Israel runakuna purificashqa kayänanpä kaq junaq
16
Tayta Diospa ñöpanman llutalla yaykur Aarónpa ishkan tsurinkuna wanuyanqanpitami† Moisésta Tayta Dios nirqan: 2 “Wawqiki Aarónta willay cortïnata päsar Lugar Santïsimuman llutalla mana yaykunanpä.† Tsaychömi babulpa tsapanan jananman pukutaycho yurimushä. Tsaymi tsayman llutalla yaykurqa wanunqa. 3 Juk torïtuta purificatsina sacrificiupä y juk carnëruta rupatsina sacrificiupä altarcho rupaskatsirrämi† Lugar Santïsimuman Aarón yaykunqa. 4 Tsaynöpis jatikunqa lïnupita awashqa sagrädu tünicata y lïnupita awashqa calzoncïlluta. Nirkurmi lïnu wachukuwan wachakakurkur umanmanpis lïnu görrata jatikunqa. Tsay latsapakuna sagrädu kaptinmi manarä jatikur bäñakunqa. 5 Israel runakuna apayämunqanpitami purificatsina sacrificiupä ishkay chïvukunata y rupatsina sacrificiupä juk carnëruta Aarón apamunqa.6 “Tsaypitanami purificatsina sacrificiupä Tinkuna Toldupa patiunman torïtuta Aarón apamunqa. Tsay torïtumi kanqa Aarón y paypita aywaraq sacerdötikuna purificashqa kayänanpä. 7 Nirkurnami ishkan chïvukunata Tinkuna Toldupa patiunman apaykur Tayta Diospa ñöpanman churanqa. 8 Tsaychömi suertita jitanqa mayqan chïvu Tayta Diospä kananpä y mayqan chïvu Azazelpäa kananpäpis. 9 Tayta Diospä kaq chïvutaqa purificatsina sacrificiupämi altarcho Aarón rupatsinqa. 10 Azazelpä kaq chïvutami itsanqa kawaykaqllata Tayta Diospa ñöpanman apamunqa. Nirkurnami tsunyaq jirkaman apaykur Azazel kaykanqan kaqman qarqunqa. Qarquptinmi Israel runakuna jutsata rurayanqanpita perdonashqa kar purificashqa kayanqa.
11 “Tsaypitanami Tinkuna Tolduman apamunqan torïtuta altarcho Aarón rupatsinqa kikin y paypita aywaraq sacerdötikuna purificashqa kayänanpä. 12 Tsaymi Tayta Diospa ñöpancho kaykaq altarpita shanshaykaq carbonta inciensiu qoshnitsikuna juntata Tinkuna Toldu rurinman apanqa. Tsaynöllami ishkay aptay ñuchu aqashqa mushkuq inciensiuta apanqa. Tinkuna Toldu rurincho kaykaq cortïnata päsarmi Lugar Santïsimuman tsaykunata apanqa. 13 Tsaychömi Tayta Diospa ñöpancho shansha apanqanman inciensiuta wiñanqa. Tsaymi inciensiupa qoshnin tsapaskinqa Pactu Babulpa tsapananta. Tsaynö tsapaptinmi Aarón wanunqatsu. 14 Tsaynöllami torïtupa yawarninman dëdunta jatiykur babulpa tsapananta punkuläpita tsaqtsupanqa. Nirkurnami kikin babultapis dëdunwan qanchis kuti tsaqtsupanqa.
15 “Lugar Santïsimupita yarquskirnami Israel runakuna jutsata rurayanqanpita purificashqa kayänanpä chïvuta pishtanqa. Tsay yawartapis torïtupa yawarninwan ruranqannöllami cortïna rurinman apaykur tsapananta y babulpa ñöpanta tsaqtsupanqa.† 16 Tsaynöpami Israel runakuna impüru kayanqanpita, mana cäsukuyanqanpita y jutsata rurayanqanpita Lugar Santïsimuta y llapan Tinkuna Tolduta purificanqa.
