Sacerdötikuna imanö kayänanpä ninqan
21
Moiséstami Tayta Dios nirqan: “Aarónpita aywaraq sacerdötikunata niy: ‘Sacerdöti impüru mana kananpä castan wanuptinpis ayanta ama yatanqatsu. 2 Mamanpa, taytanpa, tsurinpa, wawqinpa ayantami itsanqa yatanman. 3 Piwanpis manarä kakuq paninpa ayantapis yatanmanmi. Impüru kanan kaptinpis paykunapa ayantaqa yatanmanmi. 4 Warminpa castan wanuptinmi itsanqa impüru mana kananpä tsay ayata yatanqatsu.5 “ ‘Pï wanuptinpis llakikur aqtsanta ni shaprantapis sacerdötiqa ama rutukutsuntsu. Qarantapis roqur ama qerita ruratsuntsu.a † 6 Tsaypa trokinqa Dios munanqanta rurarmi sacerdötikuna santu kayanqa. Runakuna apayämunqankunata altarcho rupatsiyänanpämi sacerdötikunata Tayta Dios akrashqa. Tsay rupatsinqankunaqa Tayta Diospa mikuyninmi kanqa. Tsaynö kaykaptinqa Tayta Diospä santu kayanqa.
7 “ ‘Sacerdötikunataqa Tayta Diosmi akrashqa santu kayänanpä. Tsaynö kaykaptinqa prostitütawan, fuerzashqa warmiwan o runanpita rakikashqa warmiwan ama churakäyätsuntsu.
8 “ ‘Sacerdötikuna santu kayanqanta Israel runakuna tantiyakuyätsun. Paykunata respitayätsun noqapä apayämunqanta altarcho rupatsiq kayanqanpita y noqa santu kanqäpita. Noqami qamkunata akrashqä santu kayänaykipä.
9 “ ‘Sacerdötipa jipash tsurin prostitüta karqa taytantami penqakuyman churan. Tsay niraq jipashtaqa kawaykaqta rupatsiyanki.
10 “ ‘Mandaq sacerdötillami sagrädu latsapataqa jatikunqa. Tsayta jatikunqa mandaq sacerdöti kananpä umanman sagrädu aceitita wiñapashqa kaptinmi. Tsaymi wanupakurpis tsampa uma purinqatsu ni latsapantapis rachinqatsu. 11 Maman o taytan wanuptinpis sutaraykanqan kaqman ama yaykutsuntsu. Tsayman yaykurqa impürumi rikakunqa. 12 Sagrädu aceitita umanman wiñapashqa kaykar ayaman aywarqa Tayta Diospa Sagrädu Tolduntapis impüruyätsinqami. Noqaqa Tayta Diosmi kaykä.
13 “ ‘Mandaq sacerdöti warmita ashirqa piwanpis manarä kakushqa jipashta warminpä ashinqa. 14 Manami churakanmantsu viüdawan, runanpita rakikashqa warmiwan, fuerzashqa warmiwan o prostitütawanpis. Warminpä ashirqa Leví trïbupita piwanpis manarä kakushqa jipashta ashitsun. 15 Tsaynö majatsakaptinqa paypita aywaraqkunata manami jamuräyanqanatsu. Mandaq sacerdötitaqa noqa Tayta Diosmi akrashqä santu kananpä’ ”.
Sänu kaqkunalla sacerdöti kananpä ninqan
16 Mastami Moisésta Tayta Dios nirqan: 17 “Aarónta ninki: ‘Qampita aywaraqkuna sänu kaqkunallami sacerdöti kayanqa. Paykunallami Tayta Diospä runakuna apayämunqanta altarcho rupatsiyanqa. Tsay rupatsiyanqanqa Tayta Diospa mikuyninmi kaykan. 18 Tsaymi mandaq sacerdöti kananpä yaykuyanmantsu qaprakuna, weqrukuna, sira qaqllayuqkuna, makllukuna, 19 chankan o rikran pakishqakuna, 20 kurkuyashqakuna, ichishaqkuna, ñawin nübishqakuna, qarachukuna, chupuwan qeshyaqkuna y runtun däñashqakuna. 21 Aarónpita aywaraqkuna sänu mana karqa Tayta Diospä apayämunqanta altarcho manami rupatsiyanmantsu. Sänu kaqkunallami rupatsiyanqa. 22 Altarcho mana rupatsirpis Tayta Diospä apayämunqan sagrädu mikuytami itsanqa mikuyanqa. 23 Tsaynölla cortïnata ama päsayätsuntsu, Lugar Santïsimumanpis ama yaykuyätsuntsu ni altarmanpis ama witiyätsuntsu. Tsayman witirqa Sagrädu Tolduta manami respitayantsu. Noqa Tayta Diosmi paykunata akrashqä santu kayänanpä’ ”.
24 Tayta Dios tsaynö ninqantami Moisés willarqan Aarónta, Aarónpa tsurinkunata y llapan Israel runakunatapis.