Tinkuna Toldupa patiunllacho sacrificiuta rupatsinanpä ninqan
17
Mastami Moisésta Tayta Dios nirqan: 2 “Aarónta, tsurinkunata y llapan Israel runakunata kay ninqäkunata tantiyatsir niy: 3 ‘Pï Israel runapis töruta, üshata o cabrata karpis campamentucho o juklächo sacrificiupä pishtaskir 4 Tinkuna Sagrädu Toldupa patiunman Tayta Diospa ñöpancho rupatsinanpä apamunqa. Mana apamurqa yawarta jichanqanpitami pasaypa jutsayuq kanqa. Tsaynö ruraq kaqtaqa Israel runakunapita qarquyanki. 5 Tsaymi llutalla may jirkachöpis uywakunata pishtar sacrificiuta rupatsinanpa trokin Tinkuna Toldupa patiunman apamur sacerdötita entreganqa tsaycho rupatsinanpä. Tsay sacerdötinami alli päsakuy sacrificiupä Tayta Diospa ñöpancho uywakunata pishtanqa. 6 Tinkuna Toldupa patiuncho pishtarmi uywapa yawarninta altarman sacerdöti tsaqtsupanqa. Wiranta altarcho rupatsiptinmi mushkuynin Tayta Diospa shonqunpänö kanqa.7 “ ‘Jirkapa ama apayankinatsu chïvu niraq supaykunapä sacrificiuta rupatsiyänaykipä. Tsaykunatami mana tantiyakur adorayashqayki. Kay ninqäkunaqa imayyaqpis leymi kanqa qamkunapä y qamkunapita aywaraqkunapä.
8 “ ‘Israel runakunata y qamkuna täyanqaykicho jäpa runakunatapis tsay ninqäta willayanki. Rupatsina sacrificiuta o ima sacrificiutapis rupatsiyta munarqa 9 Tinkuna Toldupa patiunman Tayta Diospä apatsun. Mana apaq kaqtaqa Israel runakunapita qarquyanki.
Yawarta mana mikunanpä ninqan
10 “ ‘Yawarta mikuq kaqtaqa Israel runa o jäpa runa kaptinpis castigashämi.† Ichikllatapis yawarta mikuq kaqtaqa ushakätsishämi. 11 Llapan kawaqkunapa yawarninchömi kawaynin kaykan. Qamkunapis altarman yawarta jicharrämi jutsaykikunapita perdonashqa kayanki.† 12 Tsaymi Israel mayikikunata ninki mayqanpis yawarta mana mikuyänanpä. Tsaynölla qamkunacho taq jäpa runakuna yawarta ama mikuyätsuntsu.
13 “ ‘Mayqaykipis mikuna uywata o mikuna pishquta tsarirqa yawarninta ama mikuyankitsu. Tsaypa trokinqa patsaman jicharir allpawan tsapayanki. Tsaynölla rurayätsun qamkunacho taq jäpa runakunapis. 14 Llapan kawaqkunapami yawarnincho kawaynin kaykan. Tsaynö kaykaptinqa yawarta ama mikuyankitsu. Pipis yawarta mikuq kaqqa Israel runakunapita qarqushqami kanqa.
15 “ ‘Pipis wanushqa uywapa aytsanta o munti uywa katunqanta mikurqa latsapanta taqshakuskirmi bäñakunqa. Tsaynölla qamkunacho taq jäpa runakunapis tsayta mikurqa bäñakuyanqa. Tsaynö rurarpis patsa tsakanqanyaqmi impüru kayanqa. 16 Latsapanta mana taqshakur ni kikinpis mana bäñakurqa castigashqami kanqa’ ”.