Leprapita alliyar purificashqa kananpä ninqan
14
Mastami Moisésta Tayta Dios nirqan: 2 “Leprawan qeshyaykanqanpita alliyar runakuna purificashqana kayänanpämi kaynö rurayanqa: Leprawan qeshyanqanpita alliyaskir sacerdötiman willakatsinqa.† 3 Sacerdötinami campamentupita yarquskir leprawan qeshyaykaq runa alliyanqanta o mana alliyanqantapis rikananpä aywanqa. Tsay runapa lepran alliyanqanta rikarqa 4 purificakunanpämi apatsimunqa ishkay püru kaq pishqukunata, cedru qeruta, puka tëlata y hisöpu jachata. 5 Jukaq pishquta wanuskatsirmi pukyupita chaqamunqan yaku wiñaraykaq mitu mankaman yawarninta jututsinqa. 6 Tsay yawaryuq yakumanmi ushmatsinqa kawaykaq pishquta, cedru qeruta, puka tëlatawan hisöpu jachata. 7 Purificashqa kananpämi leprawan qeshyanqanpita alliyaq runata yawarwan qanchis kuti tsaqtsupanqa. Purificashqana kanqanta sacerdöti willaskirmi kawaykaq pishquta kachaykunqa.8 “Purificakurqa latsapanta taqshakutsun, aqtsanta shapranta chipyaq rutukutsun y bäñakutsun. Tsaynöpami püruna rikakunqa. Tsaypita campamentuman kutirpis qanchis junaqyaq toldunman amarä yaykutsunrätsu. 9 Qanchis junaqcho chipyaq aqtsanta yapay rutukutsun. Tsaynölla shaprantapis, cëjasnintapis y cuerpuncho kaq llapan shaprantapis chipyaq jichkakutsun. Tsaynölla latsapantapis yapay taqshakuskir bäñakutsun. Tsaynö rurarrämi purificashqa kanqa.
10 “Leprawan qeshyanqanpita alliyaskir puwaq kaq junaqchöqa ishkay sänu carnishta y juk watayuq sänu china üshata sacrificiupä sacerdötiman apamutsun. Tsaynölla ofrendapä apamunqa aceitiwan pichurkur soqta kïlu pullan allinnin kaq jarinata y mediu litrutanö aceitita. 11 Tsaypitanami purificashqa kananpä kaq runata ofrendantinta Tinkuna Toldupa patiunman sacerdöti apanqa Tayta Diospa ñöpancho kananpä. 12 Apamunqan aceitita y juk carnishtami Tayta Diospa ñöpancho joqarkur wakman kayman sacerdöti kuyutsinqa consagratsina sacrificiu kananpä. 13 Tsaypitanami uywata imaypis pishtanqan sagrädu kaqcho tsay carnishta pishtanqa. Tsay carnishpa aytsan sagrädu kar purificatsina sacrificiupä apamunqan uywapa aytsannömi y consagratsina sacrificiupä apamunqan uywapa aytsannömi sacerdötipa derëchun kanqa.
14 “Nirkurnami consagratsina sacrificiupä pishtanqan carnishpa yawarninwan purificakuq runapa derëcha kaq rinrinta llushinqa. Tsaynöllami derëcha kaq makinpa maman dëdunta y derëcha kaq chakinpa maman dëduntapis llushinqa. 15 Nirkurnami sacerdötiqa kikinpa itsuq kaq maki paltanman ichiklla aceitita wiñarkur 16 derëcha kaq dëdunta tsay aceitiman jatinqa. Tsaywanmi Tayta Diospa ñöpanman qanchis kuti tsaqtsupanqa.
17 “Makincho sobraq kaq aceitiwannami purificakuq runata sacerdöti llushinqa derëcha kaq rinrinta y derëcha kaq makinpa y chakinpa maman dëdunta. Tsaynömi llushinqa consagratsina sacrificiupä pishtanqan carnishpa yawarninwan llushinqan jananman. 18 Tsay aceititami purificakuq runapa umanmanpis wiñapanqa. Tsaynö ruranqa tsay runa Tayta Diospa ñöpancho püru kananpämi.
19 “Nirkurmi purificatsina sacrificiupä apamunqan üshatapis sacerdöti pishtanqa tsay runa purificashqa kananpä. Tsaynöllami rupatsina sacrificiupä apamunqantapis pishtaskir 20 apamunqan jarinatawan altarcho rupatsinqa. Tsaykunatami sacerdöti ruranqa tsay runa purificashqa kananpä. Llapanta tsaynö ruraptinrämi purificashqa kanqa.
21 “Muchuq karqa consagratsina sacrificiupä juk carnishta apamunqa. Tsaytami tsay runa purificashqa kananpä altar ñöpancho joqarkur wakman kayman sacerdöti kuyutsinqa. Tsaynöllami aceitiwan pichushqa ishkay kïlu allinnin jarinata y mediu litrunö aceititapis ofrendapä apamunqa.
22 “Tsaynöpis aypäpakunqanman tupulla ishkay kullkushta o ishkay pushapa palumata karpis apamunqa. Jukaq palumami purificatsina sacrificiupä kanqa y jukaqnami rupatsina sacrificiupä kanqa. 23 Purificakunqanpita puwaq junaqtami tsaykunata Tinkuna Toldupa patiunman apaykur Tayta Diospa ñöpancho kaykaq sacerdötita entreganqa.
