Mana cäsukuqkunata castigayänanpä ninqan
20
Mastami Moisésta Tayta Dios nirqan: 2 “Israel runakunata niy: ‘Pipis Moloc diospä tsurinta altarcho rupatsiq kaqtaqa Israel runa kaptinpis o qamkunacho taq jäpa runa kaptinpis saqmarnin wanutsiyanki. 3 Tsurinta Molocpä rupatsirqa Sagrädu Toldutami impüruyätsin y kikïtapis manakaqmanmi churaykäman. Tsaymi tsay runapa contran rikakur ushakätsishä. 4 Mana cäsukamar tsay runata mana wanutsiyaptikiqa 5 kikïmi tsay runapa y castankunapa contran shärishä. Paykunata ushakätsinqänöllami Molocta adoraq wakin runakunatapis ushakätsishä.6 “ ‘Pipis brüjukunaman o suerti qatiqkunaman aywaq kaqtaqa contran shärirmi ushakätsishä.
7 “ ‘Noqami Tayta Diosnikikuna kaykä. Tsaymi qamkunapis ninqäkunata cäsukur santu kayänayki. 8 Llapan leynïkunata cumpliyay. Noqa Tayta Diosmi qamkunata akrashqä santu kayänaykipä.
9 “ ‘Pipis mamanta o taytanta mana respitaptinqa wanutsiyanki.† Tsaynö wanutsishqa kananpäqa kikinmi jutsayuq kanqa.
10 “ ‘Pipis runa mayinpa warminwan kakuptinqa tsay ollquta y warmitapis wanutsiyanki.†
11 “ ‘Pipis mädistanwan kakurqa taytanta manami respitantsu. Tsay runataqa mädistantinta wanutsiyanki. Tsaynö wanutsishqa kayänanpäqa kikinkunami jutsayuq kayanqa.†
12 “ ‘Pipis llumtsuyninwan kakuptinqa llumtsuynintinta wanutsiyanki. Tsaynö ruranqanqa pasaypa jutsami kaykan. Wanutsishqa kayänanpäqa kikinkunami jutsayuq kayanqa.†
13 “ ‘Pipis ollqupura warmiwannö kakuptinqa ishkanta wanutsiyanki. Tsaynö ruranqan pasaypa jutsami kaykan. Wanutsishqa kayänanpäqa kikinkunami jutsayuq kayanqa.†
14 “ ‘Pipis suegranwan y warminwan kakurqa pasaypa jutsatami ruraykan. Tsaynö jutsata rurayanqanpita kimsanta kawaykaqta rupatsiyanki. Tsaynö rupatsiyaptikiqa runakuna mantsapakur suegranwan y warminwan manami kakunqatsu.†
15 “ ‘Pï runapis uywawan kakuptinqa uywatapis runatapis wanutsiyanki.
16 “ ‘Pï warmipis uywawan kakuptinqa uywatapis warmitapis wanutsiyanki. Tsaynö wanutsishqa kayänanpäqa kikinkunami jutsayuq kayanqa.†
17 “ ‘Pipis mamallapita o taytallapita paninwan kakurqa mana respitarmi pasaypa penqakuypä jutsata ruraykan. Tsay runata panintinta runakunapa ñöpancho wanutsiyanki. Tsaynö wanutsishqa kayänanpäqa kikinkunami jutsayuq kayanqa.†
18 “ ‘Pipis killa qeshyanwan kaykaq warmiwan kakuptinqa warmitapis ollqutapis Israel runakunapita qarquyanki. Yawarnin aywaykaq warmiwan kakunqanpita y warmipis yawarnin aywaykaptin awninqanpitami ishkanta qarquyanki.†
19 “ ‘Manami pipis mamanpa ñañanwan o taytanpa paninwan kakunmantsu. Legïtimu castanwan kakurqa ishkanmi jutsayuq kayanqa.
20 “ ‘Pipis tiyunpa warminwan kakurqa tiyunta manami respitantsu. Tsaynö rurarqa ollqupis warmipis jutsayuq karmi wamraynaqlla wanuyanqa.†
21 “ ‘Pipis wawqinpa warminta qechurqa wawqinta manami respitantsu. Tsaynö ruranqanpitami pasaypa jutsayuq kar wamraynaqlla kayanqa.†
22 “ ‘Leynïkunata y mandamientükunata llapanta cumpliyanki. Cumpliyaptikiqa rikatsinäpä kaq nacionpita manami pipis qarquyäshunkitsu. 23 Tsay nacioncho taq runakuna jutsata rurayaptinpis qamkunaqa ama jutsata rurayankitsu. Rabyanätsimar jutsata rurayanqanpitami paykunata ushakätsishä. 24 Qamkunata awnirmi nï tsay runakuna täyanqan markakuna herenciaykikuna kananpä. Tsay markakunachöqa lichipis abëjapa mishkinpis yakunörämi atska kaykan.
“ ‘Noqa Tayta Diosnikikuna karmi atska nación kayaptinpis qamkunallata munanqänö kawayänaykipä akrashqä. 25 Tsaynö akraykaptïqa impüru kaq uywakunata, impüru kaq pishqukunata, qarachaypa y lätaypa puriqkunatapis ama mikuyankitsu. Tantiyayay mayqan uywakunawan mayqan pishqukuna püru kayanqanta y impüru kayanqantapis.† Impüru kaqkunata mikurqa impürumi kayanki. 26 Noqa Tayta Diosnikikunami santu kaykä. Santu kaykaptïqa qamkunapis santu kayay. Atska nación kayaptinpis noqapa kayänaykipämi qamkunata akrashqä.
27 “ ‘Almakunawan parlaptin o brüju kaptin ollqu o warmi kaptinpis saqmaypa wanutsiyanki. Tsaynö wanutsishqa kayänanpäqa kikinkunami jutsayuq kayanqa’ ”.