Castanwan mana kakuyänanpä ninqan
18
Mastami Moisésta Tayta Dios nirqan: 2 “Israel runakunata niy: ‘Noqami qamkunapa Tayta Diosnikikuna kaykä. 3 Egiptucho tar rikayanqayki costumbrikunataqa ama rurayankitsu. Pushaykanqä Canaánman charpis tsaycho taq runakunapa costumbrinkunata ama rurayankitsu. Paykuna kawayanqannöqa ama kawayankitsu. 4 Noqa ninqäkunata cäsukurnin leynïkunata cumplir kawayay. Noqaqa Tayta Diosnikikunami kaykä. 5 Leynïkunata y ninqäkunatapis cumpliyay. Leynïkunata cumpliq kaq runaqa llapantami cumplinman.† Noqaqa Tayta Diosmi kaykä.6 “ ‘Mayqaykipis castaykikunawanqa ama kakunkitsu. Noqaqa Tayta Diosmi kaykä.
7 “ ‘Mamaykiwan ama kakunkitsu. Mamaykiwan kakurqa taytaykita manami respitaykankitsu. Tsaytaqa manachi ruraykunkimantsu.
8 “ ‘Mädistaykiwan ama kakunkitsu. Tsayta rurarqa taytaykita manami respitaykankitsu.†
9 “ ‘Panikiwan ama kakunkitsu. Mamallapita o taytallapita karpis paniki juklächo o wayikicho yurishqa kaptinpis paywanqa ama kakunkitsu.†
10 “ ‘Willkaykiwanpis ama kakunkitsu. Ollqu tsurikipita o warmi tsurikipita karpis willkaykiqa yawarnikimi kaykan.
11 “ ‘Taytaykipa tsuripakuyninwanpis ama kakunkitsu. Payqa paniki karmi yawarniki kaykan.
12 “ ‘Taytaykipa paninwanpis ama kakunkitsu. Payqa tiyayki karmi yawarniki kaykan.
13 “ ‘Mamaykipa ñañanwanpis ama kakunkitsu. Payqa tiyayki karmi yawarniki kaykan.
14 “ ‘Taytaykipa wawqinpa warminwanpis ama kakunkitsu. Payqa tiyaykimi kaykan.†
15 “ ‘Tsurikipa warminwanpis ama kakunkitsu. Payqa llumtsuynikimi kaykan.†
16 “ ‘Wawqikipa warminwanpis ama kakunkitsu. Payqa llumtsuynikimi kaykan.†
17 “ ‘Mamanwan kaykarqa entenädaykiwan ama kakunkitsu. Entenädaykipa wawanwanpis y entenäduykipa tsurinwanpis ama kakunkitsu. Paykuna warmikipa yawarnin kaptin pasaypa penqakuypämi kaykan.†
18 “ ‘Warmikipa ñañanwan ama kakunkitsu. Warmiki kawaykaptin ñañanwan kakuptikiqa kikinpurami chikinakuyanqa.
19 “ ‘Killa qeshyanwan kaykaq warmiwanqa ama kakunkitsu.†
20 “ ‘Jukpa warminwan ama kakunkitsu. Tsaynö kakurqa pasaypa jutsayuqmi rikakunki.†
21 “ ‘Moloc diospä tsurikitapis ama rupatsinkitsu. Tsaynö rurarqa manami respitaykämankitsu.† Noqaqa Tayta Diosmi kaykä.
22 “ ‘Ollqupura ama kakunkitsu. Tsaynö kakurqa penqakuypä jutsatami ruraykanki.†
23 “ ‘Ima uywawanpis ama kakunkitsu. Warmipis uywakunawan ama kakutsuntsu. Tsaynö kakurqa pasaypa penqakuypä jutsatami ruraykäyanki.†
24 “ ‘Mayqaykipis tsaykunata rurarqa impürumi kayanki. Yaykuyänaykipä kaq markakunacho taq runakunatapis tsaynö impüru kayanqanpitami ñöpaykikunapita qarqushä. 25 Tsaynö jutsata rurar impüru kayaptinmi nacionninpis impüru kaykan. Tsaymi tsay runakunata castigar markankunapita qarqushä. 26 Ninqäkunata y leynïkunata cumplir tsay penqakuypä jutsakunata ama rurayankitsu. Tsaynölla qamkunacho taq jäpa runakunapis cumpliyätsun.
27 “ ‘Canaánman manarä chäyaptikimi tsaycho taq runakuna penqakuypä jutsata ruraykäyan. Tsaymi nacionninpis impüru kaykan. 28 Qamkunapis nacionnikita impüruyätsiptikiqa tsay runakunata qarqunqänömi qamkunatapis qarquyäshayki. 29 Pipis tsay penqakuypä jutsakunata ruraptinqa Israel runakunapita qarquyanki. 30 Tsaynö kaykaptinqa ninqäkunata cäsukuyay. Täyänaykipä kaq nacionman chaykur tsaycho taq runakuna jutsata rurayanqankunata ama rurayankitsu. Tsaynö rurarqa impürumi kayanki. Noqaqa Tayta Diosnikikunami kaykä’ ”.