17 “Lugar Santïsimucho Aarón kaykaptinqa manami pipis Tinkuna Tolduman yaykunmantsu. Tsaychömi Aarónqa yawarta tsaqtsupanqa kikinpis, castankunapis y llapan Israel runakunapis purificashqa kayänanpä. 18 Tsaypita yarqurnami Tayta Diospa ñöpancho kaykaq altarta purificanqa. Tsaychömi torïtupa y chïvupa yawarninwan altarpa waqrankunata llushinqa. 19 Nirkurnami altarpa jananman qanchis kuti dëdunwan yawarta tsaqtsupanqa. Tsaynöpami Israel runakuna jutsata rurar impüruyätsiyanqanpita altarta purificanqa sagrädu kananpä.
20 “Lugar Santïsimuta, Tinkuna Tolduta y altarta purificatsiyta ushaskirnami kawaykaq chïvuta apayämunanpä Aarón ninqa. 21 Chïvupa umanman makinta churaykurmi Tayta Diosta willanqa Israel runakuna llutankunata rurayanqanta, contran kayanqanta y jutsata rurayanqanta. Tsaynö willarmi Israel runakunapa llapan jutsankunata apananpä chïvuman churanqa. Tsaypitanami juk runa tsunyaq jirkaman apaykur chïvuta kacharinqa aywakunanpä. 22 Tsaynöpami Israel runakunapa llapan jutsankunata tsay chïvu apakunqa pipis mana tanqan kaqman.
23 “Tsaypitanami Tinkuna Toldu rurinman Aarón aywar Lugar Santïsimuman yaykunanpä jatikunqan lïnu latsapata jipikuskir churaykunqa.† 24 Bäñakuskirnami latsapanta jatikurkur yarqunqa kikinpa jutsanpita y Israel runakunapa jutsanpita sacrificiuta rupatsinanpä. Tsaynö rupatsiptinmi kikinpa y Israel runakunapa jutsankuna perdonashqa kanqa. 25 Nirkurnami purificatsina sacrificiupä pishtanqan uywapa wiranta altarcho rupatsinqa.
26 “Tsunyaq jirkaman Azazelpä chïvuta apaq runapis latsapanta taqshakuskir y bäñakuskirrämi campamentuman kutimunqa.
27 “Purificatsina sacrificiupä pishtanqan torïtupa y chïvupa qaratsanta, aytsanta y panzankunatanami campamentupita jukläman apaykur rupatsinqa. Tsay uywakunapa yawarnintami Lugar Santïsimuta purificananpä apashqana karqan.† 28 Tsaykunata rupatsiq runaqa latsapanta taqshakuskir y bäñakuskirrämi campamentuman kutimunqa.
29 “Cada watami llapan tsaykunata rurayanki qanchis kaq killa chunka junaqcho. Tsay junaq ayunar ima aruytapis jaqiykuyanki. Qamkunacho taq jäpa runakunapis tsaynö rurayätsun. Kay ninqäkunaqa imayyaqpis leymi qamkunapä kanqa. 30 Tsay junaqmi llapaykita purificar Tayta Dios perdonayäshunki. Tsaymi Tayta Diospa ñöpancho llapan jutsaykipita mayllashqa kayanki. 31 Tsay junaqmi qamkunapä jamay junaq kanqa. Tsaymi ayunar ima aruytapis rurayankitsu. Tsay ninqäkunaqa imayyaqpis leymi qamkunapä kanqa.
32 “Mayqanpis mandaq sacerdöti kananpä churanqan sacerdötimi tsaykunata ruranqa llapanpis purificashqa kananpä. Paymi lïnupita rurashqa sagrädu latsapata jatikurkur 33 Lugar Santïsimuta, Tinkuna Tolduta y altarta purificanqa. Tsaynöpami sacerdötikunapis y llapan Israel runakunapis purificashqa kar perdonashqa kayanqa. 34 Jutsankunapita perdonashqa kayänanpämi cada watacho juk kuti tsay ninqäkunata Israel runakuna rurayanqa. Tsay ninqäkunaqa imayyaqpis leymi qamkunapä kanqa”.†
Moisésta Tayta Dios ninqannöllami llapantapis rurayarqan.