Ollqupis y warmipis imanöpa impüruyanqan
15
Moiséstawan Aaróntami Tayta Dios nirqan: 2 “Israel runakunata niyay: ‘Pï runatapis purgacióna tsariptin impürumi kanqa. 3 Tsaynö impüru kanqa purgación aywaptinpis o penqaynin tsapakaptinpis. Mayqannö kaptinpis impürumi kanqa. 4 Tsay runa maycho pununqan y maycho jamanqanpis impürumi kanqa.5 “ ‘Tsay runa pununqanta pipis yatarqa latsapanta taqshakuskir bäñakunqa. Bäñakurpis patsa tsakanqanyaqmi impüru kanqa. 6 Tsaynöllami tsay runa jamanqanman pipis jamarqa latsapanta taqshakuskir bäñakunqa. Bäñakurpis patsa tsakanqanyaqmi impüru kanqa. 7 Purgacionwan kaykaq runata pipis yatarqa latsapanta taqshakuskir bäñakunqa. Bäñakurpis patsa tsakanqanyaqmi impüru kanqa. 8 Purgacionwan kaykaq runa sänu runata toqapaykuptin toqapanqan runa latsapanta taqshakuskir bäñakutsun. Bäñakurpis patsa tsakanqanyaqmi impüru kanqa. 9 Purgacionwan kaykaq runa muntakunqan sillapis impürumi kanqa. 10 Purgacionwan kaykaq runa imamanpis jamanqanta pipis yatarqa patsa tsakanqanyaqmi impüru kanqa. Impüru runa yatanqan kaqta imatapis aparqa latsapanta taqshakuskir bäñakunqa. Bäñakurpis patsa tsakanqanyaqmi impüru kanqa. 11 Purgacionwan kaykaq runa makinta mana awikuypa juk runata yataptinqa yatanqan runa latsapanta taqshakuskir bäñakunqa. Bäñakurpis patsa tsakanqanyaqmi impüru kanqa. 12 Purgacionwan kaykaq runa mitu mankata yataptinqa tsay mankata pakiskiyanki. Imatapis qerupita rurashqa kaqkunata itsanqa mayllayanki.
13 “ ‘Purgacionwan kaykaq runa alliyanqanpita qanchis junaqtarämi püru kanqa. Tsaypitarämi pukyucho latsapanta taqshakuskir bäñakunqa. Tsaynö rurarrämi purificashqa kanqa. 14 Puwaq kaq junaqchönami Tinkuna Toldupa patiunman ishkay kullkushta o ishkay pushapa palumata karpis apamunqa. Tsaykunatami Tayta Diospa ñöpancho sacerdötita entreganqa. 15 Jukaqtami purificatsina sacrificiupä sacerdöti pishtanqa. Jukaqtanami pishtaskir rupatsina sacrificiupä rupatsinqa. Tsaynömi Tayta Diospa ñöpancho ruranqa purgacionwan qeshyaq runa purificashqa kananpä.
16 “ ‘Ollqupa lichin kikillan yarquptinqa bäñakunqa. Bäñakurpis patsa tsakanqanyaqmi impüru kanqa. 17 Tsaynölla lichin töpanqan latsapatapis taqshakunqa y qarapita rurashqakunatapis mayllanqa. Tsaynö rurarpis patsa tsakanqanyaqmi impüru kanqa. 18 Warmiwan runa punur lichinta jututsiptinqa ishkanmi bäñakuyanqa. Bäñakurpis patsa tsakanqanyaqmi impüru kayanqa.
19 “ ‘Killa qeshyan aywaptinqa qanchis junaqyaqmi warmi impüru kanqa. Pipis killa qeshyanwan kaykaq warmita yatarqa patsa tsakanqanyaqmi impüru kanqa. 20 Killa qeshyanwan kaykar qopikunqanqa imapis impürumi kanqa. Tsay warmi ima jananman jamaptinpis jamanqan kaqqa impürumi kanqa. 21 Killa qeshyanwan kaykaq warmi pitukunqan cämata pipis yatarqa latsapanta taqshakuskir bäñakunqa. Bäñakurpis patsa tsakanqanyaqmi impüru kanqa. 22 Killa qeshyanwan kaykaq warmi imamanpis jamanqanta pipis yatarqa latsapanta taqshakuskir bäñakunqa. Bäñakurpis patsa tsakanqanyaqmi impüru kanqa. 23 Qopikunqanta yatarpis o jamanqan kaqta yatarpis patsa tsakanqanyaqmi impüru kanqa. 24 Killa qeshyanwan kaykaq warmiwan pï runapis kakurqa qanchis junaqyaqmi impüru kanqa. Runa pununqan cämapis impürunami kanqa.
25 “ ‘Pï warmipis killa qeshyanwan qeshyanqanpita mas atska junaqna qeshyarqa yawarnin päranqanyaqmi impüru kanqa. 26 Tsay warmi pununqanpis jamanqanpis impürumi kanqa. 27 Warmi töpanqankunata pipis yatarqa impürumi kanqa. Tsaypita purificashqa kananpäqa latsapanta taqshakuskir bäñakunqa. Bäñakurpis patsa tsakanqanyaqmi impüru kanqa.
28 “ ‘Killa qeshyanwan kanqanpita püru kananpäqa yawarnin päranqanpita qanchis junaqyaqmi shuyanqa. 29 Puwaq kaq junaqchöqa ishkay kullkushta o ishkay pushapa palumata karpis apamunqa. Tsaykunatami Tinkuna Toldupa patiunman apaykur sacerdötita entreganqa. 30 Sacerdötinami jukaqta pishtanqa purificatsina sacrificiupä y jukaqtana pishtanqa rupatsina sacrificiupä. Tayta Diospa ñöpancho sacerdöti tsaynö ruraptinmi yawarnin päranqanpita tsay warmi purificashqana kanqa.
31 “ ‘Tsaynöpami Israel runakuna impüru mana kayänanpä tantiyatsiyanki. Impüru kayaptinqa paykunacho kaykaq Sagrädu Toldupis impürumi rikakunqa. Sagrädu Toldupis impüru rikakuptinqa wanuyanqami’ ”.