24 “Sacerdötinami consagratsina sacrificiupä apamunqan carnishtawan aceitita Tayta Diospa ñöpancho joqarkur wakman kayman kuyutsinqa. 25 Nirkurnami tsay carnishta pishtanqa consagratsina sacrificiupä. Yawarta tsarinqanwanmi purificashqa kananpä kaq runata llushinqa derëcha kaq rinrinta y derëcha kaq makinpa y chakinpa maman dëdunta.
26 “Tsaypitanami kikinpa itsuq kaq maki paltanman ichiklla aceitita sacerdöti wiñanqa. 27 Derëcha kaq dëdunta tsay aceitiman jatiykurmi Tayta Diospa ñöpanman qanchis kuti tsaqtsupanqa. 28 Tsaynöllami makincho kaykaq aceitiman dëdunta jatiykur purificakuq runata sacerdöti llushinqa derëcha kaq rinrinta y derëcha kaq makinpa y chakinpa maman dëdunta. Tsaynö llushinqa consagratsina sacrificiupä pishtanqan carnishpa yawarninta llushinqan jananman. 29 Makincho sobraq kaq aceititanami purificakuq runapa umanman wiñapanqa. Tsaynö ruranqa tsay runa Tayta Diospa ñöpancho purificashqa kananpämi.
30 “Nirkurmi purificakuq runa apamunqan kullkushkunata o pushapa palumakunata karpis altarcho sacerdöti rupatsinqa. 31 Jukaqmi kanqa purificatsina sacrificiupä y jukaqnami kanqa rupatsina sacrificiupä. Tsaykunatami churanqa tsaki mikuyta apamunqan ofrenda jananman. Tayta Diospa ñöpanchömi sacerdöti tsaynö ruranqa tsay runa purificashqa kananpä. 32 Leprawan qeshyanqanpita alliyaskirmi muchuqkuna tsaynö purificakuyanqa”.
Mupallishqa wayikunata purificananpä ninqan
33 Tsaypitanami Moiséstawan Aarónta Tayta Dios nirqan: 34 “Qamkunata rikatsinäpä kaq Canaáncho taykäyaptiki mayqan wayipis mupalliptinqa 35 wayipa duëñunmi sacerdötiman aywaykur willanqa wayin mupalliyaykanqanta.
36 “Tsaynö willaptinmi wayicho imapis impüru mana rikakunanpä sacerdöti ninqa tsay wayita jäkatsiyänanpä. Nirkurnami sacerdöti yaykunqa mupallinqan imanö kanqantapis rikananpä.
37 “Wayita rikapakunqancho mupallir verdiyaykaqta o pukayaykaqta y pirqa pasmaykaqta rikarqa 38 wayipita yarqurmi qanchis junaqyaq sacerdöti wichqaykunqa. 39 Qanchis junaq cumpliskiptinmi wayita rikananpä sacerdöti yapay kutinqa. Mupallir miraykanqanta tarirqa 40 sacerdötimi ninqa mupallishqa kaq rumikunata jipiskir impüru sitiuman jitayänanpä. Tsayqa markapita juklächömi kanqa. 41 Tsaynöllami mandanqa wayi rurintapis raspaskir raspanqan allpata markapita juklächo kaykaq impüru sitiuman jitayänanpä. 42 Tsaymi jipinqan rumikunapa trokin juk rumikunatana churar juk mituwan llushtatsinqa.
43 “Tsaynö raspaykaptinpis y rumita jitaykaptinpis y llushtaykaptinpis mupallinqan yapay yuriptinqa 44 yapay imanö kanqantapis rikananpämi sacerdöti yaykunqa. Wayi rurincho chipyaq mupallishqa kaptinqa tsay wayi impüru kanqantami ninqa. 45 Tsaynö kaptinqa tsay wayita juchuratsir ruminkunatapis, qerunkunatapis y llapan allpantapis markapita juklächo kaykaq impüru sitiumanmi jitariyanqa. 46 Manarä juchutsiptin pipis tsay wichqaraykanqan kaq wayiman yaykurqa patsa tsakanqanyaqmi impüru kanqa. 47 Tsay wayicho pipis mikurqa o punurqa latsapanta taqshakunqa.
48 “Wayiman sacerdöti yaykur llushtanqanpita mupallinqan illakashqatana rikarqa püruna tsay wayi kanqantami ninqa. 49 Wayi purificashqa kananpä apatsimunqa ishkay pishqukunata, cedru qeruta, puka tëlata y hisöpu jachata. 50 Juk pishquta wanuskatsirmi pukyupita chaqamunqan yaku wiñaraykaq mitu mankaman yawarninta jututsinqa. 51 Pishqupa yawarninmanmi ushmatsinqa cedru qeruta, hisöputa, puka tëlata y kawaykaq pishquta. Tsay yawarwanmi wayitapis qanchis kuti tsaqtsupanqa. 52 Tsaynömi wayita purificanqa pishqupa yawarninwan, pukyu yakuwan, kawaykaq pishquwan, cedru qeruwan, hisöpu jachawan y puka tëlawan. 53 Tsaynö ruraskirnami kawaykaq pishquta markapita jipiskir aywakunanpä kachaykunqa. Tsaynöpami wayi purificashqana kanqa”.