3 “ ‘Israel runakuna noqapä apayämunqanqa sagrädumi kaykan. Tsaymi Aarónpita aywaraqkuna impüru kaykar tsaykunata altarcho rupatsirqa ñöpäpita qarqushä.^a Noqaqa Tayta Diosmi kaykä.

4 “ ‘Aarónpita aywaraqkuna lepra qeshyawan o purgación qeshyawan karpis impürumi kayanqa. Tsaynö kaykarqa Israel runakuna noqapä apayämunqan sagrädu kaqkunata ama mikuyätsuntsu. Purificakuskirmi itsanqa mikuyanqa.

“ ‘Aya sutaranqan kaqta yatarpis o penqayninpita jutupakurpis impürumi kayanqa. 5 Tsaynöllami qarachaypa y lätaypa puriqkunata yatar y impüru runata yatarpis impüru kayanqa. 6 Patsa tsakanqanyaqmi impüru kayanqa. Purificakurnin manarä bäñakurqa sagrädu mikuykunata manami mikuyanqatsu. 7 Rupay jeqanqan hörarämi purificashqa kar sagrädu mikuykunata sacerdötikuna mikuyanqa. 8 Wanushqa uywakunapa aytsanta y jirka uywakuna katuyanqan aytsata ama mikuyätsuntsu. Tsayta mikurqa impürumi kayanqa. Noqaqa Tayta Diosmi kaykä.

9 “ ‘Sacerdötikunata willay llapan ninqäkunata cumpliyänanpä. Mana cumplirqa jutsayuq karmi wanuyanqa. Noqa Tayta Diosmi paykunata akrashqä santu kayänanpä.

10 “ ‘Sacerdöti mana karqa sagrädu mikuykunata ama mikuyätsuntsu. Sacerdötipa qorpan ni aruqnin karpis tsay sagrädu mikuykunataqa ama mikuyätsuntsu. 11 Wätaynin kananpä sacerdöti rantinqanmi itsanqa sagrädu mikuykunata mikunqa. Tsaynöllami sacerdötipa wayincho yuriqkunapis mikuyanqa.

12 “ ‘Sacerdötipa jipash tsurin mana sacerdöti runawan majatsakarqa sacerdötipä derëchun sagrädu mikuykunata manami mikunqatsu. 13 Sacerdötipa warmi tsurin viüdayar o runanpita rakikar wamraynaqllarä taytanpa wayinman kutirqa taytan chaskinqan mikuykunatami mikunqa. Jäpa runakunami itsanqa tsay mikuykunata mikuyanqatsu.

14 “ ‘Pipis mana musyayninpa sacerdötipä kaq sagrädu mikuyta mikurqa trokinta kutitsitsun. Tsay jananman quinta parti masta yapanqa. 15 Tayta Diospä apayämunqan sagrädu sacrificiukunata y ofrendakunata Israel runakuna llutalla ushayänanta sacerdötikuna ama consientiyätsuntsu. 16 Tsaynö llutalla mikunanpä pitapis dëjarqa sacerdötipis jutsayuqmi rikakunqa. Noqa Tayta Diosmi sacerdötikunata akrashqä santu kayänanpä’ ”.

17 Mastami Moisésta Tayta Dios nirqan: 18-19 “Aaróntawan tsurinkunata y Israel runakunata niy: ‘Israel runa karpis o qamkunacho taq jäpa runa karpis rupatsina sacrificiupä uywata apamurqa torïtuta, carnishta o chïvuta karpis sänuta apayämunqa. Tsaynö apayämunqa awninqanta cumplinqanpita sacrificiupä o kikinpa voluntäninpita sacrificiupä apamurpis. 20 Sänu mana kaptinqa Tayta Dios manami chaskinqatsu.^†

21 “ ‘Alli päsakuy sacrificiupä uywata apamurqa torïtuta, üshata o cabrata karpis sänuta apayämunqa. Awninqanta cumplinqanpita sacrificiupä o kikinpa voluntäninpita sacrificiupä apamurpis sänu uywata apayämunqa. 22 Tayta Diospä uywata apamurqa ama apayämutsuntsu qaprata, pakikushqata, weqruta, verrugayuqta, qarachuta ni qeri ushashqatapis. Tsaytanöqa Tayta Diospa altarnincho rupatsinanpä ama apayämutsuntsu.

23 “ ‘Kikinpa voluntäninpita apamuptinqa makllu töru o makllu carnëru kaptinpis Tayta Dios chaskinqami. Awninqanta cumplir tsaytanö apamuptinmi itsanqa Tayta Dios chaskinqatsu.

24 “ ‘Tsaynöpis Tayta Diospä ama apayämutsuntsu runtuncho qeriyuqta, runtun däñashqata, runtun pashtashqata o capashqata. Rikatsinäpä kaq nacionchöpis tsaynö uywakunata ama apayämunkitsu. 25 Jäpa runa kaptinpis Tayta Diospä tsaynö däñashqa uywata apamuptinqa ama chaskiyankitsu. Däñashqa uywataqa Tayta Dios manami chaskinqatsu’ ”.

26 Mastami Moisésta Tayta Dios nirqan: 27 “Becërru orqu yurir, ashkash orqu yurir y kapish orqu yurirqa qanchis junaqyaqllami mamanwan kanqa. Puwaq junaqpitaqa Tayta Diospä rupatsinanpä apayämunki. 28 Wäkata ni üshata karpis tsay junaqllaqa wawantinta ama pishtayankitsu. 29 Tayta Diosta agradëcikur uywata apamurqa pay munanqantanö apayämunki. 30 Tsaynölla sacrificiuta rupatsir tsay junaqlla ushaypa mikuyanki. Waraynin junaqpäqa imatapis ama katuyankitsu. Noqaqa Tayta Diosmi kaykä.

31 “Llapan mandamientükunata cumpliyanki. Noqaqa Tayta Diosmi kaykä. 32 Santu kanqäta musyaykar llutankunata rurar penqakuyman ama churayämankitsu. Tsaynöpami qamkunacho pïmaypis tantiyanqa santu kanqäta. Noqa Tayta Diosmi qamkunata akrashqä santu kayänaykipä. 33 Tayta Diosnikikuna kanäpämi Egiptupita qamkunata jipimushqä. Noqaqa Tayta Diosmi kaykä”.