4 “Pipapis qaran yuraqashqa kaptin qerin mana uchkukaptin o aqtsanpis mana yuraqaptinqa qanchis junaqyaqmi sacerdöti wichqarätsinqa. 5 Qanchis junaqtami yapay rikanqa. Qeri mana miraptinqa yapaymi qanchis junaqyaq wichqarätsinqa. 6 Qanchis junaqcho qeri alliyaykaqta sacerdöti rikarmi qerilla kanqanta musyanqa. Tsaymi latsapanta tsay qeshyaq taqshakuriptin püruna kanqanta sacerdöti ninqa.

7 “Püruna kaykaptin qerin miraptinmi itsanqa sacerdöti rikananpä yapay kutinqa. 8 Qeri miraptin qaran yuraqashqa kaykaqta rikarmi sacerdöti tantiyanqa lepra kanqanta. Tsaymi tsay runa impüru kanqanta ninqa.

9 “Pitapis leprawan kaykaqta rikarqa sacerdötiman apayätsun. 10 Sacerdötinami imanö kanqantapis rikanqa. Qaran jakarnin aqtsan yuraqaykaqta o qeri yuriykaqta rikaptinqa 11 lepranami kanqa. Tsaymi impüru kanqanta sacerdöti ninqa. Impüru kanqanta tantiyarmi wichqarätsinqanatsu.

12 “Chaki puntanpita uma jirkanyaq tsay runacho lepra miranqanta sacerdöti rikarmi 13 alliyanqanta o mana alliyanqantapis tantiyanqa. Yuraqayparä entëru cuerpuncho tsakipaptinqa alliyanqantami tantiyanqa. Tsaymi püruna kanqanta ninqa. 14 Yapay qeri rikakämuptinmi itsanqa impüru kanqanta ninqa. 15 Tsaynö sacerdöti ninqa qeri imanöpis kanqanta rikaykurmi. Qeri kaptinqa lepranami kanqa.

16 “Tsay qeri tsakipar yuraqaptinqa sacerdötiman yapay kutitsun. 17 Qeri tsakiparnin yuraqanqanta rikarqa püruna kanqantami sacerdöti ninqa.

18 “Pipapis qerin alliyaykanqanpita 19 yuraqar jakaptin o pukayaptinqa sacerdötiman rikananpä aywanqa. 20 Qerin uchkukashqa kaykaqta rikar o aqtsanpis yuraqashqa kaykaqta rikarqa impüru kanqantami sacerdöti ninqa. Tsayqa leprami kanqa. 21 Qerin alliyar mana uchkukaptin y aqtsanpis mana yuraqaptinqa qanchis junaqmi tsay runata wichqarätsinqa. 22 Qerin miraptinqa impüru kanqantami sacerdöti ninqa. Tsay qeriqa lepranami kaykan. 23 Qerin mana miraptinmi itsanqa siralla kanqanta musyanqa. Tsaynö kaptinqa püru kanqantami sacerdöti ninqa.

24 “Pipis rupakuptin qaran yuraqaptin o pukayaptinqa 25 sacerdötimi rikanqa. Rupakunqancho aqtsan yuraqaptin y qerin uchkukaptinqa leprami kanqa. Tsayta rikarmi sacerdöti ninqa leprawan qeshyar impüru kanqanta. 26 Rupakunqanpita alliyar aqtsanpis mana yuraqaptin y qerin uchkukänanpa trokin alliyaptinqa qanchis junaqmi sacerdöti wichqarätsinqa. 27 Qanchis junaq päsaskiptinnami sacerdöti yapay rikanqa. Tsay qerin miraykaqta rikarqa impüru kanqantami ninqa. Tsayqa lepranami kanqa. 28 Alliyaptinqa manami lepratsu kanqa sinöqa rupakunqan sirallami. Tsaymi sacerdöti ninqa püruna kanqanta.

29 “Ollqupa o warmipa umancho o quijädancho qeri kaptin 30 sacerdötimi shumaq rikanqa. Qeri uchkukaptin y qericho kaq aqtsan qarwashtaptinqa tsay runa o tsay warmi impüru kanqantami sacerdöti ninqa. Umancho o quijädancho karpis tsay qeriqa leprami kanqa. 31 Tsay qeri mana uchkukaptin y qarancho yana shapra mana kaptinqa qeshyaykaq runata qanchis junaqyaqmi wichqarätsinqa.

