3 “ ‘Mamaykita y taytaykita respitayanki.^†

“ ‘Jamay junaqkunacho respitamar jamayanki.^† Noqaqa Tayta Diosnikikunami kaykä.

4 “ ‘Ima ïdulukunamanpis ama yärakuyankitsu. Metalpita fundiypa ima ïdulukunatapis ama rurayankitsu.^† Noqaqa Tayta Diosnikikunami kaykä.

5 “ ‘Alli päsakuy sacrificiupä uywakunata pishtarqa shonqüpänö rurayanki. 6 Alli päsakuy sacrificiupä pishtayanqayki uywapa aytsanta tsay junaqlla mikuyanki. Katuyanqaykitaqa waraynin junaqpis mikuyanki. Ishkay junaqchöpis tsay aytsata mana usharqa kimsa kaq junaqcho rupatsiyanki. 7 Kimsa kaq junaqchöqa tsay aytsa asyashqanami kanqa. Rupatsinaykipa trokin mikuptikiqa tsay sacrificiu ruranqayki manakaqllapämi kanqa. 8 Tsay aytsaqa noqapä sagrädumi kaykan. Tsaymi tsay asyashqa aytsata pipis mikurqa sagrädu kaqta respitantsu. Tsay aytsata mikuq kaqtaqa Israel runakunapita qarquyanki.

9 “ ‘Cosëchata qorirpis chipyaqqa ama qoriyankitsu. Shushunqankunatapis ama qoriyankitsu. 10 Üvatapis ashi ashirkurqa ama pallayankitsu. Shushuqkunatapis ama qoriyankitsu. Tsaykunataqa jaqiykuyanki muchuqkuna y qamkunacho taq jäpa runakuna qorikuyänanpä.^† Noqaqa Tayta Diosnikikunami kaykä.

11 “ ‘Ama suwakuyankitsu.^† Ama llullakuyankitsu. Ama pitapis sakyayankitsu.^†

12 “ ‘Imatapis noqapa jutïcho awnirqa mana qonqaypa cumpliyanki.^† Llullakur jutïta joqarirqa manami respitayämankitsu. Noqaqa Tayta Diosmi kaykä.

13 “ ‘Runa mayikita engañar imantapis ama apakuyankitsu.^† Arupäshuqnikitapis tsay junaqlla pägayanki.

14 “ ‘Mana wiyaqkunata ama ashlliyankitsu ni qapra purikunanman imatapis ama churapäyankitsu.^† Tsaynö rurayanqaykipa trokinqa noqata mantsapakayämay. Noqaqa Tayta Diosmi kaykä.

15 “ ‘Autoridä karpis llapanta shumaq juzgayanki. Muchuqtapis imaykayuqtapis janan mana shäriypa arreglayanki.^†

16 “ ‘Pipa wasantapis rimar ama puriyankitsu.

“ ‘Runa mayikita wanutsiyänanpä manakaqkunata ama tumpayankitsu. Noqaqa Tayta Diosmi kaykä.

17 “ ‘Pitapis ama chikiyankitsu.

“ ‘Runa mayiki imatapis llutanta ruraptinqa yätsiyay.^† Mana yätsirqa qamkunapis jutsayuqmi rikakuykäyanki.

18 “ ‘Runa mayikita venganzata ama rurayankitsu ni nanaparäyankitsu. Tsaypa trokinqa kikikikuna kuyakuyanqaykinö runa mayikita kuyayanki.^† Noqaqa Tayta Diosmi kaykä.

19 “ ‘Llapan leynïkunata shumaq cäsukuyanki. Uywaykikunata juk casta uywawanqa ama qollpatsiyankitsu. Chakraykiman takuy murutaqa ama muruyankitsu. Ishkayläya jïluwan awashqa latsapata^a ama jatikuyankitsu.

20 “ ‘Wätay jipash majatsakänanpä awnishqa kaykaptin pipis tsay jipashwan punuptinqa ishkanmi castigashqa kayanqa. Itsanqa tsay wätay jipash libri yarqunanpä pipis manarä pägashqa kaptinqa castigarpis manami mayqantapis wanutsiyanmantsu. 21 Tsaypa trokinqa consagratsina sacrificiupä jipashwan punuq runa juk carnëruta Tinkuna Toldupa patiunman apamunqa. 22 Tsay carnëruta pishtar altarcho rupatsirmi tsay runa perdonashqa kananpä Tayta Diosta sacerdöti mañakunqa. Tsaynöpami jutsata ruranqanpita perdonashqa kanqa.

23 “ ‘Rikatsinäpä kaq nacionman chaykur plantayanqayki jachakunapa wayuyninta kimsa wata ama mikuyankitsu. 24 Chusku watachörä Tayta Diosta agradëcikur llapan wayuyninta paypä apayämunki. 25 Pitsqa wata kaqchömi itsanqa wayuyninta mikuyanki. Tsaynö rurayaptikirämi plantayanqayki jachakuna mas wayunqa. Noqaqa Tayta Diosnikikunami kaykä.

26 “ ‘Ima aytsatapis yawaryuqtaqa ama mikuyankitsu.^†

“ ‘Qamkunacho ama pipis katsuntsu suerti qatiqkuna ni brüjukunapis.^†

27 “ ‘Aqtsaykita rutukurqa imaypis rutukuyanqaykinölla rutukuyanki. Ama uma jirkallaykicho jaqiypaqa rutukuyankitsu. Ni shapraykipa puntallantapis ama rutuyankitsu.

28 “ ‘Pipis wanuptinqa llakikur cuerpuykita ama roqukuyankitsu. Qaraykicho ima tatuäjitapis ama ruratsiyankitsu.^† Noqaqa Tayta Diosmi kaykä.

29 “ ‘Warmi tsurikikunata prostitüta kayänanpä ama kachapäyankitsu. Tsaynö kachapäyaptikiqa taykäyanqayki nacioncho jutsa ruraymanmi runakuna churakäyanqa.^†

30 “ ‘Jamay junaqkunata respitayanki. Sagrädu Toldutapis respitayanki.^† Noqaqa Tayta Diosmi kaykä.

31 “ ‘Brüjukunaman ni suerti qatiqkunaman ama aywayankitsu.^† Paykunaman aywarqa pasaypa jutsayuqmi rikakuyanki. Noqaqa Tayta Diosnikikunami kaykä.

32 “ ‘Awkinkunata respitayanki. Paykunata respitarqa noqapitami mantsapakuykäyanki. Noqaqa Tayta Diosmi kaykä.

33 “ ‘Qamkunacho taq jäpa runakunata ama ñakatsiyankitsu. 34 Kikikikunapura alli rikanakuyanqaykinölla paykunatapis alli rikayanki. Yarpäyay qamkunapis Egiptucho jäpa kayanqaykita.^† Noqaqa Tayta Diosnikikunami kaykä.

35 “ ‘Metruykiwan, pësaykiwan ni ima tupuykiwanpis pitapis ama engañayankitsu. 36 Tsaymi balanzayki, pësayki y metruykipis exactu kanan.^† Egiptupita jipimushuqniki Tayta Diosnikikunami kaykä.

37 “ ‘Llapan ninqäkunata y llapan leynïkunata cumpliyay. Noqaqa Tayta Diosmi kaykä’ ”.