Llapantapis diyancho rurayanki. 38 Tsay fiestakunataqa Tayta Diosta adorar jamay junaqkunapita kaman rurayanki. Tsaynölla fiestakunapä apayämunqayki sacrificiukuna y ofrendakuna kaman kanqa jamay junaqpä apayämunqayki sacrificiukunapita y ofrendakunapita. Tsaynö kaman kanqa awniyanqaykita cumplir apayämunqaykipitapis y kikikikunapa voluntänikikunapita apayämunqaykipitapis.

39 “ ‘Cosëchata qoriyta ushaskir qanchis junaqyaq Tayta Diosta adorar fiestata rurayanki.^† Tsay fiestata rurar qallaykuyanki qanchis kaq killa chunka pitsqa junaqcho. Fiesta qallaykunan junaq y ushanan junaqpis jamayanki. 40 Fiesta qallaykunan junaq palmakunata, llimllasapa jachakunapa llimllankunata y mayu kuchuncho saucikunapa llimllankunatapis pakir qanchis junaq kushikur Tayta Diosnintsikpa ñöpancho fiestata rurayanki.^a 41 Cada wata qanchis kaq killacho Tayta Diosta adorar tsay fiestata qanchis junaq rurayanki. Tsay ninqäkunaqa imayyaqpis leymi qamkunapä y qamkunapita aywaraqkunapäpis kanqa. 42 Tsay fiestata rurarqa qanchis junaq ramädakunallacho llapayki punuyanki. 43 Fiestata mana qonqaypa tsaynö rurayaptikimi qampita aywaraqkunapis musyayanqa Egiptupita jipimuptï Israel runakuna ramädallacho täyanqanta. Noqaqa Tayta Diosnikikunami kaykä’ ”.

44 Tsaynömi Moisésqa Israel runakunata tantiyatsirqan Tayta Diosta adorar fiestakunata imay rurayänanpä kanqantapis.