32 “Qanchis junaq wichqararkatsirmi sacerdöti yapay rikanqa alliyanqanta o mana alliyanqantapis. Qeri mana miraptin, aqtsan mana qarwashtaptin y aytsan mana kachkakaptinqa 33 qeri ñöpancho kaq aqtsata rutukunanpämi sacerdöti ninqa. Qeri kaykanqanta itsanqa ama rutukunqatsu. Nirkurmi qanchis junaq yapay wichqarätsinqa. 34 Tsaypitanami qerita sacerdöti yapay rikanqa. Qeri mana miraptin ni uchkukaptinqa tsay runa püru kanqantami ninqa. Latsapankunata taqshakuskirmi püruna kanqa.

35 “Püru kanqanta ninqanpitarä tsay qeri mirayta qallaykuptinqa 36 sacerdötimi yapay rikanqa. Qeri miraykanqanta rikarqa aqtsan qarwashyanqantapis manami ashinqanatsu. Tsay runataqa impüru kanqantami ninqa. 37 Qeri patsallancho alliyaptin y yana aqtsana wiñaptinqa qeri alliyaykanqantami musyanqa. Tsaynö kaptinqa qeriwan qeshyaykaqta püruna kanqantami sacerdöti ninqa.

38 “Ollqucho o warmicho karpis kancha yuriptinqa 39 ima kanqantapis musyananpämi sacerdöti rikanqa. Oqi oqi karqa kanchallami kanqa. Tsaynö kaptinqa tsay runa o warmi pürumi kanqa.

40 “Pipapis aqtsan ushakaptin qalla putu rikakurpis pürumi kanqa. 41 Urkullanpa aqtsan ushakaptin paqla rikakurpis pürumi kanqa. 42 Qalla putu o paqla kaptinpis pukaypa pukar qeri yuriptinqa lepranami kanqa. 43 Tsaynö kaptin sacerdötimi rikanqa. Cuerpucho lepra yurinqannö yuraqayparä qeri jakaptinqa 44 tsay runapa umancho lepranami kanqa. Tsaymi impüru kanqanta sacerdöti ninqa.

45 “Leprawan qeshyarqa latsapanta rachiskir qara umalla qaqllanta tsapakurkur qayararnin puritsun ‘¡impürumi kä, impürumi kä!’ nir. 46 Tsay runaqa lepran alliyanqanyaqmi impüru kanqa. Tsaynö karqa alliyanqanyaq campamentupita juklächo täkutsun.

47 “Millwapita o lïnupita awashqa latsapachöpis, 48 millwapita o lïnupita awashqachöpis, qaracho o qarapita rurashqacho karpis 49 mupalliqnö verdiyaypa pukayaypa yurirqa leprami kanqa. Tsaynö kaptinqa ima kanqantapis tantiyananpä sacerdötita rikatsinqa. 50 Sacerdötiqa shumaq rikaykurmi imatapis mupallishqa kaqta qanchis junaq wichqarätsinqa. 51 Qanchis junaq cumpliskiptinmi yapay rikanqa imanö kaykanqantapis musyananpä. Latsapacho, awacho, qaracho, qarapita rurashqacho karpis mupallinqan mas miraptinqa mana alliyaq leprami kanqa. Tsaykunaqa impürunami kanqa. 52 Tsaytaqa latsapa kaptinpis, awa kaptinpis, qara kaptinpis o qarapita rurashqa kaptinpis rupatsinki. 53 Mupalliyanqan manana miraptinmi itsanqa 54 taqshaskatsir qanchis junaqyaq yapay wichqarätsinqa.

55 “Taqshaskatsir wichqarätsinqantami sacerdöti yapay rikanqa. Mupalliyanqan mana illakaptinqa impürumi kanqa. Tsaymi jananpa o rurinpa mupallishqa kaptinqa rupatsinqa. 56 Taqshanqanpitarä sacerdöti rikaptin manchalla quëdaptinqa rachiypami jipinqa latsapapita, qarapita o awapita kaptinpis. 57 Rachir jipinqanpitarä latsapacho, awacho o qarapita ruranqancho karpis yapay mupalliptinqa llapantami rupatsinqa. 58 Latsapata, awata, qarapita rurashqata taqshariptin mupallinqan illakaptinqa yapaymi taqshanqa. Tsaypitaqa pürunami kanqa.

59 “Lepra yuriptin tsay leykuna ninqannömi ruranqa latsapacho, millwacho, lïnucho, awacho o qarapita rurashqacho kaptinpis. Imanöpis kaykanqanta rikaykurmi püru kanqanta o impüru kanqantapis sacerdöti ninqa”.